InfoHub Logo

İlıas Gaýhar Abaıqyzy

Qyzylorda oblysy

 Jańaqorǵan aýdany Aqqum beketi

№221 negizgi orta mektebi 9- synyp oqýshysy

 

Ómirde kezdesken  qıyndyqtardy kóre júrip,  durys qabyldaǵan sheshimimiz- erteńgi kúnniń baǵdarshamy. Óıtkeni, seniń tańdaýyńa qaraı ómirdiń kilti ashylady. Sol kilt bizdi óz ortamyzǵa jeteleıdi. Olaı bolsa, durys tańdaý jasaý – adamı armannyń bıik shyńy.

Sheshim degende báriniń oıyna túsetin birinshi tańdaý mamandyqqa kelip tireledi. Mamandyq tańdaý – mańyzdy is. Mamandyq tańdaý degen óziń aınalysqyń keletin jumysty tańdaý ǵana emes, óziń aralasqyń keletin ortany da tańdaý. «Mamandyqtyń jamany joq, biraq onyń kez kelgenine ıkemdilik qajet, bul jaı kúneltý, tamaq asyraýdyń ǵana joly emes, úlken ónerdi, zor sheberlikti qajet etetin nárse», - dep Júsipbek Aımaýytov aıtyp ketkendeı ol – seniń alǵa qoıǵan maqsatyń. Maqsatqa jetý- tek jaqsy maman bolý emes, sol maqsatqa jetý jolyndaǵy  seniń adamdyq qasıetiń men qajyrlylyǵyń. Al, meniń maqsatym – ustaz bolý. Ustaz – taýsylmaıtyn ken, toqtamaıtyn bulaq. Meniń ustaz bolǵym keletin sebebi, muǵalim qorshaǵan ortaǵa, búkil álemge nur shashyp turatyn jarqyraǵan kún sekildi. «Ustaz... Jaratylysynan ózine aıtylǵannyń bárin jete túsingen, kórgen, estigen jáne ańǵarǵan nárselerdiń bárin jaqsy saqtaıtyn, eshnárseni umytpaıtyn, alǵyr da ańǵarympaz aqyl ıesi», - dep álemniń ekinshi ustazy Ál – Farabı atamyz aıtqandaı, bar álemge óz bilgenin úıretip, qanshama jandardy tárbıelep, bilim kózin ashqan aıaýly jan – ustaz. Men de osylaı óz elime, sońymnan ileskenderge ulttyq qadir- qasıetimizdiń ózge ult ókilderinen artyq turatyn eń qundy erekshelikterin tanyta alatyndaı  úlesimdi tıgizgim keledi. Buǵan sebep, sońǵy kezderi jańalyqty, telebaǵdarlamalardy  qarap otyrsań, ulttyq qundylyǵymyzdyń- adamı sana-senimimizdiń eýropalyq anaıy, ulttyq ereksheligimizge jat ádetterimen aralasyp, jartylaı jalańash kıim kıgen nemese túrli salpynshaqtarmen sándegen jaltyrbas qyzdardy, syrǵa taqqan jigiterdi kórsetip jatady. Olardyń barlyǵynyń mektepte oqyǵany aqıqat, biraq ulttyq namys, ulttyq qundylyq degendi boıyna sińirmegeni anyq.   Sondyqtan men sabaqtan tys ýaqytta kóne jyrlar men salt-dástúrimizdi oqyp, úırengendi ádetke aınaldyryp kelemin. Óıtkeni, adamdyq qundylyq ózimizdiń salt-dástúrimizde tereń saqtalǵan dep oılaımyn. 

«Adamı kapıtal – jańǵyrý negizi»,- deıdi  memleket basshysy «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýynda. Olaı bolsa, adamı kapıtaldy damytýda jetekshi qyzmet atqaratyn muǵalimdik mamandyq- meniń maqsatym. Meniń ómirlik ustanymym bolǵan bul mamandyqqa, meni qorshaǵan orta óz úlesin tıgizdi. Sebebi, men ózimniń aıaýly ustazdaryma qarap, boı túzep kelemin. Olar- ómirdiń aq pen qarasyn úıretken, meniń durys tańdaý jasap,  durys sheshim qabyldaýyma sebepshi bolǵan uly adamdar. Endeshe, meniń júrgen ortam, mektebim- armanymnyń alǵashqy baspaldaǵy.            

Toqsan aýyz sózdiń tobyqtaı túıini, bizdiń keleshegimizdiń kelbeti,órkendeýi bizdiń sheshimimizge baılanysty. Sondyqtan da durys tańdaý jasaý - bolashaǵymyzdyń asqar asýy.

---