InfoHub Logo

Qazaq ulttyq óner ýnıversıtetiniń rektory Aıman Musaqojaevanyń aıtýynsha, úshinshi kýrsta oqıtyn Dımash Qudaıbergen AQSH-tyń Los-Andjeles qalasyna oqýǵa barýy múmkin, dep QazAqparat habarlaıdy.

«Qazirgi kezde biz akademıalyq utqyrlyq baǵdarlamasy aıasynda AQSH-tyń Los-Andjeles qalasyndaǵy Musicians institute (Sollege of ContemporaryMusic) mekemesimen Dımash Kudaıbergendi oqýǵa qabyldaý boıynsha kelissózder júrgizip jatyrmyz. Oqýdyń merzimi - 120 kún», - dedi Musaqojaeva.

Onyń aıtýynsha, Dımashtyń daýysy erekshe, san alýan janrdaǵy shyǵarmany oryndaı alady. Onyń anasy joǵary sopranony sheber oryndasa, ákesi - lırıkalyq tenor. Dımashtyń ózi Ahmet Jubanov atyndaǵy Aqtóbe mýzykalyq kolejinde bilim alǵan. Al 2014 jyly Qazaq ulttyq óner ýnıversıtetine tústi. Qazirgi kezde ol «Estrada óneri» kafedrasynyń 3-kýrsynda oqıdy.

Aıta keteıik, 2010 jyly Dımash Qudaıbergen «Baıqońyrdyń jarqyn daýystary» halyqaralyq festıvalinde birinshi oryndy ıelengen. Al araǵa eki jyl salyp, «Jas qanat» respýblıkalyq baıqaýynda top jardy. Sol jyly «Shyǵys bazary» halyqaralyq konkýrsynda taǵy da bas júldeni qanjyǵasyna baılady. 2015 jyly «Slaván bazarynda» Gran-prı ıegeri atandy.

Qazirgi kezde Dımash Qudaıbergen Qytaıdyń Hýnan qalasynda ótip jatqan «I am a singer» halyqaralyq baıqaýyna qatysyp jatyr. Baıqaýdyń 5-kezeńinde ol «Uptown Funk» ánimen besinshi oryndy ıelendi. Onyń qytaılyq jankúıerleri ánshige arnap qumnan ádemi beıne salýǵa qatysty vıdeorolık túsirdi. Bir aptaǵa jetpeıtin ýaqyt ishinde ony 5 mln-nan astam adam kórip shyqty. 

---