InfoHub Logo

Ál-Farabı atyndaǵy Qazaq ulttyq ýnıversıteti men Qazaqstan taǵamtaný akademıasy (QTA) yntymaqtastyq kelisimin ornatty. Yntymaqtastyq aıasynda ýnıversıtettegi Qoǵamdyq densaýlyq saqtaý joǵary mektebinde (QDJM) nýtrısıologıa kafedrasy (tamaqtaný týraly ǵylym) ashylatyny jóninde QazUÝ rektory Ǵalym Mutanov pen QTA prezıdenti Tóregeldi Sharmanov memorandýmǵa qol qoıdy, dep habarlaıdy Ál-Farabı atyndaǵy Qazaq ulttyq ýnıversıtetiniń baspasóz qyzmeti.

QazUÝ men QTA yntymaqtastyǵy ǵylym men tájirıbe, bilim berý ıntegrasıasy jolynda medısınalyq bilim berý sapasyn arttyrý úshin resýrstardyń ıntellektýaldyq jáne tehnıkalyq qabiletin biriktirýge baǵyttalady. QazUÝ-dyń nýtrısıologıa kafedrasy óz jumysyn medısına ǵylymdarynyń doktory, akademık Tóregeldi Sharmanovtyń jetekshiligimen bastaıtyn bolady.

Álemdik medısınalyq ǵylym salasyna qosqan úlesi úshin Leon Bernard atyndaǵy Dúnıejúzilik densaýlyq saqtaý qorynyń laýreaty, profesor T.Sharmanov óz sózinde «Elimizdiń jetekshi oqý ordasynda kafedra basqarý - men úshin úlken mártebe. QazUÝ men Akademıanyń birlesken qyzmeti nýtrısıologıa, dıetologıa, mıkronýtrıent tapshylyǵy profılaktıkasy salasyndaǵy oqý-bilim, ǵylymı-zertteý, konsaltıńtik jáne sarapshylyq yntymaqtastyǵyna negizdelip otyr», - dep atap ótti.

Sondaı-aq, Sharmanov nýtrısıologıa kafedrasynyń ashylýy halyqtyń durys tamaqtaný mádenıeti men durys ómir saltyn qalyptastyrýda mańyzǵa ıe ekenin tilge tıek etti. Bul jumystar dástúrli tehnologıany júzege asyrýǵa, tamaqtaný ındýstrıasyna ınovasıalar engizip, taǵam ónimderin óndirýdiń jańa tehnologıalaryn qurastyrýǵa baǵyttalatyn bolady.

Ulttyq oqý orny men Akademıa áriptestigi kúrdeli jáne qoldanbaly medısına-bıologıalyq zertteýler júrgizýdi, memlekettik jáne halyqaralyq qoǵamdyq uıymdar men qorlardyń grant baıqaýlaryna qatysýdy, sondaı-aq, nýtrısıologıa salasynda álemniń jetekshi mamandarynyń qatysýymen bilimgerler men mamandarǵa arnap bilim berý jáne ǵylymı mektepterin ótkizý tárizdi ortaq qyzmetterdi josparlap otyr.

Sonymen birge, atalmysh yntymaqtastyq tamaqtaný máseleleri boıynsha otandyq qoǵamdyq densaýlyq saqtaýdyń tańdaýly dástúrleri men álem tájirıbesin paıdalanýǵa múmkindik bermek. Keleli kezdesý barysynda Tóregeldi Sharmanov bıe súti men jylqy maıynan ázirlengen ónimdermen tanystyryp ótti. Akademık olardyń ımýndyq-bıologıalyq jáne emdik-profılaktıkalyq joǵary qasıetin saqtaı otyryp, óndirýdiń ınovasıalyq tehnologıasyn baıandap berdi.

---