InfoHub Logo

Inovasıalyq-zıatkerlik texnologıalar akademıasynyń bas dırektory Nuraly Qudaıbergenulynyń aıtýynsha, elimizde ınovasıalardy damytý úshin aldymen, zıatkerlik menshikke baǵalaý júrgizetin mamandardy kóbirek daıyndaý qajet, dep QazAqparat habarlaıdy.

Sol kezde elimizdiń osy saladaǵy naqty áleýetin anyqtaýǵa múmkindik bolady.

«Zıatkerlik menshikke baǵalaý júrgizetin mamandyq jaqyn arada úlken suranysqa ıe bolady dep oılaımyn. Máselen, Japonıa, Taıvan sıaqty memleketterdi alaıyqshy, olar neniń arqasynda kún kórip otyr? Árıne, san alýan ónertabys pen texnologıalyq jańalyqtardyń arqasynda damyp keledi. Qazirgi kezde ol jerde bir adam tyń jańalyq tapsa, birden qatarynan birneshe damyǵan memlekette patent beriledi. AQSH-ta, Japonıada, Sıngapýrda, Taıvanda - bári bir ýaqytta sol jańalyqqa patenttiń alynǵanyn bilip otyrady. Ol úshin arnaıy qyzmet te bar. Bir joly xalyqaralyq jıynǵa qatysyp, bir ıdeıam jaıynda aıtyp edim. Sony estigen Taıvan eliniń profesory eki aptadan keıin maǵan patentti kórsetip tur. Kórdińiz be, damyǵan elder ondaıdy birden qaǵyp alady", - deıdi Nuraly Qudaıbergenuly.

Osyndaıda zıatkerlik menshikti shuǵyl baǵalap, belgili bir ónertabystyń álem boıynsha bar-joǵyn bile alatyn mamandardyń tapshylyǵy barynsha seziledi. Búginde zıatkerlik menshikti baǵalaýmen aınalysatyn xalyqaralyq sarapshylar bar. Degenmen, olardyń qyzmetine júgingen tym qymbatqa túsedi. Sol sebepti Qazaqstanda osy sanattaǵy mamandardy daıarlaý mańyzdy. Onsyz ınovasıalar salasyndaǵy jobalardy iske asyrǵan qıynǵa soǵady.

"Bizde ónertabystar men tyń jańalyqtar boıynsha komıtet te joq. Ony qysqartyp tastady. Qazirgi kezde Ádilet mınıstrligi janynda avtorlyq quqyqpen aınalysatyn mekeme bar. Mýzykaǵa jáne taǵy basqa patentter beriledi. Alaıda irgeli ǵylymı jobalarǵa qatysty jumystar aqsap tur. Iá, bir qujatty beredi de, boldy. Alaıda onyń negizinde bizdiń jańalyǵymyz basqa elde engizilse, qalamaqyny alý qıyn", - deıdi akademıa basshysy.

Aıta keteıik, bıylǵy Joldaýda Prezıdent aqparattyq texnologıalar men ınovasıalardy keńinen damytýdy tapsyrdy. Indýstrıaldy-ınnovasıalyq damý baǵdarlamasynyń ekinshi besjyldyǵy barysynda da ınovasıalarǵa negizgi basymdyq berilýi tıis. Osy oraıda Astanada ótken bir jıynda «Nazarbaev Zıatkerlik mektepteri» AQ basqarma tóraıymy Kúlásh Shámshıdınova "biz bilmeıtin" jańa mamandyqtardyń tizimin jarıalaǵan bolatyn.

---