Bir adam jas balasyn janyna aldy,
Ekeýi saıran etip ketip qaldy.
Qydyryp árli-berli júrdi daǵy,
Eginshi egin ekken jerge bardy.
Aralap ár egindi qarap júrdi,
Kez edi pisip bolǵan egin túrli.
Bastaryn dánge tolǵan tómen salyp,
Bıdaılar beıne taǵzym etip turdy.
Jalǵyz-aq bir bıdaı tur kókke qarap,
Beıne bir jalǵyz ózin kópke balap.
Balanyń sol bıdaıǵa kózi túsip,
Bilmekke ketti kóńil jónin surap:
«Qubylyp bıdaılar tur basyn salyp,
Jibergen myrza Qudaı nurǵa qanyp.
«Áı, áke, munyń mánin túsindirshi,
Bir iske turmyn ózim qaıran qalyp.
Bul Bıdaı kóterip tur basyn kókke,
Qaraıdy shekireıip ózi kópke.
Ózine ózgelerdi teńgermeıtin,
Sonshama bul bıdaıdyń dáni kóp pe?»
«Aıtaıyn munyń mánin, balam, saǵan,
Shyraǵym, túrin kórip tańdanba oǵan.
Ózgesi tómen qarap búgilgende,
Oılama kem eken dep bári sonan».
Jáne de ákesi aıtty balasyna:
«Suqtanba qur soraıǵan qarasyna.
Qudaıym ózgesine dán bergende,
Bul bıdaı dánsiz qapty arasynda.
Bıdaılar basy tolyq ıilip tur,
Dán bergen qojasyna syıynyp tur.
Basynda bul bıdaıdyń dáni bolmaı,
Kekireıip, kókke qarap, búlinip tur.
«Elde kóp bul bıdaıdaı adam, - deıdi,
Tákappar, ony halyq, jaman, - deıdi.
- Qalpy emes tákkaparlyq danyshpannyń,
Tutynba bul minezdi, balam», - deıdi.

---