InfoHub Logo

Qalyń oqyrman jaqsy jazýshynyń bóri astanada, Almatyda turady dep oılaıdy. Onysy ras. Astana — rýhanı ortalyq. Al endi shyndyqqa kelsek, kórnekti jazýshylardyń kóbi elden, alystaǵy aýyldardan shyqqan. Óner kózi — halyqta dep beker aıtpaıdy.

Al qazir oblystarda, elde turatyn qalamgerler az emes. Mysaly, Jambyl oblysynda jazýshylardyń áleýetti toby bar. Árıne, qalam sheberleri áýeli jaratylystyń, asa bıik qudirettiń jaratqan jemisi. Talantty Qudaı beredi. Eshbir ýnıversıtet, o basta jaratylys bergen daryn bolmasa, jazýshy tárbıelep shyǵara almaıdy. Ýnıversıtet sol talantty jetildirip, shyndaýy múmkin, al Qudaı bermegen ónerdi eshbir mektep bere almaıdy.

Onyń ústine talantqa ókimet tarapynan qamqorlyq bolmasa, Qudaı o basta bergen bir túıir shoq tutanbaı qalýy da múmkin. Osy turǵydan alǵanda Jambyl oblysynyń ákimi Ómirbek Baıgeldıevtiń óner, ádebıet adamyna, jalpy mádenıet salasyna oń kózben qaraýy da áýlıe atalyq jazýshylar tobynyń myna qıyn-qystaý zamanda qojyrap ketpeı, jemisti eńbek etýine edáýir sebep.

Jambyl oblystyq qazaq teatrynyń repertýaryna kóz salsańyz, ondaǵy spektáklderdiń deni jergilikti avtorlardyń pesalary. Kárim Baıalıev, Áldıhan Qaldybaev, Bahtıar Ábdildaev, Arǵynbaı Bekbosynov...

Solardyń qatarynda Elen Álimjanovtyń «Bir qazaqqa — bir qatyn», «Taqtalas», «Jantalas» pesalary boıynsha qoıylǵan spektáklderdiń kórermen kóńilinen shyqqany aqıqat. Bul pesalar respýblıkamyzdyń basqa oblystaryndaǵy teatrlarda da tabysty júrip jatyr.

Elen dramatýrgıasy osy zamannyń eń zárý, eń ózekti máselelerine baǵyshtalǵan. Qazaqstan, qazaq eli ejelden beri ańsaǵan armanyna jetken sıaqty. Elimiz erkindik aldy, táýelsiz memleket boldy. Sol táýelsizdik, egemendik baıandy bolý úshin áli aldymyzda talaı-talaı bel-beles asqaq kerek.

Sondaı belestiń biri — qazaq degen ulttyń birligi. «Júzge bólingenniń júzi kúısin»,-dedi uly babamyz Tóle bı. «Birińdi, kazak, biriń dos kórmeseń istiń bári bos», — dedi uly Abaı.

Osy uly ósıetti uǵyndyq pa? Sanamyzǵa synalap jazyp, boıymyzǵa sińirdik pe? Júzshildik, rýshyldyq dertten aryldyq pa? Arylmasaq, aldaǵy bolashaǵymyz ne bolady?

«Taqtalas» dramasynda, mine, osyndaı jalpy halyqtyq orasan suraq tur. Drama keıipkerleri: Qaýǵabaı, Daýǵabaı, Jaýǵabaı. Attary-aq aıtyp tur.

Másele jazýshynyń shyǵarmany tom-tom etip, kópirtip jazýynda emes. Mine, «Taqtalastaı» ómirlik ózekti dúnıeniń júgin kóterip turǵan bir-aq dúnıemen de ádebıet áleminen oryn alýǵa bolady.

Al Elen Álimjanov bolsa, qysqa áńgimelerdiń, povesterdiń sheberi. Taıaýda ǵana oblystyq gazette jarıalanǵan «Komýnızm marshy» atty áńgimesiniń el aýzynan túspeı júrgeni sonyń aıǵaǵy.

O basynda ol jýrnalıs edi. Áli de solaı. Oblystyq radıo jáne teledıdar kompanıasyn basqarady. Munyń qanshama qıyn-qıamet jumys ekenin óz basynan ótkermegen jan bile de bermeıdi.

Elen Álimjanov kóp jyl boıyna respýblıkalyq «Sosıalısik Qazaqstan» (qazirgi «Egemen Qazaqstan») gazetiniń Áýlıe-ata ýálaıaty boıynsha menshikti tilshisi boldy. El sýsaǵan talaı-talaı zárý máselelerdi kóterdi. Oblystyń soltústik: Sarysý, Talas, Moıynkum aýdandary sý tapshylyǵynan azyp-tozyp kete jazdaǵan jyldary Elen osy problemany gazet betinde talmaı kóterdi. Nátıjesinde qazir, qudaıǵa shúkir, Shý, Talas, Asa ózenderiniń sýlary burynǵydaı buǵalyqtala bermeı, shól-shóleıtti, maldy aımaqtarǵa da jetip jatyr.

Jazýshy, dramatýrg, jýrnalıs Elen Álimjanov elýdiń qyrqasyna shyqty. Elý — er-azamattyń jasy. Shyǵarmashylyq shabyttyń laýlaı túsetin shaǵy. Qudiret bergen talantty talmaýratpaı, erinshek bolmaı, boıkúıezdikke aldyrmaı, eńbek etse — Elenniń bereri áli alda.

---