InfoHub Logo

Qarqaralyda bolǵan bir jıynda kereı Er Jánibek sheshenderdi sózden jeńe beripti. Bir aqsaqal:

— Kereıdiń bir shalynan jeńilip qaldyńdar ǵoı. Álgi Tilenshijan qaıda? — depti.

Shaqyrýshy baryp, Tilenshi júrmek bolǵanda, ákesi Bekbolat:

— Ol bir noqtaly qara qaban edi, balam, oqysta shaldyryp alma, baıqap sóıle, — deıdi.

Tilenshi kirip barǵanda, úıdegilerdiń bári oryndarynan turyp qurmet kórsetipti. Jalǵyz-aq Er Jánibek elemegen bolyp teris qarap, jatqan qalpynan qozǵalmapty. Sonda Tilenshi:

— Bul aqsaqaldyń ákesi Berdaýlet on eki abaq kereıdiń jamany edi. Jamannan jaqsy týdy dep jatqan túri me bul? Tóreniń bireýin basyna jastap, bireýine aıaǵyn salyp jatysynyń jamany-aı, — deıdi eki tóre násildi kisiniń elemeı jatqanyn keketip. Sonda Jánibek jumǵan kózin ashyp, qolyn qabaǵynyń ústine qoıyp:

— Bul qaı ul? — deıdi.

— Bul — Tilenshi balańyz, — deıdi bireý.

— «Jamanmen dos bolǵansha, jaqsymen qas bol» dep edi, balam, taýyp aıtty-aý! Meniń kórmegenim joq edi. Men qazaqty kórip edim, qalmaqty da kórip edim. On besimde qyzdy kók buqadaı qýyp edim, jıyrma besimde qolymdy jaý qanymen jýyp edim, otyz besimde úsh júzdiń balasyn qara sózben býyp edim. On eki arys arǵynnyń artyǵy edi Bekbolat; Bekbolattan men týsam qandaı bolar edim? On eki abaq kereıdiń tómeni edi Berdaýlet, Berdaýletten sen týsań qandaı bolar ediń? Men músindeı otyndyq aǵashtan shyqqan oq emes pe edim. Sen jaqsydan jaman týǵan boq emes pe ediń? — deıdi.

Er Jánibek qartaıǵan kezinde: «Bul jer qazaqqa qonys bolmaıdy» dep qarakereı Qabanbaı ekeýi birjaqqa bir kóship, bir qaıtyp, aqyry aýmaı qalady. Sol áýre-sarsańda júrgende bir joly Jánibek Tilenshinikine kelip qonaq bolady. Tilenshi júrerinde Jánibekke:

— Batyr, kóńilge alǵanyńyz bar ma? — deıdi.

— Tilenshijan, súıek jańartyp quda bolsaq qaıtedi? — deıdi.

Teginde Er Jánibektiń naǵashysy qarakesek bolsa kerek.

Sonda Tilenshi:

— Sen japanǵa bitken shynarsyń,
Qazań jetip synarsyń.
oıda-qyrda synǵan soń,
ornyńdy qaıdan tabarmyn?
Men qalyń qara toǵaımyn,
Tabylýǵa ońaımyn! —

dep Jánibektiń artynda ornyn ustaıtyn jóndi juraǵat joqtyǵyn betine basyp, óz tuqymynyń kóptigin aıtyp, baıaǵy esesin qaıtarypty.

Sonda Jánibek: «Kórgen túsime qaraǵanda, men kisiden jeńilsem, ólmek edim, aı, qazam jetken eken, elime jetip óleıin», — dep eline qaıtypty. Sonan kóp keshikpeı qaıtys bolypty.

---