InfoHub Logo

Sabaq aldynda

- Bilim degendi shartty túrde zat dep alaıyqshy, - dedi metodıst eńbek jolyn endi ǵana bastap jatqan jas ustaz muǵalıma qyzǵa qarap. - Iá, kádimgi zat dep alaıyq. Buryn qalaı boldy? Sol zatty muǵalim balalardyń kózine kórsetip, ol jóninde barlyǵyn da ózi aıtyp beretin. Endi biz olaı etpeımiz. Zat alaqanda jasyrýly kúıinde turýy tıis. Ony bala izdenip, ózi tabatyn bolsyn. Men ózge elderdiń bilim júıesimen tanysyp qaıttym. Sonyń ishinde evreılerde de boldym. Sabaǵyńyzdy abyrjymaı júrgize berińiz. Men sizdiń sabaǵyńyzǵa qatysyp, sizge baǵyt-baǵdar berip otyramyn. İske sát!

Sabaqta
Muǵalıma. Sonymen, balalar, apaıdyń, alaqanynda ne jasyrýly tur eken? Qane, bárimiz birge tabamyz? Apaıdyń alaqanynda ne jasyrýly tur?

Metodıst (sybyrlaǵandaı etip). Kórdińiz be? Salǵan jerden "bilmeımin" deýlerin kórdińiz be? Evreıdiń balasy bolsa, olaı etpes edi. İzdendire berińiz. Talpyndyra berińiz. Ózińizge tarta berińiz.

Muǵalıma. Balalar-aý, bularyń qalaı? Salǵan jerden bilmeımin deýge bolady ma? "Bolmasań da uqsap baq, bir ǵalymdy kórseńiz..."

Metodıst. Abaıdan durys qozǵadyńyz. Talpyndyra berińiz. Anaý shettegi balany kórdińiz be? Óz-ózimen oqshaý qalǵan. Janyna jaqyndańyzshy. Jeke jumys júrgizińiz.

Muǵalıma. Dıas! Nege sabaqqa enjarmyz? Qane, apaıdyń alaqanynda ne jasyrýly tur eken?

Metodıst. Birden-aq moınyn ishine tyǵýyn kórdiń be? Ábden basylyp qalǵan. Óz-ózine senimi azaıǵan. Senimin oıatyńyz.

Muǵalıma. Dıas! Munyń qalaı?! Osylaı etýge de bolady ma? Balalar! Tyryssa, Dıas ta taba alady emes pe? Solaı ma?

Balalar. Árıne, taba alady! Ol da biz sıaqty bala emes pe?!

Metodıst. Joldastarynyń senimin durys oıattyńyz. Talpyndyra berińiz. Synyppen jumys jasańyz.

Muǵalıma. Balalar-aý, sonymen apaıdyń alaqanynda ne jasyrýly tur eken? Qane, tabamyz.

Metodıst. Baǵyt-baǵdar berińiz. Balalardyń izdenýlerine baǵyt-baǵdar berińiz. Siz synypta baǵyt-baǵdar berýshi tulǵasyz.

Muǵalıma. Balalar, bizdiń ýaqytymyz aıaqtalyp ta qaldy ǵoı. Sonymen taba almadyq pa? Apaıdyń alaqanynda kádimgi óshirgish jasyrýly turdy emes pe? Qıyn ba eken? Tabýǵa bolady ma eken? Men senderge baǵyt-baǵdar berdim ǵoı. Al sender ózge jaýap aıtasyńdar. Evreıdiń balasy bolsa, olaı etpes edi. Jaraıdy, balalar! Senderge úıge tapsyrma: "Apaı kelesi sabaqta alaqanyna ne jasyrýy múmkin?" Osy taqyryp tóńireginde óz betimizshe oılanyp, izdenip júremiz.

Balalar. Saý bolyńyz, apaı!

Muǵalıma. Saý bolyńdar, botaqandarym meniń!
 

Sabaqtan keıin
Metodıst. Jaqsy, jaqsy! Eń bastysy, balalarda talpynys bar. Bizdiń balalar azdap qýlyq jasaǵysy keledi. Olar ornynan túregelip, saýsaq arasynan syǵalap kórmek. Evreıdiń balasy bolsa, olaı etpes edi. Olar qaıdan bilsin, muǵalimder daıyndaıtyn oqý ornynda endi saýsaqtarmen arnaıy jattyǵý jumystary júrgiziletindigin. Endigi jerde muǵalimdik mamandyqqa saýsaǵy jymdasyp turatyn ul-qyzdar ǵana alynady. Sonymen kelesi sabaqta alaqanǵa ne jasyratyn boldyńyz? Tıyn deısiz be?! Aıta kórmeńiz tıyn týraly. Onsyz da keı adamdardyń sanasyn aqsha bılep alǵan zamanǵa kez bolyp otyrmyz. Basqa bir tálim-tárbıelik máni bar dúnıe týraly oılanyńyz. Kórdińiz be, sizdiń ózińizge de áli de izdene túsý kerek. Bilim ár ýaqytta izgilikke baǵyttalyp otyrýy tıis. Tıyn týraly oılaryńyzdy ekonomıkalyq
tárbıe berý maqsatyndaǵy synyp saǵatyńyzda paıdalanyńyz. Únem jáne adal eńbek. Ushtastyryńyz. Bizde qalaı? "Julymyr-aý, keshe ǵana emes pe oqý quraldaryńdy túgeldep bergenim. Kishkene únemshil, uqyptylaý bolsań qaıtedi?! Ol balanyń sheshesin maǵan nesine aıtasyń?! Men sol balanyń sheshesindeı bolyp júrmin be?! Qojaıynnyń qabaǵyna qarap, tikemnen tik turyp, neshe saǵat jumys isteımin. Sonyń bári sen úshin emes pe?! Anańdy da kishkene aıasań netti?!" Bul jóninde tárbıe salasynyń mamandarymen oılasyp kórińiz. Ázirge saý bolyńyz.
Sizden bolashaqta jaqsy ustaz shyǵady. Evreıler bir-birine ámanda osylaı dep aıtady. Sizden birdeńe shyǵady deıdi.

Muǵalıma. Saý bolyńyz.

Synyp ishinde

Oqýshy qyz. Túý, jańa óshirgish dep aıtqym kelip turdy-aý!

Balalar. Aıtpadyń ba endi?!

Oqýshy qyz. Qoıshy! Jaýabym taǵy da durys bolmaı qalatyn shyǵar dep qorqasoqtap turdym. Bizde qalaı? Jaýabyń durys bolmaı qalsa boldy, jatqan bir kúlki. Evreıdiń balasy bolsa, olaı etpes edi.

---