InfoHub Logo

Qazaqtyń tuńǵysh ǵaryshkeri, Halyq Qaharmany Toqtar Áýbákirov ǵaryshqa qatysty keń taraǵan keıbir ańyz áńgimelerdiń shyndyqqa janaspaıtynyn aıtty. Onyń sózinshe, álemge belgili amerıkalyq astronavt Nıl Armstrongtyń ǵaryshtan azan daýysyn estidi degen áńgimesi – negizsiz taraǵan aqparat.

Bul týraly Infohub.kz aqparat agenttigi habarlaıdy.

Ǵaryshkerdiń aıtýynsha, ol Nıl Armstrongpen jeke kezdesip, osy másele jóninde sóılesken. Sol kezde Armstrong bul áńgimeniń qalaı taraǵanyn ózi túsindirgen.

Armstrong azandy estimegenin rastady

«Men Nıl Armstrongpen kezdeskenmin. Onyń ǵaryshtan azannyń daýysyn estipti degen áńgimesi shyndyq emes. Bir jýrnalıs solaı jazyp jibergen, keıin bári sony qaıtalaı bergen. Sodan keıin ańyz bolyp tarap ketti», – degen eken amerıkalyq astronavt.

Toqtar Áýbákirovtiń aıtýynsha, Armstrong áńgime barysynda taǵy bir jaıtty aıtqan. Onyń bir áriptesi musylmandyqty qabyldaǵanymen, Aıdan eshqandaı erekshe dybys nemese azan estilmegenin jetkizgen.

«Ol maǵan: «Iá, meniń bir joldasym musylmandyqty qabyldady. Biraq Aıdan biz eshteńeni, eshkimniń daýysyn estigen joqpyz», – dep ashyq aıtty», – deıdi Áýbákirov.

Ǵaryshkerdiń jumbaq kórinisi

Sonymen qatar qazaq ǵaryshkeri adamzattan ózge órkenıetter bolýy múmkin degen oıdy da joqqa shyǵarmaıdy. Onyń aıtýynsha, ómirinde túsindire almaıtyn erekshe qubylystyń kýási bolǵan.

«Tańǵy alty shamasynda dalada júrgenmin. Aspanda óte jaryq juldyz sıaqty núkte kórindi. Qys mezgili edi. Bir kezde sol jaryq qozǵalyp, dál tóbeme keldi. Bireýge aıtsań senbeıdi, ertegi sıaqty kórinedi. Sodan júgirip baryp, qasymdaǵy tórt jigitti oıattym. Úsheýi syrtqa shyqty. Sol kezde álgi tabaqsha bizge jaqyndap keldi de, bir mezette zý etip joǵalyp ketti», – dep eske alady ǵaryshker.

Onyń aıtýynsha, bul oqıǵa áli kúnge deıin ózine jumbaq kúıinde qalyp otyr. Tipti sol kezde birge kórgen úsh azamat kóp uzamaı jastaı ómirden ótken.

«Bul jaıt meni áli kúnge deıin oılandyrady. Naqty jaýabyn tapqan joqpyn. Sol kezde qasymda bolǵan úsh jigit te keıin erte qaıtys boldy. Munyń ózi de bir túsiniksiz jaǵdaı», – deıdi Toqtar Áýbákirov.

Toqtar Áýbákirov týraly

Toqtar Ońǵarbaıuly Áýbákirov – qazaqtyń tuńǵysh ǵaryshkeri. Ol 1991 jyly 2 qazanda "Soıýz TM-13" ǵarysh kemesimen ǵaryshqa ushyp, orbıtada shamamen 8 táýlikke jýyq ýaqyt ǵylymı zertteýler júrgizdi. Áýbákirov – Keńes Odaǵynyń sońǵy, 72-ǵaryshkeri ári táýelsiz Qazaqstan tarıhyndaǵy alǵashqy ǵaryshker.

Áskerı ushqysh-synaqshy retinde ol 50-den astam áskerı ushaq túrin meńgerip, avıasıa salasynda erekshe erlik kórsetken. Osy eńbegi úshin Keńes Odaǵynyń Batyry ataǵyn alǵan. Táýelsiz Qazaqstanda oǵan "Halyq qaharmany" ataǵy berildi.

Ǵaryshker tek avıasıa salasynda ǵana emes, memleket basqarý isinde de qyzmet atqardy. Ol Qazaqstan Respýblıkasy Joǵarǵy Keńesiniń jáne keıin Parlament Májilisiniń depýtaty bolyp, eldiń qorǵanys jáne qaýipsizdik máselelerimen aınalysty.