InfoHub Logo

Gaza aımaǵynda HAMAS-tyń ústemdigine qarsy baǵyttalǵan jańa qozǵalys qalyptasyp jatyr. Ózin «Halyqtyq kúsh» dep ataıtyn bul qarýly toptyń basynda 30 jastaǵy Iasır Abý Shabab tur. Onyń aıtýynsha, toptyń basty maqsaty — gýmanıtarlyq kómektiń ádiletti bólinýin qamtamasyz etý.

Rafah mańyndaǵy toptasqan jasaqtar sońǵy kúnderi gýmanıtarlyq júkterdi kúzetip, olardyń turǵyndarǵa jetýin qamtamasyz etýge tyrysýda. Alaıda bul áreketter HAMAS tarapynan qatań qarsylyqqa tap bolyp otyr. «Halyqtyq kúshtiń» málimetine qaraǵanda, HAMAS olardyń jasaqtaryna shabýyl jasap, 50-ge jýyq eriktiniń ómirin qıdy, olardyń arasynda Abý Shababtyń jaqyn týystary da bar.

Aın Rabın, top ókilderiniń biri, Euronews agenttigine bergen suhbatynda bylaı dedi:

«Biz qarýly jasaq emespiz, biz erikti azamattarmyz. Bizdiń maqsaty­myz — gýmanıtarlyq kómekti urlaýǵa jol bermeý. HAMAS bizdiń áreketimizdi óz bıligine tóngen qaýip retinde qabyldap otyr».

Iasır Abý Shababtyń ózi, Makan radıosyna bergen suhbatynda, «Halyqtyq kúsh» jasaǵy keıbir operasıalardy Izraıl áskerimen kelisip júrgizetinin rastady. Alaıda onyń aıtýynsha, bul tek aqparat almasý deńgeıinde shekteledi:

«Biz qandaı da bir aımaqqa kiretinimiz jaıly habarlap otyramyz, biraq áskerı operasıany ózimiz atqaramyz. SAHAL oǵan tikeleı qatyspaıdy».

Abý Shabab Gaza halqyna úndeý tastap, HAMAS-ty ozbyrlyqpen bılik júrgizip otyrǵan uıym dep sıpattady jáne qajet bolsa, azamattyq qaqtyǵysqa da barýǵa daıyn ekendigin jasyrmady.

Sarapshylardyń aıtýynsha, onyń ashyq medıaǵa shyǵýy — bul toptyń endi tek jergilikti áreket etýshi jasaq emes, saıası yqpaly bar qurylymǵa aınala bastaǵanyn kórsetedi.

Al HAMAS «Halyqtyq kúshti»» satqyndar toby retinde sıpattap, ony tolyq joıýǵa baǵyttalǵan operasıalar júrgizip jatyr. Gaza turǵyndarynyń pikiri ekige bólindi: biri bul topty «satqyn» dese, endi bir bóligi olardy HAMAS-tan qutqarýshy retinde qoldaıdy.