InfoHub Logo

Sońǵy 3 jylda ǵylymǵa 100 mlrd teńge bólindi. Aldaǵy ýaqytta bul ustanymnan aınymaı, ǵylymnyń qarqyndy damı berýine jaǵdaı jasaı beretin bolamyz, dedi Qazaqstan Prezıdenti Nursultan Nazarbaev QR Ulttyq ǵylym akademıasynyń 70 jyldyq mereıtoıyna arnalǵan QR UǴA-nyń Jalpy jınalysynyń saltanatty sesıasynda.

«Búgingi mereıli sátte biz Qanysh Sátbaev, Muhtar Áýezov, Álkeı Marǵulan syndy ǵulamalarymyzdy atap ótýimiz qajet. Táýelsizdik jyldarynda UǴA aldyńǵy býynnyń abyroıly isin jalǵastyra bildi. 25 jylda ǵylymı uıymdardyń sany 2 esege kóbeıip, 300-den asty.  Ǵylymdy qarjylandyrý jyl ótken saıyn artyp keledi. Sońǵy 3 jylda ǵana 100 mlrd teńge bólindi. Aldaǵy ýaqytta bul ustanymnan aınymaı, ǵylymnyń qarqyndy damı berýine jaǵdaıdy jasaıtyn bolamyz. Álemniń damyǵan 30 eline qosylý jolynda sizderge (ǵalymdar - red) zor úmit artylady. Osy aldymyzǵa qoıǵan maqsatymyzǵa jetý úshin men Qazaqstannyń 3-shi jańǵyrýy týraly Joldaýymda 5 basymdyqty aıqyndap berdim. 21 ǵasyr - ǵylym men bilimniń ǵasyry. Ásirese, qoldanbaly ǵylymnyń kóz ilespes jyldamdyqpen damyp jatqanyn kórip otyrmyz. Ǵalymdarymyz da jańa kókjıekterge kóz tigip, zerttelmegen keńistikterdi ıgerýi tıis. Biz álemdik jańa tehnologıalardy ıgerip ózimizge beıimdeýimiz kerek. Men akademıktermen kezdesýimde dúnıede bolmaǵandy ashý naǵyz revolúsıa bolar edi, biraq dúnıede bar nárseni Qazaqstanǵa ákelip beıimdeý, ol da ǵylym dep aıtqan bolatynmyn. Ǵalymdarymyz osy iske belsendi atsalyýsy qajet. Sondyqtan, dáýir suranystaryna saı, olar ǵylymı kózqarastaryn qaıta qaraýy kerek. Biz ónerkásiptik ǵylymnyń qajettigin eskere otyryp, gýmanıtarlyq salaǵa da umtylýymyz kerek», - dedi Elbasy.

Aıta keteıik, búgin, 22 aqpan Abaı atyndaǵy Qazaq memlekettik akademıalyq opera jáne balet teatry ǵımaratynda QR Prezıdenti, QR UǴA akademıgi Nursultan Nazarbaevtyń qatysýymen QR UǴA-nyń 70 jyldyq mereıtoıyna arnalǵan QR UǴA-nyń Jalpy jınalysynyń saltanatty sesıasy ótti.

Sesıa jumysyna akademıkter, korespondent-músheleri, QR UǴA-nyń qurmetti músheleri, JOO rektorlary, ǴZI dırektorlary, eldiń kórnekti qoǵamdyq jáne mádenıet qaıratkerleri, sheteldik qonaqtar  ǵylym akademıalary prezıdentteri Reseı Federasıasynan Fortov V.E., Qyrǵyzstannan Erkebaev A.E., Grýzıadan Kvesıtadze G.I., Moldovadan Dýka G.G., Tatarstannan Salahov M.H., Belarýs UǴA Prezıdıýmy Tóraǵasynyń orynbasary  Kılın S.Ia., Ýkraına UǴA Vıse-prezıdenti  Koshechko V.G., Ózbekstan ǴA jalpy jáne beıorganıkalyq hımıa Instıtýtynyń dırektory  Zakırov B.S., Ázirbaıjan UǴA Tóralqa ákimshiliginiń Ǵylym jáne bilim berý basqarmasynyń bastyǵy  Sadygov A., Tájikstan Respýblıkasy ǴA akademıgi M.Ilolov «Elsevier» basqarma tóraǵasy jáne strategıalyq damý jetekshisi, «Relax group» dırektorlar keńesiniń múshesi Iong Sýk Chı, QHR-nyń Almaty qalasy Bas konsýly Chjan Veı qatysty.

---