InfoHub Logo

Nursultan Nazarbaev Qazaqstan Respýblıkasy Ulttyq ǵylym akademıasynyń jalpy jınalysynyń saltanatty sesıasyna qatysty, dep habarlaıdy Aqordanyń baspasóz qyzmeti.

Memleket basshysy sesıaǵa qatysýshylardy Ulttyq ǵylym akademıasynyń 70 jyldyǵymen quttyqtap, onyń zamanaýı Qazaqstandy damytýǵa qosqan úlesin atap ótti.

- Búginde Ǵylym akademıasy salalyq jáne óńirlik bólimsheleri bar iri zıatkerlik ortalyqqa aınaldy. Bul rette ol Fransıa, AQSH jáne basqa da elderdegi ǵylym akademıalary sıaqty ǵylym úshin jat nársemen - ákimshilendirýmen aınalyspaıdy. Ǵylym salasyn ortalyqtandyrýdyń, onda qalyptasatyn monopolıanyń tıimsiz ekenin álemdik tájirıbe kórsetip otyr, - dedi Qazaqstan Prezıdenti.

Nursultan Nazarbaev Qazaqstan ǵylymynyń qalyptasýyndaǵy Akademıanyń eńbegin erekshe atap ótip, elimizdiń ǵylymı áleýetin «Qazaqstannyń úshinshi jańǵyrýy: jahandyq básekege qabilettilik» atty joldaýdy iske asyrýǵa paıdalanýdyń mańyzdylyǵyna nazar aýdardy.

Sonymen birge, Elbasy otandyq basqarý júıesi men ǵylymı qyzmetti úılestirýge qatysty birneshe ózekti máselege toqtaldy.

- Biz ǵylymdy ortalyqsyzdandyrdyq. Kóptegen bóligin joǵary oqý oryndaryna berdik, alaıda olardyń bári áli ınovasıalyq ortalyqtarǵa aınala qoıǵan joq. Qazaqstannyń ǵalymdary óz jumystaryn belsendi túrde patentteýde. Biraq olardyń basym kópshiligine suranys joq. Ǵylym negizinen memleket esebinen qarjylandyrylýda. İs júzinde naqty sektordan tapsyrys túspeı jatyr. Sonymen qatar, ǵylymı jumystarda plagıat jıi kezdesedi, - dedi Memleket basshysy.

Osyǵan oraı Qazaqstan Prezıdenti otandyq ǵylymdy damytýǵa qatysty ustanymdardy túbegeıli ózgertýdi tapsyryp, osy baǵytta birqatar naqty mindetter belgiledi.

- Biz ǵylymı jáne ǵylymı-tehnıkalyq qyzmet nátıjelerin komersıalandyrý týraly zań qabyldadyq. Endi osy zań tolyqqandy qoldanylýy qajet. Ǵylymı-zertteýshilik qyzmet nátıjelerin qazaqstandyq kásiporyndardyń qajettilikterine baǵyttaıtyn tetikter engizý kerek. Bizdiń aldymyzda ımportty almastyrý jáne eksporttyq óndiristi damytý mindeti tur, - dedi Nursultan Nazarbaev.

Budan bólek, Qazaqstan Prezıdenti akademıanyń áleýetin paıdalana otyryp fýndamentaldy jáne gýmanıtarlyq ǵylymı jobalar saraptamasynyń sapasyn jaqsartý qajettigin aıtty.

- Ǵylymdy basqarýdyń, ony qarjylandyrýdyń jańa format boıynsha jáne ýaqtyly júzege asyrylatyn jańa júıesi engizildi. Sondaı-aq, Ǵylym akademıasy janynan ádep jónindegi alqaly organ qurýdy usynamyn. Ol Ǵalym kodeksin jáne Jarıalanymdar ádebi jónindegi kodeksti ázirlep shyǵa alar edi, - dedi Nursultan Nazarbaev.

Memleket basshysy Bilim jáne ǵylym mınıstrligine Akademıamen jáne joǵary oqý oryndarymen birge otandyq ǵylymı basylymdardy halyqaralyq reıtıńtik bazalarda ilgeriletý jumystaryn júzege asyrýdy tapsyrdy.

Sondaı-aq, Qazaqstan Prezıdenti álemdik deńgeıdegi ǵylymı ortalyqtarda taǵylymdamadan ótý úshin úzdik zertteýshilerge qosymsha granttar taǵaıyndaý, sonymen birge Ortalyq Azıa elderiniń jas ǵalymdaryna Qazaqstanda ǵylymı zertteý júrgizý úshin grant bólý máselesin zerdeleý jóninde tapsyrma berdi.

---