InfoHub Logo

Jelide vıdeo jarıalaǵan Kárim Másimovtiń burynǵy kúıeý balasy Azamat Kapenov ózine taǵylǵan aıyptar men Qazaqstan temir jolyndaǵy (QTJ) qyzmeti týraly aıtyp berdi.

Bul týraly Infohub.kz aqparat agenttigi habarlaıdy.

Kapenovtiń aıtýynsha, ol 2001 jyly Qazaqstan azamattyǵyn alǵan jáne 2003 jyldan 2015 jylǵa deıin QTJ-da basshylyq qyzmetter atqarǵan. 2015 jyly Reseıge turaqty turýǵa kóshýine baılanysty azamattyǵynan aıyrylǵanyn aıtyp, keıinirek elshilik bergen Qazaqstan azamattyǵynan shyǵý týraly qujatty kórsetetinin málimdedi.

Qos azamattyq jáne zań talaptary

Oqyrmandardyń qos azamattyq máselesine qatysty suraqtaryna jaýap bergen Kapenov, buryn munyń zańǵa qaıshy ekenin bilmegenin moıyndady. Ol sońǵy kezderi qos azamattyq týraly aqparattardyń sıfrlandyrylyp, qataıtylǵanyn atap ótti.

Dıkıı Armanmen qarym-qatynas

Sondaı-aq, Kapenov uıymdasqan qylmystyq top qurǵany úshin sottalǵan Arman Jumageldıevpen (Dıkıı Arman) aradaǵy qarym-qatynasy jaıly suraqqa da jaýap berdi. Ol Jumageldıevti baýyr jáne dos retinde sanaıtynyn aıtty.

İzdeý men sot isi

Kapenov óziniń eshkimnen qashpaǵanyn alǵa tartyp, qylmystyq isti sotqa jiberý úshin tergeýdi bastaýdy talap etti. Ol áleýmettik jeli arqyly Qyrǵyzstanda ekenin jetkizip, izdeýdi toqtatýǵa shaqyrdy. Oǵan «bopsalaý jáne reıderlik» aıyptary taǵylýda.

Kárim Másimovtiń senimdi ókili me?

Jeli qoldanýshylary Kapenovti burynǵy premer-mınıstr Kárim Másimovtiń senimdi ókili boldy degen suraq qoıǵanda, ol muny joqqa shyǵardy.

Kapenov jaqynda bul istiń mán-jaıyn tolyq jarıa etetinin aıtyp, kópshilikten sabyr saqtaýdy surady. Eske sala keteıik, buǵan deıin Kapenovke Qazaqstanda syrttaı qamaýǵa alý sharasy sanksıalanǵan bolatyn. Oǵan QTJ vıse-prezıdenti qyzmetinde júrgende ózine qatysy bar kompanıalarǵa zańsyz artyqshylyqtar jasap, memleketke 5,2 mlrd teńgeden astam shyǵyn keltirdi degen aıyp taǵylǵan.