InfoHub Logo

- Balam "týǵan kúnimdi jasa, mama" dedi, - deıdi kelinshek. - Jasasam, jasaıyn, balamnyń týǵan kúnin sebepshi etip, úıge qajetti adamdardy shaqyryp jibere qoıaıynshy deımin. Shaqyratyn adamdardyń tizimin jasaımyn kelip. Bári de kerekti adamdar. İshinde kerekti emes biri de joq. Biraq balam tizimdi kórip teris aınaldy.
- Mynanyń ishinde men tanıtyn bireýi de joq qoı, - deıdi balam qıtyǵyp.
- Áı, sen tanymasań, men tanımyn ǵoı! Bári de mamańnyń tirshiligine kerekti adamdar.
- Biraq týǵan kún meniń týǵan kúnim ǵoı, - deıdi balam da qasarysyp kónbeı. - Roza táteni de shaqyrasyń.
- Ne isteısiń ol áıeldi?! Óń deıtin óńi de joq, tús deıtin túsi de joq. Ústine kıgeni de arzanqol birdeńe.
- Biraq ol jaqsy adam ǵoı, - deıdi ulym da kónbeı.
- Al, jaraıdy! Roza táteńdi de shaqyraıyn. Biraq Roza táteń qadirli qonaqtardyń ústine kirmeı-aq qoısyn, jaraı ma?! Óziń Roza táteńmen bólek otyrasyń ba?
- Iáá! - deıdi balam kózi jaınap.
Tizimge únilemin kelip. "Jaqsy adamdardan eshkim qalyp qoıǵan joq pa?"
- Aıtqalı aǵany da shaqyrasyń, - deıdi balam.
- Ony ne isteısiń?! Ol bir júrgen qarapaıym adam. Saǵan jóni túzý syılyq ta ákele almaıtyn shyǵar.
- Maǵan syılyǵynyń keregi joq! - deıdi balam da qasarysyp kónbeı. - Týǵan kúnimde Aıtqalı aǵanyń bolǵanyn qalaımyn. Óıtkeni ol jaqsy adam.
- Sharshattyń-aý ábden! Ákeń de osyndaı qıtyqpa minezdi edi. Neniń durys, neniń burys ekendigin úırete almaı-aq qoıyp edim. Sol minezinen birdeńe tapsa, júr ǵoı endi! Bolshy, aıtshy, jasaıyn ba, jasamaıyn ba?! Onsyz da meniń jumysym basymnan asady.
- Jasaısyń! - deıdi balam. - Biraq Aıtqalı aǵany da shaqyrasyń. Jylyna bir keletin týǵan kúnimde, tym bolmasa, meniń de bir ret aıtqanym bolý kerek shyǵar. Onsyz da seniń aıtqanyńmen júrip kelemin ǵoı. Meni onsyz da ol kisilerge jolata bermeısiń.
- Al, jaqsy! Aıtqalı aǵańdy da shaqyraıyn. Biraq ol kisi táýir kıingen jaqsy adamdardyń ústine kirmeı-aq qoısyn, jaraı ma?! Aıtqalı aǵamen óziń sóılesip otyrasyń ba?
- Iáá! - deıdi balam kózi jaınap.
"Áı, aqymaq ulym, sol, neniń jaqsy, neniń jaman ekendigin sen qaıdan bileıin dep ediń? Ony úlkender biledi de. Balanyń kózqarasyn qalyptastyryp otyratyn úlkender emes pe".
Tizimge úńilemin kelip. Qala basshysynan basqasynyń bári túgel sekildi. Tanysam, ol kisini de shaqyryp jiberer edim.

---