InfoHub Logo

«Basyńa is tússe, jaqsy kómek etedi, jaman kúlip ketedi» demekshi, pende ataýly qıyndyqqa tap bolyp, basyna  is túskende ózgelerden kómek kútedi. Hali múshkil jandarǵa qoldan kelgenshe qaıyrymdylyq jasap, baryńmen bólisý- ımandylyqtyń belgisi. Mundaı qasıetterdi boıǵa jıǵan  aq peıildi adamdar aınalamyzda az emes. Solardyń biri - búginde talaı jandy qýanyshqa keneltip, alǵysyn alyp júrgen- «Qaıyrymdy jandar» eriktiler toby.

Kómekke muqtaj, múmkindigi shekteýli jandarǵa barynsha járdemdesýdi maqsat etken «Qaıyrymdy jandar» eriktiler toby 2015 jyly 22-jeltoqsanda qurylǵan. Aıdyn Toqsanbaevanyń bastamasymen uıymdastyrylǵan  bul top alǵash Almaty qalasynan bastaý alyp, ýaqyt óte kele Astana, Shymkent, Aqtaý, Taraz, Aqtóbe, jáne t.b.elimizdiń iri qalalary men aýdandarynda quryla bastady. Almatydaǵy «Qaıyrymdy jandar» eriktiler tobynyń 80 % -y 18-25 aralyǵyndaǵy jastar bolyp sanalady. Bul toptyń quramynda búginde 300- ge jýyq adam bar.
Búginge deıin meıirimdi jandar kóptegen qaıyrymdylyq sharalaryn uıymdastyryp, talaı kómekke zárý  adamdarǵa qol ushyn sozǵan. Sonyń ishinde,  2015 jyly eki búıregi isten shyqqan almatylyq  Janel Jaılaýovanyń emine 12 mln teńge jınap berýleri-  toptyń eń iri sharasy. Ózderiniń aıtýynsha, bul aqshany jınaý olarǵa ońaı soqpaǵan, tipti bazardaǵy almalardy  2-3 ese baǵamen kóshelerde  satqan eken. Meshitterge baryp, ózderiniń pisirgenderimen  jármeńkeler uıymdastyrǵan. Bul iske tek Almatydaǵy ǵana emes, ózge de qalalardaǵy toptar, sonymen birge, keıbir kásipkerler de barynsha atsalysty. Qarshadaı qyzdyń  ómirge degen umtylysy olarǵa senim berip, odan ári qulshyndyra túsken. Aqyry eńbekteri aqtalyp, Janeldiń emine qajet somany túgeldeı jınap beredi.

Almatylyq «Qaıyrymdy jandar» bıylǵy jyldyń mamyr aıynda Jumabek Hafıza esimdi naýqas búldirshinniń Vengrıadaǵy reabılıtasıasy úshin qala ortalyǵy men meshitterde «Jaqsylyq jasap jarysaıyq!» atty jármeńke uıymdastyrdy. Bunyń nátıjesinde 233 myń teńge jınalyp, Hafıza men  taǵy bir Temirlan atty sábıdiń emine bólinip berilgen bolatyn. Al naýryz aıynda ótken «Óner qyrandary» teatrynyń konsertindegi qaıyrymdylyq jáshigine 760 myń teńge qarajat jınaldy. Oǵan qosa, QMDB  qoldaýymen «Báıken ata» meshitinde 200-den astam eriktiler ózderi daıyndaǵan túrli taǵamdardy satyp, odan da edáýir paıda tapqan.  

Osy tárizdi aýqymdy sharalardan bólek, keń peıildi jandar úısiz- kúısizderdi tamaqtandyrý, balalar úıindegi búldirshinder men qarttar úıindegi ata- ájelerdi qydyrtyp, kóńilderin kóterý tárizdi kóptegen ıgilikti ister uıymdastyryp júr. Máselen, jeltoqsan aıynda úısiz-kúısizderge  jyly kıimder men ystyq taǵamdar taratyp, olarǵa az da bolsa, qýanysh syılady. Osyndaı izgi bastamadan «Almaty doneriniń» de qur qalmaı, 50 donerdi tegin berýi- asa qýantarlyq jaıt.

Jaqsylyq jasaýǵa árdaıym daıyn turatyn «Qaıyrymdy jandar» bir jyl boıy ár beısenbi kúni qarttar úıine baryp tursa, top músheleriniń  týǵan kúnderin balalar úıinde atap ótedi. Osy jyldyń 14- sáýirinde Aqsaı aýrýhanasynda jatqan sábılerge «Naýryz» meıramyn qyzyqty túrde ótkizip berdi. Sonymen qatar, jyl saıyn qyrkúıekte 60-qa jýyq muqtaj januıalardyń balalaryn mektep kıimderimen, oqý qural- jabdyqtarymen qamtamasyz etip keledi.

Sondaı-aq, maýsym aıynyń 10- juldyzynda Arbat alańynda eki kezeńnen turatyn qaıyrymdylyq  sharasy ótip, odan jınalǵan qarajat ottegi apparatyna muqtaj Erlanov Temirlanǵa berildi.

Mine, aınalamyzda kómekke zárý jandarǵa materıaldyq, rýhanı turǵydan  qoldaý bildirip, izgilikke toly saýapty istermen aınalysyp júrgen osyndaı  jaısań jandardyń bar ekenin bile bermeımiz. Joǵaryda aıtylǵandar almatylyq «Qaıyrymdy jandar» jasaǵan  ıgilikti sharalardyń tek bir bóligi ǵana. Bar-joǵy úsh jyldyń ishinde  birneshe jannyń ómirin saqtap qalyp, talaı otbasyny baqytqa bólegen meıirimdi eriktilerdiń aldaǵy ýaqyttarda budan da keń kólemdegi qaıyrymdylyq jqmystaryn atqaratyny sózsiz.

---