InfoHub Logo

Aınagúldiń keıde kisige shálkes keletin de minezi bar edi. Birde kópshilikpen birge dastarqan basynda otyrǵanda beıtanys bir jigittiń "kisige jaqsylyq jasaý ońaı emes" degen sózine Aınagúl "onyń nesi qıyn eken, ózińde bar bop tursa, nege jasamasqa? dep dúrse qoıa bergeni. Jigit úndegen joq.

Aınagúl birde bazarǵa barǵanda bazardaǵy qaıyrshyǵa jıyrma teńge aqsha berdi. Osyǵan bir túrli kóńili kóterilip qalǵandaı edi. Ózin kisige jaqsylyq jasaǵandaı sezindi. Sol kóńil-kúımen zattaryn alyp, avtobýsyna otyrdy. Biraq avtobýsqa mingennen keıin "álgige nege on teńge bere salmadym" dep kóńil-kúıiniń buzylǵany. Osy oıdy oılaýy muń eken, mazasy ketti. Aınagúl endi álginde ǵana qaıyrshyǵa aqsha berip jatqan sátin kóz aldyna elestetti. Elestetip otyryp, "sol jerde menen basqa eshkim de berip jatqan joq"
dep júregi odan ári maı ishkendeı kilkidi.

Aınagúldiń janynda ádemishe júzdi bir apaı otyr edi. Sol kisi Aınagúlge qarap:

- Sińlim, mazań ketip otyr ǵoı? Ne jaǵdaı? - dep surady.

Aınagúl bolǵan jaıdy aıtyp berdi.

- O, neǵylǵanyń, shyraǵym? Sóıtýge de bola ma?

Myna sózden keıin Aınagúldiń júregi odan ári kóterilip ketti.

- Toqtańyzshy! Toqtańyz! Túsip qalaıyn!

Aınagúl sómkelerin kótergen kúıi aıaldamaǵa toqtaǵan avtobýstan asyǵys-úsigis tústi de, aıaldamanyń oryndyǵyna sylq etip otyra ketti.

- Qaryndas, bir jerińiz aýyryp otyr ma?

Aınagúldiń kózi aldymen jaltyraǵan er adamnyń aıaq kıimine tústi. Sonan soń sándi kıingen bir er kisiniń ózine qarap turǵanyn kórdi.

- Baryńyzshy ári! - dedi Aınagúl shytynyp.

- Aý, aıtsańyzshy, kómek kerek bolsa...

- Sharýańyz bolmasyn mende!

Aınagúl sómkelerin kótergen kúıi aıaldamadan ári qaraı uzaı berdi.

"Eregiskende úıge deıin jaıaý baramyn, sol jıyrma teńgeniń aqysyna".

- Aınagúlmisiń?! Shyraǵym-aý, túriń ne bop ketken?!

Aınagúl basyn kóterip qaraǵanda ózimen kórshi turatyn apaıdy kórdi. Aınagúl kórshi apaıǵa bazardaǵy oqıǵany baıandap berdi.

- O, sory qaınaǵan!.. Únemi shashylasyń da júresiń ǵoı óstip!

Mynany estigende Aınagúldiń býyn-býyny bosap, kórshi apaıdy qushaqtaǵan kúıi botadaı bozdap qoıa berdi...

Aınagúl birde kópshilik jınalǵan dastarqan basynda álgi daýysty taǵy da estidi:

- Adamǵa jaqsylyq jasaý ońaı emes.

Júzin buryp qaraǵanda ótkendegi jigitti kórdi. Aınagúl bul joly tyrs etip úndegen joq.

---