InfoHub Logo

(Joıqyn muhıttyń jutqynshaǵy búlkildep, qaltyldaǵan kemeni jutarda kim tastaı qashýshy edi saparlastaryn?! Qapyryq bólmege jaryq sham yzǵarly sáýlesin shashqanda da qýys-qýysqa tyǵylatyn taraqan edi ǵoı. Al, biz... Biz bárimiz tozaq kemesimen attanyp baramyz — bir baǵytqa ǵana bılet satylǵan — jeter, shaldyǵa jetip, salyǵyp uıqyǵa keter, bálkim, salyqqanda uıytar uıqy da tánińdi tastaı qashar turaǵymyz — Tamuqqa attanyp baramyz. Siz nege bizdiń kemeni tastaı qashqyńyz keledi?! Bıletińizdi usaqtap jyrtyp, aýaǵa shashyp jibergenińizben, bul sapar Sizdi tastap keter jaıymyz joq! Alyp kememizden qashyp ta qutyla almaısyz. Sharasyzsyz! Minájátińiz osynaý ǵalamdyq keme — Jer sharyndaǵy mıllıondaǵan kúnáhardyń daýsynan ozyp Kókke jete me eken?! Álde, meniń kúıreýik óleńim syndy tek óz janymdy ǵana mújıtin nemese jubanysh juptaıtyn byldyr-byldyr ertegige aınalyp keter me?!

Sharasyzsyz — meniń áńgimemdi tyńdaýǵa eriksiz kónesiz. Sebebi, Sizdiń mináját pen Kókten túsken jazbalardyń ár qarpine bir támsil arnap jazýdy bizdiń moınymyzǵa júktegen. Al, ol túpsiz ýaqyttyń shyrǵalańynda adasqan Sizge birden-bir aldanysh. Áıtpese, qasıetti jazbalardy tikeleı oqyp, eshteńe túsiner emessiz. Ýaqytyńyz da az. Tánińiz kemeni tastaı qashsa da, ǵarip janyńyz qaıyra oralyp, qaıǵyly keıipte, jalǵannan eshteńe uqpaǵan beti tirlik keshe beredi...)

* * *

Elektrıchka Qaraǵandyǵa Kún eńkeıe jetken. Kómirdiń shańy kirpigine juqqan qaragóz qala sharshańqy keıipte qarsy alady Aqyndy. Kózi qara bolǵanymen, bul qalanyń lámi basqasha. Temir jol kerýensaraıyna ene bergende daýys zoraıtqyshtan úni qatqyl apaı: «Kýrmetty, jalaýshylar..!» dep beıpil aksentti aǵytady. Myrs etesiz. Belgili aqynnyń «TJ-lar» atty óleńi esińizge oralady. Biraq, ol kezde «TJ-lar» týraly óleń áli jazylmaǵan... Kerýensaraıdan osy shaharǵa at shaldyrǵan ár aqyn, ánshini, kúıshini, jazý-syzýǵa ǵapil qatysy bar jandy qarsy alýǵa qushtar Grajdan Shaqshabalasyn kóresiz. Siz ony tanymassyz, biraq, ol Sizdi tanyp qoıady. Óleńińizdi oqıdy, áńgimeńizdi ádebı gazettiń qıyndysynan kózi shalǵan, ataǵyńyzǵa qanyq. Jo-joq. Qymsynbańyz. Júgińizdi kóterisip, basyńyzdyń «saqınasy» bolsa, emdeýge beıildi. Bizdiń Aqyndy da sol Girekeń qarsy alsyn. Alǵash tanyssa da, Aqyn eshkimdi jatyrqaı almaıdy. Uzyn plashynyń shalǵaıyna ántek juqqan shańmen tústes qapshyǵy kenet kútip alýshynyń ıyǵynan tabylǵan. Aqyn alańdasa da, Grajdan ony kóterter me syıly qonaqqa. Jarty qapshyq kitap edi. Óleńder. Ólkelik gazetke erte-keshte basylǵan. Keıin jınaqqa eppen engizilgen, ár qarpiniń kóleńkesine qońyrqaı muń tunǵan jyrlar-tuǵyn. Bir-ekeýin Sizge oqyp berer edim - áńgimemnen aýytqyp ketetin tárizdimin. Keıin, osy áfsanam júregińizge qonaqtap jatsa, úlgiremiz...

Aqynnyń qalaǵa kelgenin eshkim bilmeı de qalǵan. Ózi de jarapazan-jar-jarǵa jaý. Radıoda ornyǵyp, sol torapta qartaıyńqyrap qalǵan eski tanysyn tapty. Onda da Grajdan ekeýi úıine izdep baryp edi. Qos aqyn — biri alys aýylda, biri qapyryq qalada, tirlikterinde bes-alty márte ǵana dámdes bolypty. Sonda da, etene jaqyn tárizdi. Qalalyq qalamgerdiń namy — Bájeń. Bájeń Sáýiruly. Aımaqqa tanymal, erterekte qazaqtyń úlken aqyndary jazbalaryn jaqsy baǵalap, keıin densaýlyq kúıimen, jer shalǵaılyǵymen ádebıet aǵysynan sál qalyńqy qap qoıǵan. Provınsıalyq aqyn-jazýshylardyń báriniń taǵdyry osy turypty ǵoı. Almaty alys. Jylyna birer barǵanmen, qonaq bop bastap, eldegi qońyr tirliktiń yrǵaǵyn buzyp, qalyń aqyn-jazarmannyń ortasynda shaıqala shaýyp, qaıtasyń. Sosyn, elge oralǵanda tym-tyrys tynyshtyqqa qulaq úırete almaı, taǵy derttenip júrgeniń. Al, alystan elge izdep kelse ǵoı sol aqyndardyń biri. Ekeý kelse de artyq emes. Tutas qazaq ádebıetiniń bir dáýiri kóship, irgeńe qonǵandaı bolasyń. Syrttan kelgen týys ta, eger shýly ortadan kelse, mundaǵy salqyn saıabyrǵa shym batady da ketedi. Biraq, sonshalyq uzaqqa shydaı almaıdy. Tereńge súńgip bara jatqanda, qapylysta aýa jetpeı, qaıyra atyp shyǵyp, sabyr aıdynynan óziniń asaý tolqyndy ózenine asyǵady. Sóıtken alma-kezek dúnıe.

Al, bizdiń aqyn jarty qap kitabyn arqalap, N. stansasynan kelgen edi. Erterekte İbir-Sibirdiń syzdy aýasyn jeti jyl jutyp, elge kele jatqanda, Alashtyń aımańdaı aqynynyń týǵan jeri ekenin estip, poıyzdan túsip qalǵan. Aqyry, sol topyraqqa tamyr baılaǵan. Stansadaǵy tirlik qaragóz qaladaǵydan da mylqaý ǵoı. Ádebı orta joq. Aqsaqaldardyń eski áńgimesi ǵana aldanysh...

Álqıssa, qos aqyn kisinese tabyssyn. Grajdan úsheýi Bájeń baspanasyn kabakqa aınaldyryp otyrǵanda, úı ıesiniń áıeli jumystan keldi. Kele sala salqyn qabaq ańdatsyn qalalyq aqynnyń jary. Bájeń «káne, ash qabaǵyńdy, qamda as-taǵamyńdy!» desin qarap otyrmaı. Sodan soıqan bastaldy. «Bul úı seniń alqashtaryńdy asyraıtyn prıýt emes. Keshe ǵana óleıin dep, aýyryp otyr eń ǵoı! Saıtannyń sidigin simirip ap, maǵan mán aıtatyn kimsiń! Mynaý qaı qaıyrshynyń qapshyǵy?! Qurt kózin! Báriń de kózderińdi qurtyńdar! Qazir mılısıa shaqyrtam!»

Sońǵy sóz stansalyq aqynnyń jandy jerinen tıgen. Sibirdiń dámin tatyp qaıtqan soń, zań ókilderimen kezdesýdi jany súımeıdi. Jalpy, kim jaqsy kóredi deısiń? Uılyǵysa úıden shyqqan úsheýi ilbı basyp, temirjol kerýensaraıyna bet burǵan. Álginde bosaǵada jatqan «qaıyrshynyń qapshyǵy» Grajdannyń ıyǵyna qonjıypty.

Temirjol kerýensaraıyna kim kelip, kim ketpegen?! Siz de, meniń oıshyl oqyrmanym, dám tartsa kelesiz bir. Sonda kóresiz: ersili-qarsyly aǵylǵan jurtty ár zamanda, jyldyń ár mezgilinde osynda bas suǵyp, taban tiregen áriptesterim dep oılańyz. Barlyǵy da tanys, biraq, bári de bóten tárizdi ǵoı. Biz bárimiz bir zamanda, bir keńistikte ómir súrmeýimiz múmkin. Al, kerýensaraıda dárejemiz teńesip qalady — qaısy bolmasyn! Bálkim, osy támsil Sizdiń qolyńyzǵa tıgende biz de tirliktiń kerýensaraıynan bir baǵytqa ǵana satylatyn bıletke ǵumyr-tıynymyzdy usynyp tastaǵan bop shyǵarmyz. Ótkende ataıy aqyn aǵam bir ǵalamat jyr jazdy: Bir zamanda bizdiń atalarymyz «Komýnızm» degen stansadan túsip qalyp edi ǵoı, kelesi stansa — «Repressıa» dep atalatyn, odan keıingi stansa mine — «Kapıtalızm». «Kelesi aıaldama — «Alash» stansasy» degen daýys alystan talyp jetetin tárizdi degen... Iá, áńgimemnen aýytqyp baram. Degenmen, osy kerýensaraılardyń bárinde Grajdan Shaqshabalasy tárizdes beıkúná adam júre qoımas. Grek ańyzdarynda ǵumyrdarıanyń ózen-vokzalynan ótkizetin ázireıil keıipti áldekim bolar edi ǵoı. Bolmasa, Annenkovtyń vagony toqtaǵan stansalardan, kúlli KarLagtyń qaqpasy bolǵan Qarabastan bir zamanda jelkelep túsirip tursa taǵdyryń...

Grajdan bastaǵan úsheý sol túni qaragóz qalanyń kerýensaraıyn bir shaıqady-aý dersiń. Qońyr kúzdiń sońy bolatyn. Tań bozynda asfált ústine qonǵan syz qyraýǵa aınala almaı býlanyp ketetin ýaq. Jastary ulǵaımasa da, jer ortasynan asqan qos aqyn jas periniń siltesine shydaı almaǵan. Aqyry, Grajdannyń esine jaqyn oramda turatyn sazger kókesi túsken. Sazger de zamanynda tıisti enshi-baǵasyn ala almaǵan. Biraq, ánderiniń ǵumyry til jetkizer titirenis tylsymmen astasyp, tilsiz qalar sátterinde qaıyra bastalatynyn biletin, senetin. Sol ǵaırı senimin júrek tereńine jasyryp tastaǵan edi. Ózi de shyrqaǵan: «Jan túbinde uıyqtap jatqan arystan, oıatpashy mert qylarsyń sezimdi!..» Sezimi qalǵyp ketken zamany edi sazgerdiń. Iakı, tirligi tuıyqtalar — fánı kúnge aldy jabyq ýaqta ilbip, kún keship júrgen. Jardan, baladan ada. Jalǵyzsyrap, jansebil júregin qysqan jádigóı tirlikten jalyqqan. Sazgerdiń esigin tań bozynda ıterip kirgen úsheý tynyqsyn. Tús áletinde shólirkep oıanǵan Grajdannyń qoınynan sýsyn basar suıyq ta tabylǵan. Bájeń Kún qos qabat úılerdiń shatyrynan shýaq syrǵanata bastaǵanda jumysyna ketti. Sazger men stansalyq aqyn qaıyra uıqyǵa shomǵan. Tús aýa Grajdan jumys ornyna, nápaqasyn aıyrýǵa attanady. Kúndegi tirligi — torapty joldyń túıinine kelip, kúrmeýin sheshe almaı zaryqqan janǵa bılet taýyp beredi. Parommen ana dúnıe, myna dúnıe arasyn jalǵap júrgen «álemniń aq perishtesi» dersiń. Eki dúnıe arasynda kim kezdesedi eken ózine: biraq, músápir-jolaýshynyń saýabyn alatyn láppaı-taqsyr qarsylaýshy-jóneltýshi mindetin mańdaıyna jazǵan, somen tańdaıyna aq tıgizgen. Tún ortalaı Grajdan sazgerdiń lashyǵyna qaıta oralǵan. Qos zarlyq ne kúıde ekenin bilip ketý oıynda. Aqyn men sazger erteńgilik tanystyrylǵan bir-birine. Biraq, árqaısy kelesisin buryn kórmek túgil, estimegen adamym eken dep túıgen. Grajdan qoltyǵyna qysa kelgen ashshy sý men tiskebasar, onan qaldy buryshtaǵy tok pesh ústine jambasyn kúıdire-múıdire jaıǵasqan qara baqyr, odan shubala shyqqan dámdi ıis áńgimege súıregen ekeýin. Aqyn aldyńǵy túnnen beri kireberis buryshta eleýsiz qalǵan qapshyǵynan bir kitabyn alyp shyǵyp, óleń oqymaqqa talpyndy. Sazger tirliginiń beımálim bir qaltarysynda qap ketken shabytty shaqtary qaıyra oralǵandaı kúlimsirep boı tiktedi. Aqyn maıdaqońyr mashyǵymen jyr tóge bastady. Sazger kúlimsiregen qalpymen yńyldap ilese ketpekshi. Aqyn... Sazger... Aqyn... Sazger... Shaqshabalasy da bu tirlikke áredik qazanaspa astyndaǵy otty qaǵystyrǵan qammen aralasqan bop otyrsyn. Aqyn jyryn saǵynypty. Sazger de qaqpaǵy áldeqashan qulyptalyp qalǵan syrsandyǵynyń qıýy ketken tusynan sebezgilep shashyraǵan shýaq-sazdary janarynan ushqyndap, bir jasap otyrdy. Oǵan otty sýdy qosyńyz! Tirliktegi temirqazyǵyńnan adasyp, el ortasynda otyryp, elsizde qalǵandaı kún keship kórdińiz be, baýyrym? Óner qýǵan óreli jan ataýly óz júreginiń shuńǵyma tereńine talaı márte súńgip, ózin izdep júrip adasar edi. Tek óner-bilim ǵana emes, tirlikte tamyryn tanyǵysy kelgen hár jandy kórgenbiz. Bizdiń qos keıipker de ulys kóshine janaı shapqan jalǵyz attynyń ǵumyryn keship edi. Áý basta jazylǵan taǵdyr ma, álde kezdeısoq jazym álegi me: biri - shalǵaı aýylda eleýsiz qalǵan, biri — janyn uǵar jan tappaı jabyqqan. Adasý emeı nemene?! Álde, olardyki jón de, kóptiki qata ma?! Qaıtken kúnde de, sol kúni eki azamat serpilip edi. Jyr oqylyp, án shyrqaldy. Kenet Sazger ábden boı jasaǵan adamnyń keıpimen Aqynǵa sergek qarasyn:

Esińde me? Ekeýimiz erterekte kezigip edik qoı?

Múmkin emes, aǵasy! Meniń tirlik-talqanym siz júrer aýlalarda shashylmaǵan edi.

Bári múmkin! Báleninshi jyly Almatyda Muqań — Muqaǵalımen Tólegen aqynnyń úıine kelip ediń ǵoı.

Iá, Muqańmen dos-jar bolǵanbyz! Aıbergenovtyń aýlasyna bas suǵyp turatynbyz. Siz qaıdan júrsiz ol mańda?

Men Shámshimen joldas bolǵam. Áli de! Biz Shákeń ekeýimiz barǵanbyz sol úıge...

Oıpyrmaı! Sen... solsyń ǵoı!

Iá! Dál ózi! Al sen... Sen — solsyń!

Endi kim dep otyrsyń?!

«Oı, baýyrymdap» qaýyshqan qos jigit aǵasyna qara baqyrdy umsyna ustap kelip turǵan Girekeń ańtarylyp qarasyn.

Oı, baýyrym-aı!

Óı, kókem-aı!

Báse!

O, sheber qudaı!!!

Manaǵy áńgime — áńgime me! Endi keńisin keńistik. Kókjıek túrilip, aspan asqaqtap sala bersin! Alash atyrabynda mundaı talaı ataqty kezigis bolǵan. Bizge etenesi - Ásettiń Kempirbaıdan kóńil surap barar sapary. Bul teńeýimizdi artyq, ábes sanasańyz, alystan mysal tabaıyq. Gogenniń Taıtı aralynan Parıjge oralýy. Odan da áridegi ejelgi dáýirdegi ápsanalyq oqıǵalar. Qaı-qaısy da qos azamattyń — Aqyn men Sazgerdiń kezigýine mysal bola alar edi. Senińiz! Senbeseńiz, óz óresheńizge kóz tastańyz: jigittik dáýrende az-kem dámdes bop, arada tutas ǵumyr ótkizgen soń kezikken áriptesińizdi tanyp, tańyrqaǵan sátti oıǵa alyńyz... Iá, ıá! Sol sáttegi bir ózgeshe sezimder sazgerdiń lashyǵy ishin araıǵa toltyryp edi! Qazaq mańdaıyna basqan aqıyq aqyn men syrshyl sazgerdiń janynda qarýlas serik bolýǵa jaraǵan bizdiń keıipkerler de osal emes edi. Tek, tirlik, taǵdyr syzyǵy ózgeshe syzylǵan...

Qaraǵandy kerýensaraıyn meken etken sol qos seri jaıly áńgimeni túrli qalypta támámdaýǵa bolar edi. Bálkim, jarıa jazýǵa da jata qoımas?! Biraq, báribir Aqyn men Sazger osy jazýǵa táýelsiz, ada keıipte sol kezeń, sol keńistikte ǵana emes, dál qazir de osynda, tusymyzda ómir súrip keledi ǵoı. Vokzalǵa bas suǵyńyz — dabyr-dubyrly júrginshi-jolaýshylar shýynan tynys-demi seziledi; ári ótken, beri ótken tanys beıtanystardyń biri bolmasa, birinen surańyz tanıdy: kórgen, estigen, ádebı gazetterdiń qıyndysynan óleńin oqyǵan; anaý qara aıǵyr súıregen shubalań vagonǵa ótkende minip ketipti, myna bir aýyr kúrsinisti ziltaban poıyzdan áne-mine túsetin syńaıly. Degenmen, aýytqyp baramyz taǵy...

Araıly, shyraıly otyrys sońy ahylaǵan estelikke ulasqan. Sharshaýly keıip, qalyp oıly jandarǵa jıi juqqysh qoı. Ásem ánniń de sońǵy notalary oınaqshyp aspanǵa atylǵanmen, tıylar sáti muńǵa shylqyr edi! Jyrdyń da sońǵy shýmaq, sońǵy jol, sózi estelikke bastaý berer tıanaq qoı.

Girekeń tún kórpesi qaragóz qalany qymtaı bere kerýensaraıyna qadam túzepti. İlkide estigen áńgimemde dúnıe jigin qosyp-ashar dánekershiler el uıqyǵa shomar saıabyrly sátterdi súıedi-mis. Qarsy alý, qoshtasýlar da. Al, sol kúnnen bastap qos seriniń ortaq tirligi, ǵumyr tıanaqtar ortaq joly bastalypty. Kúnde Kún jaryqtyq alasa úılerdiń tozyńqy shatyrlaryn sıpaı shýaq taratqanda ilbip vokzalǵa baratyn edi olar. Kún saıynǵy qalypqa túsip ketken ǵadet boıynsha Aqynnyń bir-eki kitaby uzyn plashynyń tós qaltasyna súńgitiledi. Sazgerdiń estelik áńgimesi de júrek tusynda qyzbaqshy — tyńdarmanyn kútip. Al, kerýensaraıǵa kim kelip, kim ketpeıdi?! Siz de, meniń oıly oqyrmanym, bir jolyqqan shyǵarsyz tirlik saparyńyzda Aqyn men Sazgerge! Bárimiz bir mezgilde, bir keńistikte ómir súrmegenimizge kim kepil?!.

Myna kitaptyń avtory men ǵoı, - deıdi Aqyn. — Sál jastaý kezimdegi sýretimdi bergizgem. Bir óleń oqyp bereıin be?

Siz kelisesiz. «Óleńińiz jaqsy eken!» dersiz. Aqyn senýge beıildi. Sazger qoshtaýǵa. «Iá» deıdi ol. «Osyndaı jyrlar bar adamzat aspanynyń astynda!» Sizge kitap ta syıǵa tartylyp, qoltańba alyp qalý usynylady. Qýana kelisip, qos seriniń qolyna azdy-kópti tıyn-teben ustata salyńyz! Janyńyz ashyǵandyqtan emes! Óleńdi túsingendikten. Al, tipti, jyrdyń jalǵasyn kútseńiz, dastarhan jaıyp, Sazgerdiń esteligin tyńdarsyz!..

Osy senarı boıynsha syrǵyǵan qara kúz aq qaýyrsyndy qysqa almasqan. Qys sońy kóktemge ulasar ma edi?! Jo-joq, árıne! Mezgil máresin belgiler qudiret joq bizde. Tek...

Tek, sol baıaǵy sazger lashyǵyna qońyr kúzde aparylyp, kireberistegi buryshta eleýsiz qalǵan sarǵysh qaptyń túbi kórinsin bir kúni. Áýeli aqyn erteńgisin turyp, syrt kıimin kıerdegi ádetimen eńkeıgen. Áýelgi toq qalpy qys ortasyna tamanǵy aıazdy kúnderi júdeńkiregen qapshyq aýyl úıinde pesh túbinde jatatyn jetim qozynyń boıyna jylý daryǵan soń sol jatqan qalpy kerilgendegisindeı jermen-jeksen bolyp qalypty. Aryq salaly saýsaǵy edenge taq etip tıgen Aqyn ańtarylyp, Sazgerge qarasyn. Kerenaý qalypta, uıpalanǵan shashyn tarap turǵan ol da buǵan júdep kóz tastaǵan. Kitap bitipti! Endi qaıtpek kerek?! Dymy bitken aqyn bosaǵaǵa tóselgen bóstekke otyra ketti. Sazgerdiń múıiz taraǵynyń birer tisi synyp, shashyna sińgen. Sálden soń ádepki eńselerin túsirmegen qalypta eki adam esikti ıtere jaýyp, kerýensaraıǵa qaraı ketip bara jatty... Bálkim, bul sońǵy tańdary ma eken?! Bálkim, bul sońǵy saparlary ma eken?! Biz kórmedik sol kóktemde olardy. Kerýensaraıǵa shartaraptan quıylyp-aǵyp ketip jatatyn jyly aǵystardyń birine túsip, beımálim baǵytqa jónep kete bardy ma eken?! Al, Siz...

Siz izdedińiz be olardy?! Ana bir pysqyryp kep turǵan qaraaıǵyrdyń qońyraýly trashpenkesine aıaq artyp bara jatqanda, sońyńyzǵa aqtyq ret qarap qalǵanda, aǵylǵan júrginshiler arasynan júdeńki júzderin kózińiz shalǵan bolar. Esińizge túse qoımady. Áıteýir bir zamanda, bir tarapta kórgensiz. Qaıtse de, esińizge túser me eken?!.

Qaragóz qalanyń kerýensaraıy talaı Aqynyn qarsy alyp, shyǵaryp salyp edi. Tas tóselgen alańǵa taban tıgen bette Sizdi de Grajdan Shaqshabalasy qarsy alýy múmkin. Sebebi, tanıdy, biledi, óleńińizdi ádebı gazettiń qıyndysynan kózi shalǵan. Basyńyzda túrli oı bolsa, serpiltýge de beıildi. Tek...

Tek, sol bir qyraýly qysta bir-birine selbesip kún keshken Aqyn men Sazgerdi baıqamaı ótip ketesiz kerýensaraıdyń keń zalynan. Áne, ana bir toptyń qaq ortasynda Aqyn óleń oqyp, qoltańba usynýda. Mine, Sazger estelik aıtýda.

Bul áńgimeni túrli qalypta tıanaqtaýǵa bolar edi. Biraq, áli de sol eki seri adamzat kerýensaraıynyń bir shetinde aǵylǵan júrginshiler arasynda kúmbirletip óleń oqyp, estelik baptap bizdiń aramyzda júr-aý. Bizdiń jazýymyzǵa esh táýelsiz, ada, arylǵan, anyq aqıqat keıipte...

* * *

(Al, Siz nege bizdiń kemeni tastaı qashqyńyz keledi?! Bárimiz baratyn jaqqa bir baǵytqa ǵana bılet satylǵan. Sol tarapta birge bolatynymyz anyq! Oǵan deıin tanys beıtanysyńnyń qoltańbasy basylar kitap túgesilgenshe, tirliktiń kónetoz qapshyǵyn arqalap, kerýensaraılar keńistigin tozdyrarmyz...

Bul jaqta bálkim biz bir ýaqytta, bir keńistikte birge ǵumyr keshkenimizge sengimiz keledi. Al, ana jaqta qaıtsek te birge bolamyz. Tek ondaǵy kerýensaraıda bizdi kim qarsy alar eken?!. Oǵan kóńil qulatyp, janyńyzǵa jaqyn jubanysh retinde qabyl kórmeseńiz... Báribir, basqa amalyńyz joq. Sharasyzsyz...

Tánińiz kemeni tastaı qashsa da, ǵarip janyńyz qaıyra oralyp, qaıǵyly keıipte, jalǵannan eshteńe uqpaǵan beti tirlik keshe beredi...)

13.Hİİ.2010.

---