InfoHub Logo

Búgin Astanada Jastar jylynyń ashylýyna arnalǵan sharada Qazaqstandaǵy eń jas stýdent Abzal Myrzash QR Prezıdenti Nursultan Nazarbaevqa aldaǵy josparlary týraly aıtyp berdi.

«Men de elimizdiń shynaıy patrıoty retinde Qazaqstannyń aldyńǵy qatarly ozyq tehnologıasy bar, ǵylymy men ekonomıkasy damyǵan órkenıetti 30 eldiń qatarynda bolýyna óz úlesimdi qosqym keledi. Sondyqtan aldaǵy ýaqytta Qazaq-Brıtan tehnıkalyq ýnıversıtetin bitirgen soń, AQSH-taǵy Massachýsets tehnologıa ınstıtýtynyń magıstratýrasynda jáne doktorantýrasynda oqýdy jalǵastyryp, aqparattyq tehnologıamen birge, nanotehnologıany meńgerip, Qazaqstannyń ǵylymyna óz úlesimdi qosamyn degen úlken maqsatym bar», - dedi Abzal Myrzash.

Sonymen qatar ol elimizde kompúterlik tehnıkany jáne ony jabdyqtaıtyn quraldardy, robototehnıkany, nanorobottardy jasaıtyn úlken kásiporyn ashýǵa nıetti ekenin aıtty.

«Qurmetti Nursultan Ábishuly! Siz únemi latyn qarpine kóshý týraly aıtyp kelesiz. Óıkeni latyn álipbıine kóshý - İT-tehnologıalyq progresten qalys qalmaýǵa, eń bastysy, qazaq tilin jańǵyrtýǵa jaǵdaı týǵyzady. Sondyqtan usynatyn eki jobam bar. Birinshi jobamda kompúterdiń pernetaqtasyna yńǵaılap «Abzal alfavıt» dep atalatyn qazaq-latyn álipbıin jasadym. Osy nusqama avtorlyq kýálik aldym. Meniń bul nusqam arqyly álemniń kez kelgen jerinen kompúterdiń standartty aǵylshyn pernetaqtasyn paıdalanyp, qazaqsha jazýǵa bolady», - dedi A. Myrzash.

Onyń sózine qaraǵanda, ekinshi jobada kırıllısadan latyn qarpine aýdaratyn konverter baǵdarlama jasaldy.

«Qazir meniń konverter baǵdarlamam arqyly kırıllısadan latyn grafıkasyndaǵy qazaq qarpine 1 mınýtta 1 200-den astam kitap aýdarýǵa bolady», - dedi výnderkınd.

Qazaqstandaǵy eń jas stýdent Abzal Myrzash Qazaq-Brıtan tehnıkalyq ýnıversıtetinde bilim alyp jatyr. 

Oqý ornynyń basshylyǵy, bazalyq fakúltet dekanaty, aqparattyq tehnologıalar dekanaty jas stýdentti jiti baqylaýǵa alǵan.

---