Damyl kórmeı erte-kesh,
Jurttyń qamyn kóp jediń.
Baıladyń beldi, salyp kúsh,
Tynyshtyq júzin kórmediń.

Jaǵalastyń jaýmenen,
“Bermeımin jurtym, janym”, – dep.
Alyspaq boldyń taýmenen,
“Jurt úshin tógem qanym”, – dep.

“Oıan! – dediń jurtyńa, –
Bas kóterip, tirlik qyl!”
Aqyl aıttyń ultyńa:
“Tasta talas, birlik qyl!”

Bir sheshpediń belińdi,
Jurt úshin ýaıym-qaıǵy jep,
Saqtamaq bolyp elińdi:
“Qara kún alda, bekin”, – dep.
Menmensigen kúshti jaý
Kózdep turdy isińdi.
Qoımady seni esen-saý,
Aldy qoldan kúshińdi.

Qarańǵy úıge qamady,
Meıirimsiz óńsheń tasbaýyr.
Sorlyǵa Táńiri pana-dy,
Bolsa da beınet qansha aýyr.

Qıalǵa eski bata ber,
Qaıra ózińdi, dármen ne?
Ýaıymsyz, oısyz jata ber,
Jurt úshin tústiń, arman ne?

Kózin ashyp, artyńda
Jurtyń oılar: “Bul qalaı?
Taıynba, qoryqpa, tartynba!” –
Deýshi bolar birtalaı.

Umytpaǵan óz ultyn
Qaıratty jas jigitter
Jurt úshin salar mal-múlkin,
Birin-biri úgitter.

Ustasyn, japsyn, ýaıym joq:
“Qoımaı qýsa qorqaqty –
Batyr bolar” degen kóp,
Batyr ǵyp, odan ne tapty?

Órnek bolar mundaı is
Keıingi janǵan jastarǵa.
Qaırattanyp, kúıip ish,
Azýyn shaınar qastarǵa.

Qarańǵy bolsa qansha tún,
Juldyz sonsha jarqyrar.
Bult bassa da Altyn kún,
Bir shyǵar, jerdi jaryq qylar.

Keleshek kúnde qaǵazǵa,
Altynmen jazar atyńdy.
Qushaqtap súıer, qaǵazda
Kórse jazǵan hatyńdy.

Ýaıym-qaıǵy jutady,
Seni oılap, sorly jurt.
Ańdyǵan jaý utady,
Táńiri, sonyń túbin qurt.

Saǵan kók te tilektes,
Buralǵan óńsheń názik bel,
Perishteler janyńda!
Esh qaıǵyrma, raqat – anyq bil...

Meıirimi keń kúshti Iem,
Sorly jurtty oń basta.
Dushpan – qulash, biz – súıem,
Raqmet ushqynyn tasta!

Kóbeısin elde qaıratty er,
Jurt úshin bolsyn qara ter.
Sorly jurtty bastasyn,
Jasaǵan, soǵan kómek ber!

---