Jer júzin topan bassa eken!
Asqar taýdan assa eken!
Taýdaı tolqyn qutyryp,
Ýly kóbik shashsa eken!
Bassa eken topan jer júzin!
Japsa eken kóbik kún kózin!
Jandy, jansyz joq bolyp,
Qalsam jalǵyz bir ózim!
Jan ıesi tunshyqsa!
Ún ıesi ún shyqsa!
Qarańǵy jerdiń kógine
Kún bolyp sonda men shyqsam!
Qandaı oıyn salar em!
Jalynmen bárin jalar em!
Eki-sheksiz dúnıede
Jalǵyz ózim qalar em!
Zaýlaǵan ot - jalǵyz jan,
Jer minezdi joq adam.
Zaýlap turǵan otymnan
Jaratar em jańa adam.

---