Sý aqty, jetti aprel, qyrdan oıǵa,
Sekirip aryq-turaq ketti toıǵa.
Jas bala: «Jazǵytury týdy»,- desip,
Jabaǵy, kóterem taı, aqsaq qoı da,
Qýanyp jan-janýar, alshań basyp,
Qalmady qaıǵy-ýaıym eshbir oıda,
Nurly kún altyn nuryn shasha bastap,
Shyqsyn dep qysqy yzǵar ótken boıǵa.
Sý aqsa, taý jańǵyrar syldyr qaǵyp,
Dál sulý burańdaǵan sholpy taǵyp.
Túrli únmen jańa kelgen jyldyń qusy
Turǵandaı qobyz oınap, ánge salyp.
Uly baı jylqy qamap, qyl kúzeýge
Belsengen jylqyshyǵa noqtalatyp.
Balalar etek túrip, zyr júgirip,
Batpaqqa birin biri domalatyp,
Qyrdaǵy jylqyshar uıqy kórmes,
Qolynan qýlyq bıe qulyndatyp.
Maı kirdi, jer qulpyrdy, gúlder jaınap,
Jibekteı kókoraılar jatqan jaırap,
Sulýdaı burańdaǵan butaqtarda
Án salyp ár túrli qus turǵan saırap,
Sýyqtan tońyp ólgen shybyn-shirkeı
Tirilip, qanat qaǵyp, byj-byj qaınap,
Aspanda kún kúrkirep, ot jarqyldap,
Jyly jel qara bultty terbep aıdap.
Ýyzǵa jańa toıǵan jas qulyndy
Shyńǵyrtyp jylqyshylar ustap, baılap,
Azyraq kúıli shyqqan qysyr taıyn
Balalar shapqylasqan minip jaıdaq .
Qys qysqan aryq-turaq, jaman-jáýtik
Ketti ǵoı áldeqashan tyraqaılap.
Jaratqan janǵa rahat jazǵyturdy
Shúkir qyl bir Allaǵa «ıa, qudaılap».

---