InfoHub Logo

— Nurıla, a, Nurıla!, — dep qonaq bólmeden shaqyrǵan aqsaqalynyń daýysynan ashanada kese-sháınegin jınastyryp júrgen keıýana selk ete tústi. Qolyndaǵy ydysty qoıa salyp, qabyrǵalas bólmege empeńdeı umtyldy. — Ne boldy, jazǵan-aý, sonsha aıqaılap, shoshyp kettim ǵoı!, — dep alshalǵyshyna qolyn júre súrtip esikten kórindi.Basynda oıýlatqan qazaqy taqıa, túıe jún jeńsiziniń óńiri eki jaqqa jaıylyp ketken qarıa jazý ústeline oblystyq gazetti aıqara ashyp salyp bar yntasymen tónip turdy. Báıbishesi janyna jaqyndap:

— Tóke, o ne? Ne jazypty sonsha?!, — dep ústel shetinde jatqan
kózildirikti muryn ústine ile salyp, qosyla úńildi. Qaı betine qaraý keregin naqty bilmese de, jarynyń kóńilin aýdarǵan gazet betine.

— Myna sýretke qarashy!, — dedi kúıeýi basyn kótermegen qalpy.

— Táýelsizdiktiń 25 jyldyǵyna oraı túrli — tústi etip shyǵarǵan ba, «Jetisýdy».

— Ie, meniń saǵan kórsetip turǵanym, myna bala ǵoı. Qarashy!, — dep endi gazettiń ekinshi betin áıeline qaraı burdy.

— Gımnastka ǵoı! Qandaı ádemi!, — dep Nurıla kózildiriginiń ilmeginen ustap, gazetke qadala ketti.

— Nurıla, sen jaqsylap qarasańshy! Bizdiń Jánıadan aýmaıdy eken, — dedi endi báıbishesimen bas túıistire sýretke qaıta qarap.

— Ie, shynynda, — dep áıeli endi kózildirigin kótere tústi.

— Dóńgelek júzi, bota kózi, támpish tanaýy..., — dep Tókeń termelep barady.

— Shashy da, — dedi áıeli, — kekiliniń tógilip turǵanyna deıin aýmaıdy-aý, aýmaıdy...

— Áı, «osy bizdiń Álıa emes pe?», — degen oı kelip tur maǵan, — dep baǵanadan bergi kóńildegisin aqtaryp saldy. Eri ne aıtsa da maquldaı jóneletin Nurılanyń júregi shym ete tússe de:

— Qoıshy-eı!, — dep qaldy, ózi qalaı qarsy aıtqanyn da baıqamady. Gazetti jarynyń qolynan julyp alyp terezeniń aldyna jaqyndady. Senbegendeı qaıta úńildi.

— Taldyqorǵandaǵy jetim balalar úıinen eken. Kórkem gımnastıkadan oblystyq baıqaýdyń júldegeri kórinedi, — dep Tókeń áıeline gazetten oqyp úlgergenin málimdeı bastady.

— Láılá Tabyldıeva deı me?!

— Iá, aty –Láılá eken.

— Jetimder úıinde júrip mynandaı jetistikke jetkenin qara. Aqyldy qyz boldy ǵoı!, — dep Nurıla sýretke súısine qarap tur áli. Kezinde talaı talantty shákirt tárbıelegen ulaǵatty ustaz myna ónerli órenge qyzyǵa, muǵalimniń kózimen qarap, tamsandy.

Erli-zaıyptylar sporshy qyzǵa qarap máre-sáre bolyp jatqanda syrttan kenjetaılary – Jánıanyń engenin de baıqamady.

— Apa, ne boldy gazetten bastaryńyzdy kótere almaı qalypsyzdar ǵoı?, — degende baryp burylysty.

— Ákeń «Jetisýdan» bir gımnast qyzdy kórip saǵan uqsatyp tur, — dedi beıǵam ǵana anasy. «Saǵan uqsatyp tur», — degenge eleń etken qyz jandaryna júgirip kelip:

— Qane?!, — dedi gazetke umsynyp.

— Mine, qarashy, alǵashynda sen eken dep qaldym, — dedi ákesi.

— Kekiline deıin saǵan uqsaıdy!, — dedi sheshesi qyzdy tipti qyzyqtyryp.

— Bershi...bershi..., — dep anasynyń qolynan gazetti ala salyp dıvanǵa jaıyp jiberip úńile ketti.

— Apa! Áke! Mynaý Álıa emes pe?!, — dedi daýysy dirildeı shyqqan qyz. Óziniń syńaryn izdep júretin balanyń júregi tarsyldap qoıa berdi gazetke qaraǵan saıyn. Ákesi oryntaqtan atyp turyp dıvanda jaıylyp jatqan «Jetisýǵa» qaıta únildi.

— Bul bala balalar úıinen eken. Bolsa bolar. Joǵalyp ketkende múmkin bireý taýyp alyp balalar úıine tapsyrǵan shyǵar, — dep topshylady, qyzynyń qolyndaǵy gazetke taǵy qarap.

— Sender ne dep jatyrsyńdar, áı!, — dedi perzentin joǵaltqan ana júregi eljirep sýretke qaıta úńilip jatyr.

— Oıbaı, qulynshaǵym-aı, kim bilsin. Bıyl on úsh jylǵa ketti ǵoı, iz-túzsiz bolǵanyna. Myna bala neshede eken?, — dep jaryna qarady, ádettegisindeı bárin sol biledi degendeı.

— Ákelińder beri», — dedi áke endi tizgindi qaıta óz qolyna alyp.

— Bıyl onynshy synyp oqýshysy kórinedi...

— Úsh jasta joǵaldy, sodan beri on úsh jyl boldy. Bizdiń Álıa da osyndaı on altyǵa tolar edi. Aıtpaqshy, ol ekeýmiz jastymyz ǵoı!, — dep Jánıa taqyldap eseptep shyqty.

— Mynany aǵalaryń men apalaryńa habarlap, izdeý salalyq, — dedi Nurıla júregi alyp-ushyp.

— Taldyqorǵandaǵy nómeri ekinshi balalar úıinen depti. Sýretti túsirgen – Sovetbek Maǵzumov deıdi. Osy balalar úıine baryp surastyraıyq, — dedi ákeniń de kóńil túpkirinen úmit oıanyp. Ústindegi túıe jún jeńsizdi bir sheship, bir kıdi. Tolqyp turyp:

— Nurıla Álıadan aıyrylyp qalǵan kún esiń de me?!, — dedi báıbishesine.

Gazetten gımnastka qyzdyń sýretin kórgennen júregi eljirep, jan dúnıesi tolqyp otyryp qalǵan ana jaýap berýge asyqpady. Sol azapty kúndi esine alǵandaı bir ýaqytta baryp:

— Árıne, Tóke! Esinde me degeniń ne? Men sol kúnnen beri jyl emes, kún sanap júrgen joqpyn ba?! Jánıanyń ár qylyǵyna, ár isine qaraǵan saıyn Álıamdy eske alyp, «ol bar bolsa búıter edi, súıter edi ekeýi, bıyl mynasynshy synypqa óter edi, mynandaı jasqa jeter edi», — dep ishteı ózimdi ózim jep ómirim ótip jatqan joq pa! Basqa balalardyń qyzyǵy bir tóbe de, Álıamnyń qaıǵysy bir tóbe. Kóńilim ár kún, ár saǵat saıyn sony joqtap keledi. Tek eshkimge bildirgim kelmeıdi. Sonyń osy jaǵdaıǵa ushyraýyna dúnıe qýǵan ózimdi kinalaımyn.

Seni de aıap ketem keı — keıde «Álıamnyń eti tiri edi, aman bolsa bir jerden shyǵar edi», — degenińde», — dep janarynan jas parlap, óksip-óksip jiberdi.

— Maǵan Álıa jaqyn bir mańda bizge kórinbeı júrgendeı bolyp árdaıym kóńilimdi alańdatyp júredi, — degen otaǵasy janyna dıvanǵa kelip jaıǵasty.

— Baǵana sen balalar úıinen degende júregim búlk etip, sýretine qaıta qaraǵanda Jánıadan aýmaıtynyn baıqadym. Ákesi, izdeıikshi, osy bizdiń qyzymyz!, — dep eriniń qolynan ustap alyp óziniń júrek tusyna jaqyndatyp:

— Qarashy, júregim sezip tur. Soǵýyn tyńdashy!, — dep jarynyń júzine sondaı bir jalynyshpen qarady.

— Árıne, izdeımiz. On úsh jyldan beri men de ony ishteı izdep, qaıda barsam da sol quralpylas qyz balaǵa telmire qarap, egizderime uqsastyq izdep júremin. Sen jylaı bermesin dep aıtpaıtynmyn. Alladan syńaryna amandyq tileımin!, — dep Tókeń qolyn áıeliniń ıyǵyna salyp, baýyryna tartty.

— Apa, men tátem men aǵama gazettiń atyn, nomerin jazyp, sýretin Vatsappen jiberdim, — dep bólmege Jánıa qaıta kirdi telefonyn qolyna ustap.

— Aǵańnyń qoly uzyn ǵoı, sol tappasa zeınetkerlerdi kim tyńdasyn, — dep anasy memlekettik qyzmet isteıtin ulyn maqtanyshpen eske aldy.

2

«Tólepbergenniń egiz qyzdarynyń bireýi joǵalyp ketipti!», — dep aýyl dúr silkindi eki keshtiń arasynda. Etektegi shaǵyn eldi mekenge kún taýdan assa boldy qarańǵy túsedi.

— Ásıma apa egiz qozysyn kózinen tasa qylmaýshy edi, qalaı aıyrylyp qaldy eken?

— Tókeń mekteptiń joǵarǵy synyp oqýshylaryn jınap alyp izdeýge shyǵypty.

— Nurıla taǵy Qytaıǵa taýar alyp kelýge kirip ketse kerek, áli kelmepti.

— Túnge qalyp qyrǵa shyǵyp adasyp shıbórige talanyp qalmasa jarar edi», — degen alyp-qashpa áńgime aýyl ishin sharlap ketti. Jaqyn aǵaıyndary Tólepbergenniń úıine kele bastady. Olar ańyrap otyrǵan Ásıma kempir men ájesiniń etegine oralyp, baýyryna jabysyp kózi baqyraıyp jylap otyrǵan egizdiń syńary – Jánıany kórdi. Egizderdi ajyrata alatyndary:

— E, Álıa ma joǵalyp ketken?, — dep jatty.

Tólepbergen bastaǵan mektep balalary men aýyl eresekteri tań bozarǵansha aıaq jeter jerdegi oı-shuqyr, saı-toǵan, qyr-beles, orman-toǵaı ataýlyny túgel súzip shyqty. Bala ushty — kúıli joq! Suraǵanǵa Tókeń: «Tańerteń sheshesi jolǵa shyqqanda ekeýi de ájesiniń janynda qalypty. Odan keıin Álıanyń qaı kezde úıden sytylyp shyǵyp ketkenin eshkim baıqamaǵan. Erip ketti deıtindeı syrttan eshkim kelmegen. Úlkenderi ertemen sabaqta. Tek túske qaraı as isherde tirshilikten bosaǵan apam izdegen ǵoı. Ol kezde Jánıa úıde oınap otyrǵan eken», — deıdi túri qaraıyp.

Ertesine aýdandyq ishki ister bólimshesine habar berildi. Álıanyń sýreti aıaq jeter jerge ilinip, habarlasý úshin aýdandyq ishki ister bólimshesi men ata-anasynyń telefony qosa jazylyp izdeý jarıalandy.

Úsh kúnnen soń Qytaıdan taýar arqalap jetken anasy Nurıla Álıasynyń izin de tappaı kóz jasyn kóldetip qala beredi. Sol joqtan baldyrǵan izim-qaıym joq boldy. Kórdik degen, bir jerden bala taýyp alypty degen pende bolmady. Baqyttaryna oraı, jamanattan da habarshy bolmady. Áke men shesheniń balasyna izdeý salyp habar joldamaǵan jeri qalmady. Egiz qozydaı eki qyzdyń eki jasqa tolǵan kúnderinde túsken sýretin úlkeıtip tórgi bólmege ilip qoıdy. «Tiri júrse bir tabarmyz», — degen úmitpen jyldar ótip jatty.

— Oıbaı, nesin aıtasyń balalardy urlap alyp ketip dene múshelerin satady eken...

— Shetelge bala satyp aqsha tabatyndarǵa aýyldaǵylar da deldal bolady eken...

— Solaı urlap ketpese bir habary shyǵar edi de...

— It-qus jese eki alaqany men tabanyn qaldyrady eken. Balalar saı-salany tintip shyqty, súıek tabylmady ǵoı, — degendeı sózder alǵashynda gýlep baryp basyldy.

Aýyldaǵylar árqaısysy óz balalarynan aıyrylyp qalardaı bolyp qorqyp, saqtyqpen júrdi.

«Ýaqyt– emshi», — degen ras eken. Jyldar jyljı kele el ishinde egiz qyzdyń joǵalǵan syńary jaıly eske alýshylar azaıdy. Jelkildep ósip kele jatqan Jánıa ǵana syńaryn umyttyrmaıtyn. Ata-anasy da, jaqyn, aǵaıyn-týys ta júrek túpkirlerinde bir jerde júr-aý degen úmitpen Jánıanyń ár qylyǵyn kórgen saıyn Álıany eske alysatyn. «Úmitsiz — shaıtan», — degen ras qoı.

Nurıla baýyr eti balasynyń ne óli ekenin, ne tiri ekenin bile almaı júregi ezilip súlesoq júrdi. Saýda-sattyq jaıyna qaldy. «Kúıigin jasyrǵannyń kóńili jubanbaıdy», — degen bar qazaqta. Sol aıtqandaı Tólepbergen men Nurıla kúıikterin ishine tyǵyp, al analary – Ásıma sol kúıikten ómirden ótti.

3

Álıanyń úsh jasqa aıaq basqan kezi. Anasy – Nurıla egizderin enesine qaldyryp saýdamen aınalysyp ketken. Ol Qazaqstan Táýelsizdigin alǵan alǵashqy jyldar edi ǵoı. Mektepte ustazdyq etip júrgen Nurıla birde úıge:

— Men erteńnen bastap Raýshanmen birge saýda jasaýǵa shyǵamyn, apa, — dedi enesine.

— Nege? Seni bireý mektepten qýyp jatyr ma?! Saýdasy nesi, sartqa uqsap. Tegimde saýdager joq, — dep keıýana shoshyp ketip, biraz sóz aıtyp saldy da, tigip otyrǵan isin ashý ústi ysyra saldy.

— Tólepbergen ekeýmiz de osy mektepti saǵalap kelgenimizge jıyrma jyl boldy. Bir ıinimiz bútindelip, eńsemiz kóterilgen emes. Birdi birge jalǵap kelemiz, jalǵap kelemiz. Moıynymyzdy sozyp jaqsylyqtan úmittenip ilgeri qaraǵanymyzben keri ketip baramyz. Sońǵy jyldary aılyqty da ýaqtyly bermeıdi. Olaı tartsań –olaı, bylaı tartsań – bylaı jetpeıdi» — dep suńqyldap kele jatyr edi, enesi:

— Áı, shyraǵym, jónin aıtshy, neden kende bolyp, neden taryǵyp júrsiń?, — dedi jaqtyrmaı.

— Apa, úlken ekeýi qatar ósip keledi. Erteń-aq Almatyǵa oqýǵa túsemiz deıdi. Baıaǵydaı tegin joǵary bilim alý joq, zaman basqa. Eger jaqsy bal jınaı almasa, aqyly oqýǵa aqsha kerek.

— Nemene jınaý kerek?, — dedi saýaty joq keıýana, jaqtyrmaı surap.

— «Bal», — degendi jınaıdy apa. Bilimderin solaı baǵalaıdy. Baıaǵydaı bes aldy, tórt aldy degen joq endi.

— Meniń balalarym qalaı baǵalasa da úzdik bolady. Oqyǵysh! Sen aqyr zamandy taqaı bermeı mektebińe bar.

— Apa, men derektirge aıtyp keldim. Erteńnen bastap jumysqa kelmeımin dep. Toqań da kelisti. Keler jetide Raýshanǵa erem de Qytaı asyp taýar tasyımyn!», — dep tur ne shaıtan túrtkenin ómiri tik qarap sóılemeıtin kelini.

— Bárin óziń kesip — piship qoıypsyń ǵoı, baıǵa da, enege de bılik bermeı. Ádirám qal, tabys tabam deıdi ǵoı! Qatyn tabys taýyp qaryq qylǵandy kórmeppin!» — dep kempir etegin bir qaǵyp ornynan turdy da syrtqa bettedi.

Enesiniń jaqtyrǵan-jaqtyrmaǵanymen isi joq kelin jolǵa jınala bastady. Sol sapardan sapar jalǵasyp, Járkentten – Qorǵas, Qorǵastan – Qytaı asyp Nurıla qapshyǵyn arqalaǵan saýdager bolyp shyǵa keldi. Birden qoly júrip, isin dóńgelete jóneldi. Aýdan ortalyǵy, aýyldaǵy shaǵyn market dúkenderge kıim-keshek, usaq-túıek, oıynshyq degenderdi qaryzǵa qaldyryp, taýary ótkende qarjysyn jınap júretin boldy. Saýdasy qyza kele taýar tasyıtyn júk kólikterin jaldaı bastady.

Úlken balalary Almatyǵa joǵary oqýǵa tústi. Shynymen ájeleri aıtqandaı oqyǵysh eken, ekeýi de memlekettik grantqa ilindi. Tamyzdyń ortasynda «Egemen Qazaqstan» gazetine shyqqan talapkerlerdiń tiziminiń bel ortasynda júrdi. Bul – ata-ana ǵana emes mektepke de abyroı boldy. Egizderi ájesiniń etegine jarmasyp úıde júretin. Ákeleri kún uzaqqa mektepte.

Sol joǵalatyn kúni Álıasy jolǵa shyqqan anasynyń sońynan baqyra jylap áreń qalǵan bolatyn.

— Qansha qalyp júrip mundaı aqymaqtyq kórsetpeýshi edi. Sol joly bir erekshe jylady. Áreń alyp qaldym, — deıdi ájesi.

Anasynyń darbazadan shyqqan baǵytyn kórip alǵan kishkentaı qyz oıynshyǵyn ustaǵan kúıi artynan ere jóneledi. Onyń qalaı ilese jónelgenin ájesi de baıqamaıdy. Úıleri aýyldyń shetinde, úlken joldyń boıynda bolatyn.

Qaqpadan shyqqannan tompańdaǵan qalpy kishkentaı aıaqtar úlken jolǵa – óziniń eń alǵashqy saparyna bastady...

4

Senbi kúni Tólepbergenge uly Erlan Almatydan telefon shaldy.

Kóke,Taldyqorǵandaǵy ekinshi balalar úıi týraly bildim. Meken-jaıy, baılanys telefondaryn taptym. Senbi-jeksenbide ákimshiligi jumys istemeıdi eken. Qudaı buıyrsa, dúısenbige jumystan surandym, sonda tartyp ketem.

— Aldymen telefon arqyly naqtylap almadyń ba?

— Telefonmen ne bile alamyn. Olar ár balanyń ómirbaıanyn qupıa ustaıdy ǵoı. Sondyqtan baryp, basshylarymen betpe-bet sóıleskenim durys bolar, — dedi Erlany.

— Eger naq Álıa bolsa, dereý habar ber, shesheń ekeýmiz tez jeteıik, — dep tapsyrdy ákesi.

— Menińshe, bizdiń Álıa. Úsh jasta atyn anyq aıta almaı, «Álá», — degen shyǵar, sodan «Láılá», — dep jazǵan ǵoı. Taýyp alǵan balanyń tegin «Tabyldıeva», — dep túsirgen qujatqa.

— Myna jobań aqylǵa qonady, ulym. Tek ázirge anańa aıtpaı turaıyq. Kim biledi bir kedergi bolsa júregi shydamaı, aýyryp qalar. Onsyz da osy kúnge deıin sol qyzdyń joǵalǵanyna ózin kinalap keledi, — dedi áke.

— Jaraıdy kóke, habar menen bolady, — dep aıaqtady balasy áńgimesin.

Toqbergen senbi-jeksenbini ótkize alsashy. Ásheıinde zymyrap ótip jatqan ýaqyt, kókke kúndi baılap qoıǵandaı jyljymaıdy-aý, jyljymaıdy. Jeksenbide qonaqqa shaqyrǵan jer bar edi oǵan da barǵysy kelmedi. Júregi kúpti bolyp, kóńili alańdap, úıden shyqqysy kelmedi.

Áıeli:

— Júrseńshi, baryp qaıtaıyq. Kóp boldy ǵoı naǵashylaryńdy kórmegeli, — dep qoımaǵan soń amalsyz erdi. Onda da oıy onǵa, sanasy sanǵa bólinip otyrdy. Qaıtarda janynda súıretilip kele jatqan jaryna jubaıy:

— Toqa, saǵan ne bolǵan? Bir jeriń aýyryp júr me?! , — dedi kóz janaryna qorqynysh uıalap, úreılene qarap.

«Erlan jolǵa shyǵady. Iá, Allam, bir óziń jar bola gór! Adasqan qulynymdy úıirine qaıyra gór!», — dep atqyzdy dúısenbiniń tańyn Tólepbergen.
Túnde jastyqqa bas qoıarda «Uldan habar joq áli. Ekeýmiz sol balalar úıine ózimiz baryp qaıtsaq qaıtedi», — dep jalynǵandaı bolǵan báıbishesi azannan úndemeıdi. Jánıa mektebine ketti.

Toqbergen ulynyń qaryndasyn izdestirip jatqanynan tis jarmady. Maldardy jaıǵastyryp, mektep jaqqa baryp ýaqyt ótkizip júr. Besinge tarta balasy habarlasty-aý!
— Kóke, balalar úıin taptym. Basshysyna jolyqtym. Meni túsingen boldy. Láılá Tabyldıeva basqa balalar úıinen aýysyp kelgen kórinedi. Aldymen DNK saraptamasyn jasap baryp, sizdiń qyz ba, emes pe dep naqtylaımyz dedi, — dep uly qysqa sóıledi. Ózi minezi aýyr bala, jaıshylyqta da kóp sóz aıtpaıtyn.

— Qashan jasaıdy eken saraptamasyn?

— Aıtpaqshy balanyń boıynda erekshe bir belgi bar ma edi deıdi.

— Qandaı belgi bolýy kerek?

— Bir jerinde qal, ne tyrtyq degendeı..

— Men naqty bilmeıdi ekem. Sheshesinen bilip bereıin, — dep Toqań sasqalaqtap qaldy. Sondaı saýal bolady dep kútpese kerek. Sodan amal joq balasy ekeýiniń josparyn jaryna jaıyp saldy.

— Báse, tymyraıyp júrisińnen bilip em-aý, birdeńe oılastyryp júrgenderińdi. Erlash ta habarlaspaı qoıdy. Qudaı-aý, bular habary shyqqan balany izdemeı ma, dep em-aý!, — dep áıeldik sózsheńdikke salyna bastap edi:

— Áı, zarlamaı, Erlanǵa aıtsańshy, erekshe belgisi bar ma edi?, — dep eri zekip tastady.

— Bar ǵoı, eńbektep júrgende aıaǵyn kúıdirip alǵanbyz...

— Jetisipsiń. Sodan belgi qalyp pa edi?!

— Iá, baltyrynda tyrtyǵy bar, eger jazylyp ketpese...

— Tyrtyqtyń tegistelgenin estimeppin, orny bar shyǵar. Qaısy aıaǵynda edi?

— Oń aıaǵynda...

Toqań telefondy ala salyp estigen málimetterin ulyna jetkizip jatty. Tutqany qoıǵan soń:

— Kishkentaı kezindegi sýretterin, metrkesin de surapty, — dedi jarqyn daýyspen qyzy tabylǵandaı.

— Nesin teksere beredi, Jánıany ala baramyz. Men ekeýine birdeı kóılek áperem. Barǵanda ekeýine birdeı etip kıgizip, qatarlap qoıamyz. Sýdyń qos tamshysyndaı, egiz qozylardaı bolyp turady qaraqtarym, sodan keıin menen týmady dep aıtyp, aıyryp kórsin, — dep Nurıla óz paıymyn aıtty erine.

— Iá, saǵan qarap turǵan zań bar degen. Olar aldymen qanyńdy salystyrady. Kámásıa quryp arǵy-bergi tarıhyńdy tekseredi. Balanyń qalaı joǵalǵanyn, qalaı balalar úıine tap bolǵanyna deıingi joldy zertteıdi. Sodan keıin baryp sheshim shyǵarady. Úkimettiń tizimine ótip ketken balany qaıtaryp alý ońaı deısiń be?, — dep túsindirdi óz jobasyn kúıeýi. Jánıa da syńarynyń tabylatynyna qýanyp, kóńili alyp — ushyp, apasy ekeýine birdeı etip alyp qoıǵan kóılegin kıip áke-sheshesiniń aldynda aınalyp máz.

Sársenbiniń sátine úsheýi jolǵa shyqty. Erlan Taldyqorǵannyń kireberisinde kútip aldy. Tórteý túgeldenip tóbedegi jaqsylyqtan úmittenip balalar úıine keldi.

Erlannyń shapqylaýynyń arqasynda balalar úıindegiler de qulaqtanyp qalypty. Basshysy jaqsy qarsy alyp óz dárigerlerin qosyp Tólepbergen men Nurılany DNK saraptamasyn ótkizýge jiberdi. Jánıa men aǵasy Álıamen tanysa bermek bolyp edi, oǵan tárbıeshiler ruqsat bermedi.

— Eger bala sizderdiki bolmaı shyqsa júıkesine áser etesizder. Bizdiń úıdiń tártibi boıynsha is naqtylanbaı aldyn-ala tanystyrýǵa bolmaıdy, — dedi.

DNK saraptamasyn úsh táýilik kútýge týra keldi. Erlan qyzmetine alańdap, asyǵyp Almatyǵa qaıtty. Toqań áıeli men qyzyn alyp osyndaǵy aǵaıynynyń úıinde úsh kún úsh aıdaı bolyp úmitpen ótkizdi.

— Kóke, men keldim, balalar úıine jetińizder, búgin saraptama qorytyndysyn aıtatyn kún, — dep uly túske taman habarlasyp, shaqyrdy. Úsheýi qustaı ushyp jetti.

Balalar úıi dırektorynyń qabyldaýyna qolynda úlken konverti bar dáriger kirdi. Báriniń kózinshe konvertiniń jelimin ashty da, ishindegi habarlamany daýystap oqydy:

— Berkimbaev Toqbergen Sálimuly men Berkimbaeva Nurıla Óskenqyzynyń ata-analyq saraptamasy Tabyldıeva Láılanyń saraptamasymen 98 paıyzǵa sáıkes keldi. Quttyqtaımyz!, — dep málimdedi.

— Oı, adasqan qulynym-aı!, — dep ákesi daýystap jiberdi qýanyshtan.

— Jaryǵym-aý, adasqan aqqozym-aý!, — dep anasy jylap qoıa berdi.

— Erlan men Jánıa birin-biri qushaqtap janarlary qýanysh jasyna toldy.

Anasynyń ákelgen kóılegin tárbıeshisi Láılá-Álıaǵa kıgizip ertip keldi. Egiz eki qyz qatarlasyp tura qalǵanda shynymen «Nurıladan týmady dep aıtyp kórsin jurt», — degendeı boldy.

On úsh jyl boıy bir balalar úıinen ekinshisine aýystyrylyp, bir aýdannan ekinshi aýdanǵa kóship júrgen Láılá-Álıa qyz óz ata-anasyn, baýyrlaryn tapqanyna sener-senbesin bilmeı kóńili tolqyp, janaryna jas úıirildi. Óziniń syńarynyń baryn da bilmeıtin. Jánıasyn kórgende jan-júregi ezilip, ishki sezimi aǵyl da tegil eljirep, baqyttan basy aınalyp ketti.
Tústen keıin Álıa men Jánıanyń ata-anasy Balalar úıiniń ashanasynda toı jasap, sondaǵy baýyrlastary Láılásin án-jyrmen shyǵaryp saldy.

On úsh jyldan soń ózin adastyryp alyp ketken joldarmen Álıa qyz boıjetken bolyp týǵan jerine, týǵan shańyraǵyna, óz áýletiniń ortasyna ata-anasymen, baýyrlarymen oralyp kele jatty...

---