InfoHub Logo

«Jeke kabınet» jobasy eki jyldan keıin qoldanysqa engiziledi.  

Oqýshylardyń jeke elektrondy kabınetin qurý jobasy týraly jurtshylyqtyń qulaǵdar bolǵanyna kóp boldy. Osy jyldyń aqpan aıynda bilim jáne ǵylym mınıstri Erlan Saǵadıev «joǵalmaıtyn», barlyq aqparat ata-analardyń smartfonynda saqtalatyn besaspap elektrondy kúndelik elimizdegi 7100 mekteptiń 4 myńyna engizilgenin aıtqan edi.

Sonymen qatar «Kúndelik» oqýshylardyń «Jeke kabınetiniń» tek bir bóligi ǵana, onda oqýshynyń balabaqshaǵa kelgennen bastap (eger baryp jatsa) PhD dárejesin alǵanǵa deıingi  oqý úlgerimi týraly barlyq aqparat tolyq kórsetiletin bolady. Bilim berý atestaty men onlaın dıplomdardy tabystaý, sondaı-aq sıfrly bilim berý kýrstaryn uıymdastyrýdy qarastyratyn múmkindikti BǴM 2020 jylǵa qaraı usynbaq.

«Bilim berý salasynyń barlyq toptary boıynsha jumys bastalyp ketti. Bul joba birneshe kezeńnen turady, sonyń barlyǵynan ótýimiz kerek», – dedi bilim jáne ǵylym mınıstrliginiń aqparattyq tehnologıalar departamentiniń dırektory Almat Ishanov.  

«Alǵashqy kezeńde ádisnamany eskere otyryp, júıeni qabyldaýymyz kerek, al ekinshi kezeńde baılanystyń turaqty arnalaryn bir jolǵa qoıýǵa tıispiz.

Aqparat jáne komýnıkasıalar mınıstrligimen birlesip, kepildi baılanys arnalaryn usyný máselesin sheship alýǵa tapsyrma berildi. Osy eki másele sheshilgennen keıin, 2020 jylǵa qaraı bilim berýdiń bir tereze júıesine kóshemiz dep oılaımyn. 2019-2020 jylǵa qaraı bul másele tolyq sheshiledi dep úmittenemiz», – dep tolyqtyrdy ol.  

Bilim berýdiń bir tereze júıesi osyǵan deıin jasalǵan ulttyq bilim berýdiń málimetter bazasy platformasynda jumys isteıtin bolady. BǴM ókiliniń aıtýynsha, buǵan Qazaqstandaǵy barlyq mektep pen kolej engizilgen, endi  barlyq joǵary oqý oryndary qosylady.

«Qazir málimetterdi túrlendirip jatyrmyz, balabaqshaǵa barý úshin esepke alý men joldama berýdiń jańa ádisin qabyldadyq», – dep áńgimesin odan ári jalǵastyrdy Almat Ishanov.

«Qazir bul jobany jańa ádistemege sáıkes óńirlerde synaqtan ótkizip jatyrmyz. Munyń bári jergilikti búdjettiń esebinen iske asyp jatyr. Mektep jasyna jetpegen uldar men qyzdar balabaqshaǵa barýǵa joldama alǵan sátten bastap, málimetter bazasynda olardyń ID kartochkasy jasalady. Odan ári qaraı bul jerge onyń sabaq úlgerimi, densaýlyǵy, ata-anasy týraly aqparat engiziledi. Bala mektepke baratyn kezde qujat jınaýdyń qajeti bolmaı qalady, óıtkeni bizdiń júıege mektep tirkeledi de, júıe balany mektepke ózi aýystyrady. Budan ary qaraı «Kúndelik» júıesinde balanyń oqý úlgerimi týraly málimet kórsetiledi, al eger bala Almatydan Astanaǵa aýysatyn bolsa, onda ol BǴM portalyna kirip, mindetti rásimderdi atqarady, sóıtip onyń oqý úlgerimi týraly barlyq aqparat avtomatty túrde Almatynyń mektebinen Astananyń mektebine kóshiriledi», – dep qosty ol.

Kolejden kolejge nemese bir joǵary oqý ornynan ekinshi joǵary oqý  ornyna aýysqan kezde stýdentterdiń oqý úlgerimi týraly málimetti qaǵaz júzinde emes, tap osylaı, elektrondy tásil arqyly aýystyrý múmkin bolady.

«Ulttyq málimetter bazasynda qaǵazsyz jumys isteý múmkindigin týǵyzatyn biryńǵaı bilim berýdiń saqtaý ornyn jasamaqshymyz. Osyǵan baılanysty júıeni jetildirip jatyrmyz», – dep túsindirdi Almat Ishanov.

Sonymen birge ár oqýshynyń balabaqshaǵa barǵanda jasalǵan ID-kartasy qoldanýshyǵa yńǵaıly bolý úshin onyń JSN-na bekitiledi, ıaǵnı barlyq joǵaryda aıtylǵan operasıalardy JSN arqyly jasaý múmkin bolady.

BǴM  ókiliniń aıtýynsha, oqýshynyń bul qujaty PhD dárejesin alǵanǵa deıin qadaǵalanady, nátıjesinde bilim berý salasynda qoldan jasalǵan dıplomdar joıylady.

Tap qazirgi ýaqytta bilim berýdiń bir terezesi júıesiniń barlyq múmkindikteri ishinen balabaqshaǵa ornalastyrý júıesi qanatqaqty joba retinde iske asýda, sondaı-aq «Kúndelik» elektrondy kúndelik júıesi elimizdiń kóptegen mektebinde qoldanylyp jatyr.

«Endi balalar kúndeligimdi joǵalttym dep syltaý aıta almaıtyn bolady, óıtkeni barlyq aqparat ata-analardyń smartfonyna engiziledi, – dedi Almat Ishanov. – Al ata-analar bolsa, balasynyń sabaq úlgerimin, sabaqqa qatysýyn mektepke barmaı-aq baqylap otyrady».  

Bir tereze júıesi esepke alý men baqylaýdy ǵana emes, sondaı-aq oqýshylardyń qashyqtyqtan oqýyna múmkindik beredi.

«Qazir bizde «Bilimdilik» platformasy bar. Munda barlyq pán kórsetilgen. Bul elektrondy platforma onlaın jáne oflaın-rejımde jumys isteıdi», – dedi bilim berý mekemesi departamentiniń dırektory.

«Ulttyq bilim berý málimetter bazasy júıesinde árbir oqýshy men stýdenttiń «Jeke kabıneti» bolady. Buǵan kirý úshin olarǵa paról beriledi. Osynyń arqasynda oqýshy bilim berý júıesiniń barlyq qyzmetine qol jetkizedi. Bul platforma onlaın-kórsetilim, sonymen qatar jazba jasaýǵa múmkindik beredi. Oqýshylar vıdeokontenttiń onlaın-nusqasyn nemese oflaın nusqasyn paıdalanatyn bolady», – dedi ol.

Almat Ishenovtyń aıtýynsha, bilim jáne ǵylym mınıstrligi osy jumys aıasynda oqýshylarǵa arnalǵan birneshe mobıldi qosymshany iske qosýdy kózdep otyr. Osy oraıda IT-salasynda jumys isteıtin qazaqstandyq bıznestiń múmkindigin paıdalaný da oıda bar.

«Kúndelik» jobasy aıasynda mobıldi qosymsha iske qosylǵan, biraq mınıstrliktiń jumysy munymen shektelip qalmaıdy dep oılaımyz», – dedi ol.

«Naryqqa osy júıege arnalǵan mobıldi qosymsha ázirleýge múmkindik bergimiz kelip otyr. Keıin eń úzdik mobıldi qosymshany tańdap alamyz», – dep qorytyndylady ol.  

Derekkóz: http://abctv.kz
 

---