InfoHub Logo

Mańǵystaýdan Semeıge qatynaıtyn №37 poıyzdyń jolaýshylary vagon ishinde qurttardyń júrgenine shaǵymdandy. Bul týraly Stan.kz aqparat agenttigi habarlaıdy.

Áleýmettik jelide jolaýshylardyń túsirgen vıdeosy paıda boldy. Vıdeoda qurttardyń vagon ishinde, sonyń ishinde tósek-oryn jabdyqtarynda júrgeni kórinedi.

«Mine, kishkentaıy, mynaý úlkeni. Men munda uıyqtaı almaımyn», - deıdi vıdeo avtory.

Jolaýshylardyń narazylyǵy

Jelidegi jazbalardyń astyndaǵy pikirlerde adamdar vagondardyń sanıtarlyq jaǵdaıyna qatysty narazylyqtaryn bildirip, dezınfeksıanyń jetkiliksizdigine shaǵymdanǵan. Keıbiri basqa poıyzdarda da, sonyń ishinde Mańǵystaý – Almaty baǵytynda da osyndaı jaǵdaılarǵa tap bolǵanyn aıtty.

Kompanıa jaýaby

«Jolaýshylar tasymaly» AQ ókilderi jolaýshylardyń ótinishinen keıin, poıyz baratyn stansıaǵa kelgende jospardan tys dezınfeksıalyq óńdeý júrgiziletinin habarlady.

«Atalǵan vagonǵa josparly óńdeý osy jyldyń 30 mamyrynda belgilengen talaptarǵa sáıkes júrgizildi. Normatıvterge sáıkes, jolaýshylar vagondaryn dezınfeksıalaý aıyna keminde bir ret, al deratızasıa (tyshqandardy joıý) toqsanyna keminde bir ret júrgiziledi», - dep atap ótti kompanıa.

Jaýapty tulǵalar jazalandy

Tekseris nátıjesinde poıyz bastyǵy, óndiristik oqytý nusqaýshysy, «Zapadnyı» fılıalynyń Mańǵystaý ýchaskesiniń bastyǵy, sondaı-aq fılıal dırektory, onyń orynbasary jáne bas ınjeneri tártiptik jaýapkershilikke tartyldy. Sondaı-aq, poıyz reıske shyǵar aldynda vagondardy qabyldaýǵa jáne daıyndaýǵa jaýapty barlyq komısıa músheleri jazalandy.

«Jolaýshylar tasymaly» AQ-nyń ortalyq apparatynan arnaıy komısıa «Zapadnyı» fılıalyna jiberildi. Kompanıa jolaýshylardan keltirilgen qolaısyzdyqtar úshin keshirim surap, vagondardyń sanıtarlyq jaǵdaıyn jáne qyzmet kórsetý sapasyn jaqsartý jumystaryn jalǵastyratynyna sendirdi.