InfoHub Logo

Bilim mınıstrligi jańa sıfrlandyrý Tujyrymdamasyn daıarlady. Bul týraly Májiliste bilim salasyndaǵy sıfrlandyrý taqyrybyndaǵy Úkimet saǵatynda QR Bilim jáne ǵylym mınıstri Erlan Saǵadıev málim etti.

«Álem tez damýda. Biz ony kórip otyrmyz. Bizdiń balalar jyldam ózgeretin álemde ómir súretin bolady. Biz basqa memleketterdiń jetistikteri men kemshilikterin saraptap, jańa sıfrlandyrý tujyrymdamasyn daıyndadyq. Osy tujyrymdama negizinde bir úlken suraqqa jaýap berý kerek, ıaǵnı sıfrlandyrý aıasynda balalar, muǵalimder, Úkimet, halyqpen barlyǵymyz qandaı nátıjege qol jetkizemiz? Birinshiden, bul - bar aqparatqa jalpy qoljetimdilik jáne mobıldik. Osy oraıda, balalar, muǵalimder, mektep dırektory, ata-ana bolsyn qajetti aqparatty ári qyzmetterdi kez kelgen jerden óz uıaly telefonynan alýǵa múmkindik bolady», - dep toqtaldy E. Saǵadıev.

Bul turǵyda qoıylǵan baǵa, úı tapsyrmasy, búkil álemniń úzdik sıfrlyq bilim berý resýrstardy, oqýlyqtardy kórýge bolady.

«Sonymen qatar, úıden shyqpaı ol mektepke, kolejderge, joǵary oqý oryndaryna túsý, qujattaryn tapsyrý, basqa mektepke aýysý jáne sol sıaqty jumystardy uıaly telefonmen jasaý múmkindigi bolýy tıis. Munymen qosa, sabaq kestesin jalpy derekter bazasyna jınaqtaı alamyz. Onda oqýshy men muǵalim óz portfolıosyn qaraı alady», - dedi mınıstr.

Onyń atap ótýinshe, sıfrlandyrý halyqqa ashyqtyqtyqty qamtamasyz etedi. Mindetti túrde barlyq aqparat, ıaǵnı mektepterdiń, joǵary oqý oryndarynyń basshylaryn taǵaıyndaý boıynsha, granttardy bólýde, balabaqshaǵa kezekke turýda, atestat pen dıplom alýdyń barlyǵy portalda ashyq bolady.

QazAqparat

---