InfoHub Logo

2021 jyldan bastap joǵary oqý oryndary memlekettik emes óz úlgisindegi dıplomdar beredi. Bul týraly QR BǴM Bilim jáne ǵylym salasyndaǵy baqylaý komıtetiniń tóraıymy Gúlzat Kóbenova aıtty.

«Bolashaq mamandyqty jáne joǵary oqý ornyn tańdaǵan kezde qatelikke boı aldyrmaý óte mańyzdy. Sebebi, ózderińiz biletindeı, 2021 jyldan bastap joǵary oqý oryndary memlekettik emes óz úlgisindegi dıplomdar beredi. Sondyqtan JOO túleginiń keleshekte jumysqa qalaı ornalasatyndyǵy, eńbek naryǵynan oryn alýy mańyzdy bolyp otyr. Mınıstrlik tarapynan 3 jyl qatarynan «Atameken» UKP-men birge JOO-lardyń reıtıńi júrgizilip keledi. Bul reıtıń ótken jyly 109 JOO arasynda júrgizildi. Osy oraıdaǵy mańyzdy krıterııler - JOO bitirgen adamnyń jumysqa ornalasý kórsetkishi, oǵan degen suranys, qansha ýaqyttyń ishinde jumysqa ornalasýy, tapqan jumysynyń ortasha jalaqysy», — dedi komıtet tóraımy.

Máselen, onyń aıtýynsha, ótken jyly joǵary oqý ornyn bitirýshilerdiń jumysqa ornalasý ýaqyty ortasha eseppen 3,5-5 aıǵa deıin sozylǵan. Al ortasha jalaqy 100 myń teńgeden bastalǵan.

«Jumysqa ornalasý kórsetkishin qaraıtyn bolsaq, 61 JOO túlekteriniń 50 paıyzǵa jýyǵy ǵana jumys tapqan. Tek jyldyń sońyna qaraı ǵana bul kórsetkish 74 paıyzdan asyp otyr. Ókinishke oraı, osy reıtıńtiń eń tómengi satysynda turǵan JOO-lar jylda qaıtalanady. Bul reıtıńti mınıstrliktiń jáne Ulttyq kásipkerler palatasynyń saıtynan qaraýǵa bolady. Aıtalyq, qazirgi Aqtaý gýmanıtarlyq-tehnıkalyq ýnıversıteti, Ortalyq Azıa ýnıversıteti, Óńirlik áleýmettik-ınnovasıalyq ýnıversıteti, SILK WAY halyqaralyq ýnıversıteti, Astana ýnıversıteti reıtıńtiń tómengi satysynda tur. Ortalyq Qazaqstan akademıasy, Saparbaev atyndaǵy ınstıtýt, Mıras ýnıversıteti, Syrdarıa ýnıversıteti túlekteriniń jumysqa ornalasý kórsetkishi tómen», — dedi Gúlzat Kóbenova.

---