InfoHub Logo

Myńdaǵan qazaqstandyq mektep túlegi úlken ómirge qadam basyp jatyr jáne olar úshin alǵashqy tramplın — mamandyq tańdaý, UBT tapsyrý jáne joǵary oqý ornyna túsý. QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev tańdaýdy qalaı jasaý kerek ekenin, neden bastap, ne nársege daıyn bolý keregin aıtty.

Eń aldymen, Á. Toıbaev bolashaq mamandyqty tańdaýǵa úlken jaýapkershilikpen qaraýdy, eńbek naryǵynda kásiptiń suranysqa ıe bolýyn eskere otyryp, keleshegin baǵalaýdy usyndy. Departament dırektory bul proseske ata-analary men jaqyndaryn da qatystyrýǵa, tipti synyp jetekshisimen keńesýge shaqyrdy. Bala óziniń múmkindikterin, mamandyqqa beıimin, áleýetin túsinýi qanshalyqty mańyzdy ekenin atap ótti.

«Árıne, óz beıimińizdi eskere otyryp, bolashaǵyńyzdy qalaı elestetetinińizdi, aldaǵy josparlaryńyzdy odan ári qalaı iske asyratynyńyzdy da esepke alǵan jón. Eger siz jaratylystaný ǵylymdaryna kóbirek beıim bolsańyz, tıisti baǵytty tańdaýdy usynamyz, gýmanıtarlyq salada da osylaı. Kelesi qadam – mamandyq sáıkes keletin beıindi pánderdi anyqtaý. Beıindik pánderi bar bilim baǵdarlamalary toptarynyń tizbesin Ulttyq testileý ortalyǵynyń saıtynan tabýǵa bolady», — dep bólisti Ádilet Toıbaev.

Oqýǵa túsýshi Ulttyq biryńǵaı testileý tapsyrady. UBT nátıjelerin eskere otyryp, odan ári bilim berý grantyn taǵaıyndaý boıynsha konkýrsqa qujattar tapsyrý kezeńi júrgiziledi. Bul rásim 13-20 shilde aralyǵynda Elektrondyq úkimet portaly arqyly júzege asyrylady.

«Eger talapker kámeletke tolmaǵan bolsa jáne ESQ-sy bolmasa, ony zańdy ókildiń qatysýymen jasaýǵa bolady. Eger túsýshiniń ESQ-sy bar bolsa, ol qujattardy ózi bere alady, biraq buny ata-anasynyń qatysýymen jasaýdy usynamyn. Elektrondyq úkimet saıtynda bilim berý baǵdarlamalarynyń naqty toptaryn, JOO-ny tańdaýǵa jáne konkýrsqa qatysýǵa ótinish jiberýge bolady. Ótinishke bilimi týraly qujatty, UBT sertıfıkatyn, 086-Ý nysanyndaǵy medısınalyq anyqtamany, jeke basyn kýálandyratyn qujattyń kóshirmesin qosa tirkeý qajet. Oqýǵa túsýshi konkýrs qorytyndysy boıynsha granttyń taǵaıyndalǵan nemese taǵaıyndalmaǵany týraly jaýapty portalda alady. Eger jaýap oń bolsa, siz grant týraly elektrondyq kýálik alasyz», — dedi Joǵary jáne joǵary oqý ornynan keıingi bilim departamentiniń dırektory.

Odan keıin portaldan grant jeńip alǵan JOO-ǵa tirkelýge ótinish beresiz, osy jerde jataqhanadan oryn alýǵa da ótinish tapsyrasyz. .

«Munymen qabyldaý rásimi aıaqtalmaıtynyn aıta ketý kerek. Talapker belgilengen merzimde JOO-ǵa kelip, bilim berý qyzmetin kórsetý týraly shart jasasýy tıis. Eger muny jasamasa, onda tirkeý júzege asyrylmaıdy jáne zańdy kúshine enbeıdi», — dep túsindirdi Ádilet Toıbaev..

---