InfoHub Logo

Qalmaqtyń hany Qaraman qyryq myń ásker alyp, ózbektiń shaharyn shabýǵa ketken eken, Qaınekeı, Tinekeı degen eki qaryndasyn: «Elge ıe bolyńdar» dep. Qaramannyń Boztulpar degen tulpary jylqydan jalǵyz shyǵyp, oınaqtap shaharǵa kelipti. Sony Qaınekeı, Tinekeı kóre sala:

— Iapyrmaý, bul ne sumdyq? Bizdiń jylqyǵa jaý qarasy kóringen eken. Bizge batyp bettep jan kele almasa kerek edi. «Aqqala degen jerden, Tama degen elden Shora batyr degen er týdy» dep edi. Dáý de bolsa sol shyǵar, — degen.

Aýyzdy jıǵansha, qalaǵa shý tolyp ketti. úsh kún udaıy talan-tarajy qylyp, qyrǵyn basylyp, Qaınekeıdi Esim bı alyp, Tinekeıdi Tasan myrza alyp, Qaraman hannyń qyzyn Shora batyrdyń qoınyna salyp, Shorany taqqa otyrǵyzyp, han kóterdi. Sóıtip, arada bir aı ótkennen keıin baıaǵy ózbektiń qalasyn talaýǵa ketken Qaraman ózbekterdi jeńip, qylamyn dep barǵanynyń bárin túgel qylyp, ózbektiń qyzdaryn áskerleriniń basshylaryna alyp berip, erkekterin qul qylyp alyp qaıtyp qalasyna kelse, tamalardyń áskeri óz elin sondaı qylyp turǵanynyń tusynda Qaraman Shoraǵa elshi jiberdi:

— Meniń boz tulparymdy berip jibersin, ózi jekpe-jekke maǵan shyqsyn! Jaman-jasyqtardyń janyn túkke turmaıtyn qanyn shyǵynǵa shyqpaıyq, shyǵarmaıyq. El úshin Esim bı, Tasan onda da bar shyǵar, osynda da bar shyǵar, biraq Shora men Qaraman joq shyǵar, — depti. Shora Qaramannyń ol sózin maqul kórip, qol bastap, sahara maıdan dalaǵa shyqty. Qaraman men Shora jekpe-jekke shyqty. Shora Qaramandy jyqty, alqymynan syqty.

---