InfoHub Logo

Mamyr aıy.

Tań aldy...

Aýyl Nura boıynda. Aspandy túnergen qara bult qaptap, qara túndi óte-móte meńireý qylyp tur. Kóship sharshap kelip, jappalap qonǵan aýyl uıqy tutqynynda jatyr.

Tóńirek typ-tynysh.

Kúnshyǵystan esken maıda qońyr jel ózen boıyndaǵy qalyń taldardyń, butalardyń, shópterdiń bastaryn teńseltip, aqyryn yzyńdap tur. Kórinbeı aqyryn júrip, jumsaq sypsyńdaǵan júırik jel men túnergen taldardyń japyraqtary qaltyrasyp, aqyryn-aqyryn sybyrlasyp, syrlasqandaı. Osy qarańǵy túnde maıda qońyr jeldiń jaıaýlaǵan jumsaq qońyr sarynynan basqa, butalardyń aqyryn yzyńdaǵan baıaý úndi, muńdy kúıinen basqa, tal japyraqtarynyń jat tildi syrly sybyrlarynan basqa, aldyńǵy aýyldan aqyryn, názik syńsyǵan bir yzyń estiledi. Syńsyǵan yzyń júrektiń eń názik sezimdi kúılerin qozǵap, úzilip-úzilip, óksip-óksip estiledi.

Eriksiz tyńdap, qulaǵymdy sala, yzyńǵa qaraı júrdim. Taıaýyraq tyńdaǵanda, yzyńnan kókirekti qars aıyrǵan jasyryn kúıinish, ashshy qasiret estiledi. Muńdy, qaıǵyly zar estiledi.

Túnergen, meńireý qara túnde árbir jan uıqy, tynyshtyq qushaǵynda jatqanda, bul nendeı syzylǵan muńdy yzyń eken? Bul yzyń nege júrektiń muńdy názik tamyryna tıedi? Nelikten júrek bul únmen birge eljirep alyp ushady? Yzyn alystan názik syzylyp úzilip-úzilip sarnaıdy.

Sorly ana ma bul elde

Qaraǵynan aıyrylǵan.

Qarańǵy túnde eńiregen

Qýlyq bıe bola ma,

Qulynynan aırylyp,

Qulynyn izdep zarlaǵan?

Ań ba eken álde oq tıip,

Jantalasyp sarnaǵan?..

Taıanǵan saıyn syńsyǵan yzyń anyǵyraq shyǵady, taıanǵan saıyn júrek eljirep óksıdi. i . Demigip kelsem, ózenniń jaǵasynda bir túp taldyń ne kóziniń jasyn kól qylyp egilip, zar jylap otyrǵan Múslıma eken...

— Qaryndasym, nege jyladyń? Ne boldy saǵan, muńdy qaryndasym, nege jyladyń? Nege egilip, ystyq jasyńdy tógesiń? Aı, muńdy zarly qaryndasym, týysqan baýyrym! Meńireý daýysyńdy estip keldim! Kúıinish qasiretińdi qasiret yzyńdaǵan jylaýyń maǵan da qaıǵyly júregimdi eljiretip qozǵady. Kózime ystyq-ystyq jas emes, sendeı sherli, muńdy, kóziniń jasyn bulaǵan qazaq qyzy kóp! Sendeı qabaǵy, baqyty ashylmaǵan, qazaq qyzy kóp. Olar da jylaıdy. Múmkin senen de kóbirek jylaıtyndar bar shyǵar.

Men bilemin qaýsaǵan shaldyń quldyǵynda, kúńdiginde júrip sarǵaıǵan qazaq qyzyn. Men bilemin nadannyń haıýan nápsisi úshin eki, úsh qatynnyń biri bolyp qyspaqta jylap júrgen qazaq qyzyn. Men bilemin shyn mahabbatpen súıgen ǵashyǵyna qosyla almaı sarǵaıyp, «ýh...» degende kókiregi qars aırylyp júrgen qazaq qyzyn.

Qaryndasym, sherli qaryndasym, Múslımajan! Jylama, tyı kózińniń jasyn. Óter qaıǵyly qara tún! Mine, raýandaǵan tań belgisi. Ashylar baqytyń. Zulmat qara túndi qýyp, jarqyrap tań atar! Dúnıege altyn kún shyǵar! Mine, aqyryndap esken, betten súıgen maıda nuryn shashyp, jer-kókti shattandyryp qarsy aldyńnan kún shyǵar! Mine, aqyryndap esken, betten súıgen maıda jel. Bul – tań habarshysy!

Bul – baqyt habarshysy. Mine, jarqyrap atyp kele jatqan erik tańy... Mine, bul baqyt tańy, qara aldyńa, kútip al baqytyńdy.

---