InfoHub Logo

Taıaýda jyl saıynǵy dástúr boıynsha T.Júrgenov atyndaǵy Qazaq ulttyq óner akademıasynyń túlekterine dıplom tabystaý rásimi ótti. Sharaǵa bilim ordasynyń oqytýshylary men bitirýshi túlekterdiń ata-analary, týystary qatysty. Qalaı desek te, bul kún bıylǵy ýnıversıtet bitirip, úlken ómirge qanat qaqqan túlekterdiń esinde uzaq saqtalmaq.

Saltanatty rásimde T.Júrgenov atyndaǵy Qazaq ulttyq óner akademıasy  rektorynyń mindetin atqarýshy, saıasattaný ǵylymdarynyń doktory, profesor Sháripbek Ámirbekov quttyqtaý sóz sóılep, bakalavrıat pen magısratýrany bitirýshi túlektergi óz qolymen dıplomdaryn tabys etti. Jekelegen túlekterge oqý ornynyń oqý, bilimmen qatar qoǵamdyq jumystarǵa belsene atsalysqany úshin arnaıy alǵys hattar berildi. Aıta ketý kerek, bıyl Akademıa qabyrǵasynan PhD doktorantýrada 7 mamandyq boıynsha 11 maman, 13 mamandyq boıynsha 50 magıstrant jáne 300 bakalavrıat stýdentteri  túlep shyqty.

Sháripbek Ámirbekov, T.Júrgenov atyndaǵy Qazaq ulttyq óner akademıasy rektorynyń mindetin atqarýshy, profesor:
– Qurmetti túlekter! Sizderdi PhD doktor, magıstrlik jáne bakalavr dárejesiniń dıplomyn alýlaryńyzben quttyqtaımyn! Búgin barlyqtaryńyz da joǵary bilim alǵan kıeli qara shańyraq, altyn uıalaryńyzdan qanat qaqqaly tursyzdar. Qazirgi  ýaqytta Akademıa elimizdegi eń alǵashqy óner oqý ornynyń biri – kıeli shańyraq retinde túlekteri álemdik jáne ulttyq mádenıet pen ónerdiń altyn qoryn quraıtyn shyǵarmashylyqtyń zıaly qaýymyn daıyndaıtyn, ózin moıyndatqan ortalyq. Sizder bolashaqta ǵasyrlar  boıy urpaqtan urpaqqa mıras bolyp kele jatqan qazaq halqynyń   ónerin dúnıe júzine pash etip ulyqtaıdy degen senimdemin. Elimizdiń mádenı ómiri men ulttyq óner salasyna attanyp jatqan jańa qadamdaryńyzǵa sáttilik tileımin!

Shara aıasynda akademıanyń eń daryndy stýdentteri óner kórsetti. KSRO halyq ártisi, Qazaqstannyń Eńbek Eri Asanáli Áshimovtyń jáne taǵy basqa tanymal óner ıeleriniń klassyn támamdaýshy túlekter óner uıasynan túlep ushty. Sondaı-aq, «Mýzykalyq óner» fakúltetiniń tanymal túlekteri «Novaıa volna» halyqaralyq konkýrsynyń laýreaty, «Mýzart-life» tobynyń oryndaýshysy Segizbaı Nurhat, «Novaıa volna» halyqaralyq konkýrsynyń laýreaty jáne «Slavánskıı bazar» halyqaralyq konkýrsynyń laýreaty Ernar Sadyrbaev, Halyqaralyq konkýrstardyń laýreattary Gúlnar Kóshenova, Tolǵanaı Pazylaqyn jáne t.b. óz ónerlerin ortaǵa salady.

Sharany túıindegen Sháripbek Aǵabaıuly, akademıanyń qazaqstandyq óner salasynda mártebesi joǵary, ulttyq ónerdiń qalyptasýy men damýy jolynda buqara halyqtyń rýhanı ómirine eleýli qyzmet etip jatqanyn aıtyp ótti.

Baspasóz qyzmeti

---