InfoHub Logo

Kók bazarda qazaqsha úıretken oqýshy eki birdeı grant ıegeri atandy
— dep habarlaıdy Infohub.kz tilshisi.

Týrıske qazaq tilin úıretken oqýshy Nurjol Satybaldy el nazaryn aýdaryp, eki ýnıversıtetten birden oqý grantyn jeńip aldy. Ol 4 jyldyq bilim granttaryn Shveısarıanyń bilim berý mekemesi men Qazaq Amerıka ýnıversıtetinen ıelendi.

Jasóspirimge bul qýanyshty jańalyq “Qyzyq Times” baǵdarlamasy arqyly jarıa etildi. Alaıda grantty paıdalaný úshin Nurjol aldymen mektepti úzdik aıaqtaýy qajet.

Eske salaıyq, ol buǵan deıin fılıppındik bloger Serdjıonyń áleýmettik jelidegi vıdeosynan keıin tanymal boldy. Bloger Almatydaǵy “Kók bazarda” kádesyılar dúkenine kirip, saýda jasap júrgen balamen aǵylshyn tilinde tildesken. Týrıs “Spasıbo” degeninde, bala birden: “No, spasıbo. Ol oryssha aıtylǵan. Qazaqsha ‘raqmet’ dep aıtasyz” dep jaýap bergen.

Nurjoldyń tildik ustanymy men batyldyǵy kópshiliktiń yqylasyna ıe boldy. Áleýmettik jeli qoldanýshylary ony naǵyz patrıot dep baǵalaýda.