InfoHub Logo

Sáýirdiń shýaqty kúni. Dala qys yzǵarynyń ketkenine qýanyp, qojalyqqa kóktemdi shaqyrǵan kez edi. Aspandaǵy jarqyraǵan kún jer ústindegi barlyq tirshilik ıesin erkeletkendeı, jylýyn aıamaı tógip tur. Kún astynda qarlyǵashtar bir-birin qýa ushyp, ásem kúnniń bir múshesi ekenderin sezdirýde.

Bir top adam aýyl shetindegi jazyq jerge jınala bastady. Qoldarynda kúrekteri, aǵash taldary, shelekteri bar. Biraz áńgimeleskennen keıin qoldaryndaǵy kúrekpen jer qazyp, alyp kelgen taldaryn otyrǵyza bastady.

Arada uzaq kúnder ótti. Kóktem jazǵa aýysty. Kúnniń kózi jas egilgen aǵashtardy tań atqannan keshke deıin qaraýsyz qaldyrmady. Arasyna bir-eki kún jaýyn jaýyp, jer ábden shólin qandyryp turdy.

Taǵy bir tań atty. Jas tal tańdy qustardyń ánimen qarsy aldy. Aqyryndap, kúnniń kózi joǵarylap taldyń dál ústine keldi. Tal qýana kún kózine tartyla, jańa ósken aqshyl-jasyl japyraqtaryn sozdy. Ol óziniń kún sáýlesine ǵashyq ekenin sezdi. Kún sáýlesi de óz jylýyn aıamady. Ár keshte bir-birin qımaı, kelesi kúndi asyǵa tosty. Osylaı kóp kúnder ótti.  Jaz sońynda tal biraz boı kóterip, myqty jas aǵashqa aınaldy. Japyraqtaryn jelbiretip kúnge sozyla usyndy, biraq kúnniń kózi óz jylýyn azaıta bastady. Kúzdiń keı kúninde múldem kórinbeıtin sátter boldy. Jas aǵash tabıǵattyń bul minezin túsinbeı qatty qaıǵyrdy. Kóńilimen birge japyraqtary aqyryndap sarǵaıa bastady. Jas aǵash kúnniń kózin saǵynyp, odan úmit úzedi. Ol barlyq ósirgen japyraqtaryn sarǵaıtyp, olardy ózinen úzip jiberedi.

Kúzdiń sońǵy kúnderi jas aǵashtyń butaǵyna torǵaı otyrady. Torǵaı jas aǵashtyń muńyn túsinip: «Sen qatty qaıǵyrma, kúnniń kózi taǵy keledi» —  dep ushyp ketedi. Buny estigen jas aǵash qatty qýanyp, kelesi kóktemniń kelgenin kúte bastaıdy.

Oksana Asylbekqyzy Seısenbaeva

---