InfoHub Logo

Lıvıa jaǵalaýynda bir mıllıon barelge jýyq munaı tıelgen Vilamoura tankerinde jarylys boldy. Keme Grekıalyq TMS Tankers kompanıasyna tıesili. Aldyn ala aqparatqa súıensek, tankerdiń ishinde Qazaqstan munaıy bolǵany aıtylyp otyr.

Jarylys saldarynan kemeniń mashına bóliginde qurylymdyq zaqym tirkelgen. Kompanıa ókilderi kemeniń korpýsynda tesik paıda bolyp, mashına bólimin sý basqanyn habarlady. Soǵan qaramastan, munaı tógilmegen, ekologıalyq zalal anyqtalmaǵan. Ekıpaj músheleri de amansaqtalyp, medısınalyq kómekke muqtaj bolmaǵan.

Jarylystyń naqty sebebi ázirge belgisiz. TMS Tankers baspasóz qyzmeti apat ornynda tekseris júrgizilip jatqanyn, biraq tehnıkalyq aqaý nemese syrtqy faktorlar da qarastyrylyp jatqanyn habarlady. Kemeni tolyq tekserý úshin ony jaqyn arada Grekıaǵa jetkizý josparlanyp otyr. Sol jerde zalal kólemi men qalpyna keltirý múmkindikteri anyqtalady.

Vilamoura tankeri buǵan deıin Qazaqstan munaıyn Reseı porttary arqyly tasymaldaýmen aınalysqan. Ashyq navıgasıalyq derekterge sáıkes, keme 2025 jyldyń sáýirinde Reseıdiń Ýst-Lýga portynda bolǵan. Bul port arqyly Qazaqstan munaıy Eýropa naryǵyna jóneltiledi. Mamyr aıynda tanker Kaspıı qubyr konsorsıýmynyń Novorossııskidegi termınalyna toqtaǵan. Eki jaǵdaıda da tankerge Qazaqstan aýmaǵynan shyqqan munaı tıelgeni habarlanǵan.

Bul oqıǵa Qazaqstan munaıyn teńiz arqyly tasymaldaý qaýipsizdigine qatysty suraqtar týyndatyp otyr. Sarapshylar buǵan deıin de teńiz tasymaly kezinde qaýipsizdik, ekologıa jáne tehnıkalyq jaǵdaılarǵa baılanysty birqatar qaýip-qater baryn aıtqan edi.

Qazirgi ýaqytta Qazaqstan tarapynan bul oqıǵaǵa qatysty resmı túsinikteme berilgen joq. Energetıka mınıstrligi nemese «QazMunaıGaz» ulttyq kompanıasy tarapynan ázirge eshqandaı málimdeme jasalmady. Bul oqıǵa el ishinde de, syrtqy naryqta da munaı eksportyna qatysty alańdaýshylyq týǵyzýy múmkin.