InfoHub Logo

Ózine ǵana tán ózgeshe órnegimen, syrshyl da sulý hám adam janyn tebirenterlik erekshe poezıasymen tól ádebıetimizde esimi altyn árippen jazylǵan daryndy aqyn, qazaqtyń qasterli  perzenti - Maǵjan Jumabaev. Aqyn jyrlaǵan súıispenshilik, týǵan jer, azattyq, oqý-bilim taqyryptaryndaǵy óleńderiniń qaısysyn alsań da, tereń oı men tylsym sezimge toly. Onyń shyǵarmashylyǵynda  aǵartýshylyq-demokrattyq sarynda jazylǵan týyndylarynyń alar orny zor.
Maǵjan Jumabaevtyń «Men jastarǵa senemin», «Kúnshyǵys», «Jazǵy tań», «Óner-bilim qaıtse tabylar», «Qazaǵym» atty birqatar óleńderinen onyń azamattyq rýhy men aǵartýshylyq oı-pikirin ańǵaramyz. Máselen, «Qazaǵym» óleńinde aqyn:
«Kel, qazaq, qoldaǵydan qur qalmaıyq,
Otyraıyq jıylyp, ondalaıyq.
Myń jylǵy etken qýam dep ata zańdy,
Ónerden kesh qalarmyz, oılanaıyq»,- dep,  qarańǵylyqqa qamalǵan qalyń elin  óner- bilimge bet burýǵa úndeıdi. 
«Basqa jurt aspan-kókke asyp jatyr,
Kiltin óner-bilim ashyp jatyr»,-degen óleń joldarynda ol  qazaqtyń  ózge elderdiń kóshine  ilese almaı, bar jaqsylyqtan  qur qalyp júrgenin ókine jyrlaıdy. Sonymen birge aqyn:
«Er jigit óner tabar erte qýsa,
Erinip sharshamastaı, belin býsa» deı kele, damyl tappaı eńbek etip, sharshamaı izdense, er jigittiń óner kiltin taýyp, baqytqa qol jetkizetinine senim bildiredi.  Al «Paıǵambar»  óleńindegi  órshil aqynnyń: 
«Kúnshyǵystan tań keledi, men kelem,
 Kók kúńirenedi, men de kókteı kúńirenem,
Jerdiń júzin qarańǵylyq qaptaǵan,
Jer júzine nur beremin, Kún berem» - degen qýatty sózderi onyń boıyndaǵy azamattyq  rýh pen erteńge degen senimdilikti dáleldeı túsedi. Osy saryndas «Kúnshyǵys» shyǵarmasynda  ol túrki tektes halyqtardyń báriniń bolashaǵynan úmit kútip,  túbinde Shyǵystyń jaryq sáýlesiniń Batystyń qara bultyn seıiltetinin jetkizedi.
«Arystandaı aıbatty,
Jolbarystaı qaıratty
Qyrandaı kúshti qanatty 
Men jastarǵa senemin!» dep, ultty oıatyp, órge súıreıtin keleshek jas urpaqqa senim artyp, qazaqtyń endigi bolashaǵy jastardyń qolynda ekenin jetkizedi.
Maǵjan aqyn óleńderin taldaı otyryp, onda azamattyq rýh pen aǵartýshylyq-demokrattyq sarynnyń basym turǵanyna kóz jetkizemiz. Uly Abaıdaı  týǵan halqynyń erteńine alańdap, jurtyn oqý- ǵylym, óner-bilim nárimen sýsyndaýǵa shaqyrǵan ulaǵatty aqynnyń ár týyndysy- búgingi qazaq eli úshin asa qymbat qazyna.

Ospanova Gúlmarıa Turysbekqyzy
Ál-Farabı atyndaǵy QazUÝ-dyń
fılologıa jáne álem tilderi fakúltetiniń
qazaq tili men ádebıetiniń 2-kýrs stýdentteri

---