InfoHub Logo

Búgin Májiliste Agrarlyq máseleler komıteti uıymdastyrǵan «Agroónerkásiptik keshen ónimderiniń eksporty: problemalary men perspektıvalary» taqyrybyndaǵy dóńgelek ústel ótti. İs-sharaǵa Májilis tóraǵasynyń orynbasary Albert Raý, Aýyl sharýashylyǵy, Saýda jáne ıntegrasıa, Syrtqy ister vıse-mınıstrleri, Qarjy, Ulttyq ekonomıka jáne Kólik mınıstrlikteriniń ókilderi, ulttyq kompanıalardyń basshylary, oblys ákimderiniń orynbasarlary men «Atameken» UKP ókilderi qatysty.

Komıtet tóraǵasy Serik Egizbaevtyń málimetinshe, búgingi tańda aýyl sharýashylyǵy ónimderiniń eksporty 5,1 mlrd AQSH dollaryn quraıdy. Onyń ishinde óńdelgen ónimder 52%, ósimdik sharýashylyǵy 43,5%, al mal sharýashylyǵy 4,4% úles alady. Sonymen qatar, elimizdiń ımport kólemi 6,6 mlrd dollar deńgeıinde tur. Importtyq taýarlar arasynda azyq-túlik ónimderi, bıdaı, shokolad, qant, nan jáne unnan jasalǵan kondıterlik buıymdar, mıneraldy sýlar men irimshik sıaqty taýarlar bar.

Serik Egizbaev, saýda balansynyń aýyl sharýashylyǵy salasynda áli de tıimsiz ekenin atap ótti. Degenmen, 2024 jyly elimizde 25,2 mln tonna astyq jınalyp, ishki suranysty tolyq qamtamasyz etip, eksport áleýetin arttyrǵan. Mal sharýashylyǵy salasynda da ilgerileýshilik baıqalady, Qazaqstan iri qara, qoı eti, qus eti, bal, teri, akvaósirý ónimderin eksporttaýǵa múmkindik alyp otyr.

Dóńgelek ústel barysynda qatysýshylar logıstıkalyq jáne kedendik rásimderdi ońaılatý, naryqtarǵa qoljetimdilik, et ónimderiniń eksporttyq áleýeti, veterınarıalyq shekteýler, ınfraqurylymdyq tosqaýyldar jáne astyqty saqtaý men tasymaldaý máselelerin keńinen talqylady.