InfoHub Logo

      Ótirikten tilin tıa almaǵan adam aramdyqtan yndynyn tıa almas.
     
      Men zıany tıer dep kúdiktengen kisime — jyly júzben kúle qaraımyn. Aqyl synaýynda munym — pishinimmen aıtqan ótirik. Adam balasy zıankes bolǵandyqtan, amalsyz talaı osyndaı is isteledi.
     
      Adam top áskerdi aldap, ólimge apara alsa da, ózine zulymdyqty qoıǵyza almaıdy.
     
      Men tarydaı jaqsylyq qylsam, taýdaı zulymdyǵymdy jasyrǵaly qylam. Sóıtip júrip, adam atanýǵa uıalmaımyn.
     
      Adamdar mal-maqtan úshin soǵysyp, ózi jek kóretin ólimge janyn tapsyrady.
     
      Saq adam sandyǵyn bekite alady. Esti adam tilin tıa alady. Biraq eshkim oıyn tıa almaı¬dy.
     
      Bas kózi jumylady, kóńil kózi jumylmaıdy.
     
      Bárine qanaǵat qyl da, adal eńbek qyl.
     
      Eshkimge erik qaqpasy ashylǵan joq.
     
      Qyzyl gúlge qyzyǵyp saıraǵan bulbul gúl solaryn bilgende zarlamaı qaıtsin.
     
      Ólgende janym aqylymmen bir shyǵatyn bolsa, talaı tamasha kórsem kerek. Eger aqylym da, janym da birjola joǵalatyn bolsa, men — janyp óshken otpyn. Dúnıeni órtesem de, eshkim meni jazalaı almaıdy.
     
      Dúnıede syry ózimen birge kómiletin adam bar ma eken?
     
      Tereń oı, túzý tájirıbesi bar adam ǵaıyptan habar beredi. Áýlıe degeni sol bolsa kerek.
     
      Dúnıege qyzyǵatyn kózimdi topyraq baspaı turyp beınetten qutyla almaıym, osynsha tátti kóretin ómirden tatpaı turyp «ashshy» degen ólim jaqsy bolsa kerek.
     
      Syrymnyń orny bolǵan denem de syrymdy anyq bilmeıdi, dostarym syrymdy qaıdan bilsin.
     
      Adamnan jaman jandy joq, meni jamandaǵan kisi ózinen jaman qyla ala ma? Tátti sóz taýyp aıta almaıtyn aqyn, meni nege kúndeısiń? Meni sen, seni men jaratqam joq qoı!
     
      Bizdiń lapkege kirgen kisi kishipeıildikti alady, ózin satam degen kisi maqtan alýshy alypsatarǵa barsyn.
     
      Shynnyń dýanasy ónersiz maqtanshaqtyń basyn on tıynǵa almaıdy.
     
      Meniń pirim muńǵyl bolsa, ne zıan?
     
      «Meni kim jaratty?» dep oılamaıtyn bas bola ma?
     
      Joqtyq egindigine bir bıdaı ege almasań, barlyq qyrmanynan jalǵyz arpa da ala almassyń!
     
      Moldalar: «Jan deneden shyqqanda qatty qaıǵyrady», — deıdi. Ótirik aıtady – nege deseńiz, jan aqylmen birge shyǵatyn bolsa, dene tutqynynan qutylǵanyna qýansa kerek. Eger aqyly joǵalatyn bolsa, qaıǵyrýdy bilmese kerek.
     
      Dúnıeniń qaıǵysy aq jaýyndaı úzilmeı jaýsa da, qýanysh anda-sanda naızaǵaıdaı jarq etedi de óshedi, bul nelikten? Bul – adam balasynyń qıanatynyń kóptigi, meıiriminiń azdyǵynan.
     
      Zor duspannan qandaı saqtansań, usaq jaýdan sondaı saqtan.
     
      Arystan kórneý keledi. Qaraqurt pen shaıan jasyrynyp shaqsa da, ýyty asa zıandy.
     
      Osy ómirden basqa ómir joq bolatyn bolsa, jaralyspen jaǵalasyp, adamdarmen arpalysyp ómir súrgenshe, jasamaǵan artyq emes pe?

---