InfoHub Logo

   Árbir mektep bitirýshi túlektiń oıynda jaýaby bulyńǵyr myńdaǵan suraq turady. "UBT-ǵa qanshalyqty daıynmyn?", "Ata-anamnyń maǵan artqan úmiti aqtalar ma eken?", "Bolashaqta qandaı mamandyq ıesi bolamyn?", "Onyń elime, ózime tıgizer paıdasy qandaı bolmaq?" degen sansyz saýaldyń meniń de oı-sanamdy shyrmaǵanyna az bolǵan joq. Osylaı oı jeteginde júrgende, ýaqyttyń qalaı zymyrap ótkenin de baıqamaı qalasyń." Nar táýekel!" dep, bir mamandyqty tańdaısyń. Ol ata-anańnyń ne dostaryńnyń aıtqany emes, óz júrek qalaýyń bolmaq! Barlyq jas túlek óz mamandyǵyn júrek qalaýymen tańdaıdy desek, artyq aıtqan bolarmyz. Alaıda meniń júregimniń qalaýy bolashaǵymnyń adastyrmas qazyǵyna aınalaryna senemin.

    Búldirshin shaqta kópshiligimiz ustaz bolýdy armandaımyz. Birinshi synypqa kelgen balaqandarǵa álipbı úıretip, qolyna qalam ustatyp, jazýǵa baýlýdy baqyt sanaısyń. Alaıda joǵary synypqa kelgen shaqta, nege ekeni belgisiz, ol oıyńnan qaıtasyń da, múldem basqa salada qyzmet atqarýdy jón kóre bastaısyń. Oılanyp júrgende, bul máselege ata-anań da kirisip, qoldaý kórsetip, qajet bolsa, nusqaý da berýge daıyn ekenin bildiredi. Alaıda meniń ata-anam mamandyq tańdaý múmkindigin óz erkime qaldyrdy. Oǵan ózim ishteı máz bolamyn. Erkin bolǵanǵa ne jetsin!

    Tańdaý erkindigine ıe bolǵan meniń júregim "Jýrnalısıka" dep soǵa berdi. Anam qoldaı jónelgende, tipti, qanat bitkendeı boldy boıyma. "Kóptegen is-saparlarǵa shyǵasyń, elimizdiń, shet eldiń ataqty adamdarymen júzdesip, suhbattasasyń" degende, birden birneshe armanymnyń oryndalatynyn sezgendeı boldym. Biraq jalǵyz qalaýmen uzaqqa bara almasymdy da túsinemin. Sebebi kógildir ekrannan kórip júrgen túrli baǵdarlamalar men gazet-jýrnaldarda jarıalanǵan tilshi maqalalarynyń uıqysyz túnder men mazasyz kúnderdiń jemisi ekenin aıtpasa da sezetinmin. Demek, bul salada men alatyn asýlar men belester kóp bolsa kerek-ti.

     Saltanat Bekjigitova, Dana Nurjigit, Maııa Veronskaıa, Beısen Quranbek sekildi myqty jýrnalıserdi ózime úlgi tutamyn. Maǵan, ásirese, Dana hanymnyń  bir mınýt ishinde qoıylǵan suraqtarǵa aspaı-saspaı, naqty jaýap bergeni qatty unady. Tań qaldym. Men de bir kúni osy kisiler sekildi kógildir ekranda baǵdarlamalardy júrgizetin bolamyn. "Armanyńdy maqsatyńa aınaldyr, Jetersiń sonda muratqa" dep, dál aıtylǵan. Mine, osy armanymnyń oryndalýy úshin maqsatymdy nyqtap, ózimdi qaırap, shyńdaý ústindemin. Árıne, ádebıet, tarıh sekildi pánder kóp eńbekti talap etedi. Alaıda qıyndyqqa tózimsiz qyzyńyz men emes. Qalaı da bilim grantyn jeńip alyp, iri qalalardyń birinde oqımyn dep maqsat qoıdym. Bálkim, Astana ıa Almaty bolar, bilmedim. Basty bilerim- joǵary oqý ornyna túsip, ata-anamnyń úmitin aqtaý. "Ózińe sen, ózińdi alyp shyǵar, Eńbegiń men aqylyń eki jaqtap" degen Abaı atamyzdyń sózin dál qazirgi ýaqytta ózime uran ettim. Bul búginniń ǵana emes, bolashaǵymnyń da buljymas urany bolyp qala beredi. Sebebi Abaı atamnyń sózinde ómirdiń shyndyǵy bar.

---