InfoHub Logo

Ertede Qotyr qoja degen molda din, sharıǵat jaıyn sylqytyp soǵatyn molda bolypty. Jazdyń bir kúninde Qotyr qojany aýyldasy qonaqqa shaqyrypty. Adamdar kóp jınalǵan eken. Molda tór aldynda otyryp alyp, «ótirikti shyndaı, shyndy Qudaı urǵandaı» qylyp áńgimesin soǵa beripti.

Otyrǵan kóptiń ishinde kórshi aýyldyń Myqy degen jigiti de bolatyn. Ony «Myqy» deıtin sebebi — ol qyrǵyz elinde týypty. Týǵanda kip kishkentaı, shegedeı shymyr bolǵan soń, kindigin kesken shesheleri «ózi jylamaıtyn shegedeı eken, atyn Myqy qoıaıyq» depti. Sodan onyń aty Myqy atalyp ketipti. Ol óse kele ákesi sıaqty qara sózge des bermeıtin sózsheń bopty.

Álgi úıdiń egesi Myqynyń qıynnan sóz tabatyn sheshendigin bilip, ony moldaǵa qaırap salady. Sóz arasynda Myqy moldany bir-eki ret súrindirip tastaıdy. Myqynyń syryn biletin Qotyr qoja sózden jeńiletinin bilip, endi ymmen tildesýge kóshedi.

Molda Myqyǵa suq qolyn kórsetse, Myqy úsh saýsaǵyn kórsetedi. Molda bes saýsaǵyn tarbıtsa, Myqy oǵan eki qolyn jaıyp, kóz aldyna ustaıdy. Molda basyn shaıqasa, Myqy tilin shyǵaryp, judyryǵyn túıedi.

Osydan keıin shamasy Qotyr qoja jeńilse kerek, ornynan turyp, úıden shyǵa beripti. Molda ketken soń kópshilik: «Káne, ne dedińder, biz túsinbedik qoı», — desedi. Sonda Myqy:

— Moldanyń bir saýsaǵyn kórsetkeni — «bir Qudaıdy bilesiń be?» degeni edi. Oǵan úsh saýsaǵymdy kórsettim, ol: «Bir Qudaı túgili men Muhammed paıǵambardy da, Isa paıǵambardy da bilemin» degenim edi. Moldanyń bes saýsaǵyn kórsetkeni — «bes ýaqtyly namaz oqısyń ba?» degeni edi. Men oǵan eki qolymdy jaıyp, kóz aldyma ustadym. Ol: «Men namazyńdy bilmeımin, kitap oqımyn» degenim edi. Eń sońǵy ret moldanyń basyn shaıqaǵany — «Qudaıdan bezgen» dep maǵan narazy bolyp, til tıgizgeni edi. Men oǵan tilimdi kórsetip, judyryǵymdy túıgenim «tilińdi tart, bolmasa kóresiń!» degenim edi. Sol sol eken, moldaekeń jónep bergen joq pa? — dep Myqy sózin aıaqtapty.

---