InfoHub Logo

- Ne boldy, janym?! Taǵy da túsińnen shoshydyń ba?! Taǵy da sol túsińe qyzdaryń kirdi me?! Kishkene demalshy, janym!

- Uıyqtaı almaımyn, Berden! Uıyqtaı almaımyn! Osy bir on úsh qyzdy ýaıymdap uıyqtaı almaımyn endi! Júrshi, aýlaǵa shyǵyp keleıik! Júregim bir túrli bolyp tur, Berden!

***

- Mine, kórdiń be, janym? Kóshe degen tym-tyrys qoı.

- Sonda da kósheni bir jaǵalap qaıtaıyqshy, Berden!

- Janym-aý, osylaı kún saıyn uıyqtamaı kóshe jaǵalaımyz da júremiz be?!

- Renjimeshi endi, Berden!

- Janym-aý, ol qyzdardy nesine ýaıymdaı beresiń?! Janynda mamalary bar emes pe?

- Mamalarǵa senýge bolmaıdy, Berden! Qyz degen shyǵyp keteıin dese, terezeniń kózinen de shyǵyp kete beredi. Anaý ne, Berden?! Aǵarańdap turǵan anaý ne, Berden?!

- Mynaý ma?! Janym-aý, esek emes pe?! Mine, jaryqty jaǵyp kórseteıin be? Aq esek eken. Janynda qodyǵy da bar.

- Qudaıym-aı! Kózime aq fartýk elestep ketkeninshi!

- Janym-aý, qyzdar túnde aq fartýk kıip júrmeıdi ǵoı?

- Sen olardyń ne kıip júretinin qaıdan bileıin dep ediń, Berden?!

- Janym-aý, osylaı túnimen júre beremiz be endi? Saǵan uıyqtaý kerek qoı! Azanda sabaǵyń bar emes pe?

- Alty sabaǵym bar, Berden.

- Áne, kórdiń be?! Saǵan uıyqtaý kerek. Bulaı jalǵasa beretin bolsa, densaýlyǵyńdy qurtasyń ǵoı.

- Densaýlyqty oılaıtyndaı bolyp júrmin be, Berden? Kózimdi jumsam boldy, on úsh qyzym bireýmen kezdesip turǵandaı kórinedi.

- Sonda da saǵan kóz shyrymyn alý kerek, janym!

- Jaraıdy, Berden! Renjimeshi endi! Meni súıip qosyldym dep ediń ǵoı?

- Súıip úılendim dedim ǵoı, janym! Súıip úılendim!

***

Arada ýaqyt ótedi. Baıaǵy on úsh qyz 10, 20, 30 jyldyqqa keledi.

- Óı, bar bolǵyrlar! Keldińder me? On úshiń de túgel keldińder me? Baıaǵyda senderdi ýaıymdap ólip qala jazdaıtyn edim.

- Bizdi nesine ýaıymdaı berdińiz, apaı? Jigitpen júrgizbeıtin edińiz ǵoı?

- Jigitpen júrip neǵylaıyn dep edińder?! Báleniń bári sol jigitpen júrýden bastalady. Bir uly pedagog aıtqan: "Mahabbat degen sózdi estigende basqa qyz-kelinshekterdiń júregi tolqynystan dir ete qalatyn bolsa, muǵalımanyń júregi qorqynyshtan dir ete qalady" dep.

- Bitirip ketken uldarmen sóılesip turǵanymyzdy kórseńizder, jınalystan
jınalys.

- Báleniń bári sol bitirip ketken uldardan keledi ǵoı ózi.

- Ózimizdiń klastyń uldarymen de sóılestirmeıtin edińizder?

- Olarmen ne sóıleseıin dep edińder? Otyrǵan joqsyńdar ma bir klastyń ishinde atysyp-shabysyp, bir-birlerińe qaǵaz laqtyrysyp oınap.
Maǵan syılyq ákeldińder me? Ózderiń shet elge shyǵyp, kelip júr ekensińder.

- Apaı, sońǵy qońyraýdaǵy ánderdi aıtaıyqshy!

- Aıtamyz! Nege aıtpaıdy ekenbiz?!

- Apaı, sońǵy qońyraýda qýanyp júrdińiz ǵoı? Bizden qutylǵanyńyzǵa qýanyp júrdińiz be?

- Senderden qutylǵanyma qýanyp nem bar? Jaýapkershilik degen bolady.

- Bizge esh ýaqytta muǵalim bolma deýshi edińiz ǵoı?

- Sony sender tyńdaıtyn ba edińder? Bolypty ǵoı myna qyz! Sen qyz muǵalim bolypsyń ǵoı?

- Apaı, izińizdi qýyp júrmin ǵoı.

- Meniń izimdi nesin qýasyń, qaraǵym?! Meniń izim osy aýyldyń kóshesinde qaldy ǵoı. Sender úshin tún uıqymdy tórt bólgen apaımyn men.
 

---