InfoHub Logo

Naýryz aıynda Qazaqstan aýa raıynyń qandaı bolatyny belgili boldy. «Qazgıdromet» RMK mamandary aldyn ala sınoptıkalyq boljamdy usyndy. Oǵan sáıkes, aldaǵy aıda elimizdiń basym bóliginde aýa temperatýrasy normadan joǵary, al jaýyn-shashyn mólsheri normadan artyq bolady dep kútilýde.

Bul týraly Infohub.kz aqparat agenttigi habarlaıdy.

Aı ishinde aýa raıy turaqsyz bolady

Mamandardyń aıtýynsha, naýryz aıynda aýa raıynyń turaqsyz sıpaty baıqalady. Elimizdiń soltústik jartysynda negizinen qar, al batys jáne ońtústik óńirlerde jańbyr men qar aralas jaýyn-shashyn bolady. Keı kúnderi jel kúsheıip, boran soǵyp, tuman túsip, kóktaıǵaq qubylystary da oryn alýy múmkin.

Soltústik pen shyǵysta qys jalǵasady

Elimizdiń soltústik, shyǵys jáne ortalyq aımaqtarynda naýryz aıy qystyń jalǵasy retinde seziledi. Bul óńirlerde sýyq aýa raıy, qar, boran, tuman men kóktaıǵaq jıilep, qysqy sıpat saqtalady. Degenmen, aıdyń birinshi onkúndiginde temperatýra birtindep kóterilip, túnde -28-38 gradýstan -5-10 gradýsqa deıin, kúndiz -10-20 gradýstan 0-8 gradýsqa deıin jylynady. Onkúndiktiń sońynda temperatýra qaıta tómendeýi yqtımal.

Batys pen ońtústikte kóktem erte seziledi

Batys óńirlerde naýryz aıy da aýyspaly sıpat alyp, sýytý men jylytý kezeńderi almasyp otyrady. Birinshi onkúndikte túnde aýa temperatýrasy -5-15-ten 0-5 gradýsqa deıin, kúndiz 0-8-den -3+7 gradýsqa deıin ózgeredi. Al ońtústik óńirlerde birinshi onkúndikte túnde temperatýra -8+2 gradýsqa, kúndiz +5+15 gradýsqa deıin kóteriledi.

Aıdyń ekinshi jáne úshinshi onkúndikterinde elimizdiń soltústik, ortalyq, shyǵys bólikterinde túnde temperatýra -3+2-den -8-15 gradýsqa deıin, keı jerlerde -20-25 gradýsqa deıin tómendese, kúndiz +5+13-ten 0-8 gradýsqa deıin ózgeredi. Ońtústik-batys jáne ońtústik Qazaqstanda kúndiz keı kúnderi +13+22 gradýsqa, al eń ońtústik óńirlerde +27 gradýsqa deıin jylynýy múmkin. Alaıda, antısıklon áserinen qysqa merzimdi sýyq tolqyndary da kútilýde.