InfoHub Logo

Shektiniń batys jaq baıulymen shekarasynda Shańdyqul-Tamdyqul degen bir orynda el jaılaıtyn eki sýat kóli bolady. Bir jyly eki kóldiń ońtústik beti, bir bıikteý orynǵa bir býaz aıdahar túsip jatyp alady. Sýatqa kelgen mal men adamǵa aıbat shegip, jaman daýyspen ysqyrǵan soń, úrkip mańynan kóshedi. Jaz aıynda sýattan qysylǵan halyq qos atpen arjaqtaǵy Naýsha batyrdy shaqyrady. Naýsha keledi. El adamdaryn jınap jatqan jerin kórmek bolyp, kóp adam aıdahardyń ústine baryp qalǵanda, aıdahar basyn kóterip ysqyryp ǵaıbat shekkende, attary daýysynan qorqyp, sileıip-sileıip jata qalady. Adamdar keıin qashyp shyǵyp alystan baryp toqtaǵan soń, Naýsha qolyna qylysh alyp, aıdaharǵa jaıaý ketedi. Qalǵan kópshilik tilek tilep, bıikteýden qarap turysady. Naýsha bardy-aý degenshe, Naýshanyń aıdaharǵa qaraı dedeńdep júgirgenin, Naýshanyń qylyshyn sermegenin, sol mezette aıdahardyń quıryq sermegenin kórip turysady. «Apyr-aı, tartyp jutty- aý!» — desip bir qatary shýlap, jylasady. Birtalaı ýaqyt Naýsha da, aıdahar da kórinbeı qalady. Birazdan keıin Naýshanyń aıdahar janynan turyp, júgirip kele jatqanyn kóredi. El shýlap, qýanysady. Naýshanyń túsi-óńi qashyp keledi. Kópshilik batyrdan shýlaı surasady. Naýsha: «Dushpannyń basyn qaqtym, biraq qaqqanym qursyn, quıryqpen uryp taldyryp tastady, esimdi jıyp, kózimdi ashsam, aıdahardyń quıryǵy ústimde jatyr eken. Sonan jırenip tura qashtym, barýda qoryqpaı baryp edim, jaqyndaǵan soń ózine dedeńdetip tartty, aýzyna túspes buryn basyn qaǵyp úlgerdim, biraq ta quıryǵymen uryp jyqty», — deıdi.

Naýsha kópshilikti ertip aparyp kórsetken. Basy anadaı jerde jatyr, biraq keýdesi, quıryǵy tiri, basy sap-sary altyndaı, baýyrynda birneshe aıaǵy bar desedi.

Oqýǵa keńes beremiz:

Naýsha batyr týraly

Syrymnyń Nuraly handy shabýy (İİ nusqa)

Baımaǵambet sultan men Syrym batyr

---