InfoHub Logo

Uzaq ýaqyt boıy dene shynyqtyrýmen aınalyspaǵan adam aýyr jumys istep, denesine kúsh túsirse denesiniń aýyratynyn jaqsy biledi. Sebebi bul aýrý 5-6 saǵattan keıin bastalyp, kelesi kúni artady. Nelikten dep oılasańdar? Qarqyndy jumys kezinde bulshyq et anaerobty rejımde jumys istep, ottegi jetispeýshiliginiń saldarynan energıa qoryn jumsaıdy. Anaerobty prosestiń sońǵy ónimi – sút qyshqyly bolǵandyqtan, eger túsetin kúsh ortasha bolsa, sút qyshqyly bulshyq etten qan arqyly shyǵady. Al kúsh aýyr bolatyn bolsa, sút qyshqyly bulshyq etten shyǵyp úlgermeı, júıke ushtaryn titirkendiredi. Sondyqtan bulshyq etterimiz aýyrady.

Bulshyq etti aýyrtpaý úshin ne isteýge bolady?

1) Dene shynyqtyrýmen únemi shuǵyldaný kerek. Mundaı aýrý uzaq ýaqyt sportpen shuǵyldanbaı, az ýaqytta denesine qarqyndy kúsh túsirgen adamda bolady. Sondyqtan qalypty jattyǵý jasap deneni mashyqtandyrý kerek. Sonda ǵana aýrý sezilmeıdi. Bul sút qyshqyly óndirilmeıdi degen sóz emes. Dene ádettegi kúshke úırengen soń deneniń bulshyq eti aýyrmaıtyn bolady.

2) Birinshi kúni denege birden aýyr kúsh túsirmeý kerek. Kúshti birtindep arttyrý kerek. Kóp adamdar jattyǵýdan keıin deneniń aýrýyn qalypty jaǵdaı dep sanaıdy. Alaıda belgili bir aýrý aǵzada belgisiz jaǵdaıdyń oryn alǵanyn bildiredi. Iaǵnı bulshyq etterge shamadan kóp kúshtiń túsýin baıqatady.

3) Jattyǵý aldynda deneni qyzdyrý kerek. Eger buǵan deıin dene aýyryp turǵan bolsa, eshqashan jattyǵýdy toqtatpaý kerek. Óıtkeni jattyǵý jasaý aǵzadaǵy zat aınalý prosesin jyldamdatady. Sondyqtan jattyǵý qarqynyn ǵana azaıtý qajet. Denege massaj jasaý, dýsh qabyldaý – jattyǵý barysynda jıyrylǵan bulshyq etterdi sergitedi. Mol sý ishý – zat almasý prosesin jaqsartyp, qajetsiz ónimderdi deneden bólip shyǵarýǵa kómektesedi.

---