InfoHub Logo

Zaboı ishi tunyp turǵan qoıý shań bolatyn. Dem alýdyń ózi qıyn. 12-14 saǵatqa sozylǵan jumys ústinde tireýsiz zaboıdyń tóbesine shytynap /jaryla tónip/ turǵan kómir porodosynyń astynda qalyp qoıar ma ekemiz dep únemi qaýiptenip júresiń. Onyń ústine sońymyzdan júrgen baqylaýshylardyń bizge aqyrǵan daýysy da aýany jańǵyryqtyrady. Olar jáne shyn bolsyn, ótirik bolsyn «az kináli boldyń» dep eseptese-aq, shalajansar bolǵanynsha sabaıdy. Nıkolaı Nemkov degen baqylaýshy boldy. Onyń qolynda únemi qorǵasynnan ózek salyp ógizdiń jon terisinen órgizgen bileýit qamshysy bolady. Zaboıǵa tústi-aq sol «quralyn» qoldanady.

Bir kúni jumys aıaqtalǵan kez edi. Ón boıymyzdan ter quıylyp, sharshaǵan bizder azdap otyryp dem aldyq. Bir ýaqytta kókten túskendeı Nemkov shyǵa kelsin. Ol:

— Nemene bitirip tastap otyrsyńdar ma? Bárińdi qýaıyn ba osy jumystan? — dep arǵy-bergimizden sypyra boqtaı keldi.

— Baqylaýshy myrza! — dedi sol jerde shanashy Mustafın deıtin joldasymyz jasqana sóılep. — Qaıdan biz jalqaý bolamyz? Únemi alaqanymyz úldiregenshe jumys isteımiz. Saý jer bolmaıdy.

Sol-aq eken, nege ekeni belgisiz, Nemkov burynǵydan beter qaharlana tústi. Bar kúshimen álgi jumysshyny qolyndaǵy doıyrymen sabaı bastady. Sabalaý qolyndaǵy buzaý tis doıyr qamshynyń saby synǵanda ǵana aıaqtaldy. Soqqyǵa jyǵylǵan adam óziniń kóńilsiz lashyǵynda aıdan artyq jatty, sodan soń ǵana jumysqa shyǵýǵa shamasy keldi. Amaly qansha sorlynyń, taǵy da ony ashtyq aıdap zaboıǵa túsirdi...

Barlyq jumysshylardyń sońynan úzdiksiz baqylaý júrgiziletin. Bas esepshi Zapeval degen esepshilikpen qosa, tyńshylyq jumysty da júrgizedi. Ol kimniń ne istep jatqanyn baqylap, ne aıtyp jatqanyn tyńdap tynym tappaı júgiretin de júretin, egerde bireý-mireýdiń bastyqtarǵa qarsy unamsyz sózder aıtyp jatqany qulaǵyna shalynsa-aq, qojaıyndarǵa jetkizedi... Ol adamǵa jazalaýshy kúttirmeı-aq jetip keletin.

Nemkov «kóńilin kóterýden de» qashpaıtyn. Keıde ol lavkaǵa barady, onyń qorqaýlyǵyn bile qoımaǵan jumysqa jańa túskender kózine túse qalsa-aq, ol olardy lavkaǵa shaqyrady. Onyń ámirimen shaqyrylǵan jas jumysshylarǵa kóılek, paltolar kórsetiledi. «Kóńiline ne unasa, sony alýyna bolady» dep ózi turyp uıalmaı tańdap alýǵa úgitteıdi.

Ol baqytsyzdar qýanady, bar táýirinen tańdap alyp kıinedi de sheksiz alǵysyn aıtyp, ketýge yńǵaılanady. Nemkov óńeshi jyrtylǵansha qarqyldap kúlip, álgi «ıgilik kórsetip, jaqsylyq jasaǵan» adamyn qamshynyń astyna alady.

---