InfoHub Logo

Ol kezde men býynym bekip, buǵanam qatpaǵan jas edim. Tar zaman meni de meıirimsiz ýly tyrnaǵyna ildi. Jas ta bolsam bir tilim nan úshin jumys isteýge májbúr boldym. «Ana súti aýyzyńnan ketpegen jassyń ǵoı, jumys isteýge áli erte» degen aǵylshyn joq. Meniń Spass zavodyndaǵy qara peshtiń shlagyn tasıtyn táshkeshi etip jumysqa qoıdy. Bul jumys men sıaqty bala emes, tepse temir úzetin álýetti jigitterge de qıyn edi.

Kúnine 12 saǵat boıy táshke tartam. Shlakty aparyp tógetin jer qara peshten 30 metrdeı. Jumystan dińkeń quryp shyǵyp, úıge áreń jetetin edim. Ol kezde úı deıtin úı bar ma, jerden qazylǵan úıshik bolatyn.

Aǵylshyndar jumysshylardyń eńbegin súlikteı sordy. 12 saǵat tıtyqtap eńbek etkende ishsek asqa, kısek kıimge jarymaıtyn edik. Aǵylshyn zavodynda birneshe jyl istegende ushy-qıyry joq beresiden aıyrylǵanym joq.

Áli esimde. Aqyrǵan aqpan aıynyń ishi edi. Bir kúni jumysta júrgenimde alaı-talaı boran soqty da ketti. Borannyń qattylyǵy sondaı — tipti aıaq astyn jóndi kóre almaısyń. Dúleı tabıǵatqa ne shara? Táshke tartýǵa bolmaıdy, qara peshten damylsyz shyqqan shlak úıilip qaldy.

Tap osy kezde zavod qojasy aǵylshyn Oravson degenniń sap ete túskeni bar emes pe. Qoryqqanymnan shlak toly táshkeniń tutqasyn ustap, kótere berdim. Jýan judyryq oń jaq shekem nen sart ete tústi. Qulap qalyppyn. Esimdi jıyp, kózimdi ashsam, jumysshylar meni qorshap tur eken. Olardyń meni aıaǵan, aǵylshynǵa qahar tókken daýystary estiledi.

Jumysshylardyń arasynda ashtyq pen qaıyrshylyq shyńyna jetip, ólgenderdiń sany tipti kóp boldy. Talaı jumysshylar ashtyq azabyn kórip óldi. Jumysshylardyń arasyndaǵy narazalyq pen yzaly ashý kúsheıe bastady. Aǵylshyndar kináni ózderine jýytpaý úshin ólgen jumysshylardy ashtyq pen aýyr eńbek jaǵdaıynan emes, qaıdaǵy bir qaterli aýrýdan óldi dep jar saldy. Olar ózderiniń bul saıqaldyǵymen jurtty ılandyrý úshin ólgen bir kenshiniń súıegin kópshilik aldynda otqa órtemekshi boldy. Muny kórgen poselka halqy qatty yzalandy. Toptalǵan adamdar rýdnık qojaıyndarynyń turǵan jerine qaraı bettedi. Munda olarǵa prıstav Sokolov qarsy shyqty. Ol qylyshyn jalańdatyp, jınalǵan halyqty qýa bastady. Aqyrynda bul is mynamen tyndy: aǵylshyn Mansfeldiń buıryǵy boıynsha prıstav Bekova Tákijan degen qazaq áıeliniń qolyn qylyshpen shaýyp tastady. Sonan keıin bul áıeldi «búlik shyǵardy» degen syltaýmen Aqmola túrmesine aıdap jiberdi.

Mundaı shekten shyqqan zulymdyqqa jumysshylar tóze almady. Olar úsh kúndeı jumysqa shyqpaı, mys qorytatyn peshti toqtatyp tastady. Parfenov, Qozybaev sıaqty jumysshylar ereýil bastap, aǵylshyndarǵa qatty narazalaq bildirdi. Ashynǵan halyqtyń uıymdasqan ereýilinen qoryqqan aǵylshyndar Bekova Tákijandy tutqynnan bosatyp, Aqmoladan Spass zavodyna jetkizip saldy. Arsyz aǵylshyndar osyndaı neshe túrli aıýandyq ister istedi....

---