Bir Ógiz aıdyn shalqar kólge keldi,
Jaǵalap sýaty bar jerge keldi.
Shildeniń sarsha tamyz ystyq kezi,
Bek qatty qany qashyp shóldep edi.
Sý iship, kóldiń shyqty jaǵasyna,
Mal edi kóz toıatyn qarasyna.
Artyqsha bir kólbaqa kúnshil eken
Sol kóldiń baqasynyń arasynda.
Ógizdi sýǵa toıǵan Baqa kórdi,
Sekirip kórshisine jetip keldi.
«Bolamyn men de sonaý Ógizdeı», - dep,
Jel tartyp, isip-keýip, qarnyn kerdi.
Surady joldasynan: «Toldym ba? - dep,
-Ógizdeı anaý turǵan boldym ba?» - dep.
Ógiz ben ekeýine qarap turyp,
Joldasy jaýap berdi sondaı búı dep:
«Ógizdeı bolý saǵan qaıda, shyraq,
Arańyz ekeýińizdiń tym-aq jyraq.
Onymen birdeı bolyp tolmaq túgil,
Qalpyńnan asqan joqsyń artyǵyraq».
«Qarashy, endi qandaı boldym?» - dedi, -
Mine, men jańa ábden toldym», - dedi.
Joldasy taǵy qarap denesine:
«Qalpynda qarań menen formyń», - dedi.
Dúnıede munan kúnshil kem-di Baqa,
Zorlandy qarnyn kerip endi Baqa.
Shydamaı juqa qaryn kerýine,
Jarylyp sol arada óldi Baqa.
Kúnási kúndegenniń jaman qatty,
Kúndeme bireýge Alla bergen baqty.
Ógizdi kúndep, sondaı bolamyn dep,
Kólbaqa onan qansha paıda tapty?!
Áýelde Qudaı ólshep bergen dene,
Qanshama zorlaǵanmen artylmapty.
Naqyl sóz «Álin bilmes álek» degen
Osyndaı áýre bolǵan jannan qapty.

---