(A. S. Pýshkınnen)
Tańǵajaıyp bul qalaı hat,
Maǵynasy – alys, ózi jas?
Sózi oramdy, ár túri jat,
Jáne ádepti, jáne ras.

Jas júrektiń tolqynyn dóp
Jaza alypsyń toltyryp.
Boıdy jeńip bul asyl lep,
Turdy tıtyq kóp quryp.

Til býynsyz, boı – taza gúl,
Aqyly artyq, ary zor.
Ol – perızat, oıla, óziń bil,
Ne bolady bolsa qor?

İshim ólgen, qur denem cay,
Bosqa úreıim júr meniń.
Jaramaıdy beker aldaý,
Teńiń emes men seniń.

Pende kórgen bar qyzyqtyń,
Bárin ishken sum júrek.
Aınyǵan soń, sen jolyqtyń,
Aıtyp-aıtpaı ne kerek?!

Tátti dúnıe kóńilimnen
Ketti meniń, nan maǵan.
Endi bizge bir ólimnen
Basqa túk joq arnaǵan.

Men – jaraly jolbaryspyn,
Jurttyń atqan oǵy ótip,
Sen esirke, sorly jaspyn,
Shyn sózime raqym etip.

Bala súıer, jar súıerden,
Túk neme joq, tur denem.
Sen – toty qus baqta júrgen,
Qaı jerimnen par kelem.

Erge barǵan er tanymaı,
Er qyzyǵyn kim kórer.
Shyǵaryna jol taba almaı,
Qaıǵymenen bosqa óler.

Aınyǵysh er tartsa salqyn,
Bal surasań, beredi ý.
Qazymyrlap sózdiń artyn...
Qasıetten betti jý.

Men – synyq jan, jamaǵanmen
Túzele alman túrlenip.
Teńiń emes, bil, saǵan men,
Ne qylasyń kirlenip?!

Áıel ólmes soqpa dertten,
Saýyǵa almas synǵan er.
Men – kómirmin qalǵan órtten,
Endi ruqsat bizge ber.

Seniń ómiriń gúldenip tur,
Esigin tap, kór qyzyq!
Meniń ómirim – bir sýyq sur,
Kúzgi kúndeı tur buzyq.

Birge týǵan men aǵańnan,
Shyn dosyńmyn, kem emes.
Soqqy jedim sum zamannan,
Bir jyly sóz em emes.

Arman etpe, jas kúniń kóp,
Igilik kór, erge bar!
Bul zamannyń qashqyny dep,
Men ǵarypty esińe al.

Mende pańdyq, jat minezden
Dáneme joq, jarqynym.
Osy jazǵan barsha sózden
Baıqalynar bar shynym.

Basy qatty, sum júregin
Toqtata almaı ketti de.
Sorǵa bitken kókiregin
Sendire almaı ótti de.

Bar denemniń bári – bir muz,
Qaırylýǵa jaramas.
Myna dáýlet, myna asyl qyz,
Boldy maǵan aram as.

Ol – jas aǵash, bir qyzyl gúl,
Japyraǵy jańǵyrar.
Sorly Onegın, joldy óziń bil,
Qaı tarapqa qańǵyrar.

---