(A. S. Pýshkınnen)
Jasynan túsin bılep, syr bermegen,
Dámelense, kúndese, bildirmegen.
Nanasyń ne aıtsa da, amalyń joq,
Túsinde bir kádik joq aldar degen.

Keıde pań, keıde kóngish ornymenen,
Keıde eleýsiz, keıde yntyq formymenen.
Keıde úndemeı júrse de sózge baıaý,
Ot jalyndaı jaýapker qurbymenen.

Ǵashyqtyq sózge júırik ásirese,
"Dem alysym, qumarym – bir sen" dese.
Janyn qurban jolyna qylǵan jansyp,
Kóz qaraýy qubylar áldeneshe,
Keıde uıalshaq, tómenshik, keıde tip-tik,
Qamyqqansyr, qaıǵyryp, orny kelse.

Jaı, jańa kisi bolyp túk bilmegen,
Qaljyńyn bildirtpeıdi qalaı degen.
Janyń shoshyr órligi jannan bólek,
Kisige baldan tátti orny kelgen.

Bıtteı boıy bosasa, sezer sonda,
Jastyq jeńip, kóńildi shaıqaǵanda.
Ǵashyqqumar, aqyl men boıyńdy alyp,
Jyly jaýap esiter ne qylsań da.

Eminer, "áı" degizer, daıyn qylar,
Júregiń qalaı soqsa, paıym qylar.
Jyly izin sýytpas, damyl kórmes,
Bir ońasha jolyǵar jer aıtqyzar.

El aýlaqta ońasha qolyna alyp,
Kóńilindegi sabaǵyn aıtyp tynar.

Jasynan kórse ony aqyly sasqan
Ne surqıa jandaryń jurttan asqan.
Jeńýge, qor qylýǵa taǵy da usta,
Ózine kúndes shyqsa, jol talasqan.
Ajýaǵa, qorlaýǵa tili oramdy,
Ne túrli tuzaq quryp kóńilin basqan.

---