InfoHub Logo

Oqýlyqtardy latyn tilinde basyp shyǵarýǵa búdjet qarajaty shyǵyndalmaıdy. Bul týraly búgin Ortalyq komýnıkasıalar qyzmetindegi baspasóz máslıhatynda QR BǴM Mektepke deıingi jáne orta bilim departamentiniń dırektory Sholpan Karınova aıtty.

«Nólinshi synyp oqýlyqtary 2020 jyldan bastap latyn álipbıinde basyp shyǵarylady. Biz bul jaıynda buǵan deıin aıtqanbyz. Oǵan memleketten eshqandaı qarajat shyǵyndalmaıdy. Óıtkeni, oqýlyq daıyndaý básekelestik ortaǵa berilgen. Búgingi kúni baspalar bul máselemen aınalysyp jatyr. Tolyqtaı alǵanda «Álippe» men orys tilindegi «Býkvardyń» 5 oqýlyǵy aprobasıadan ótkizilip jatyr. Qazirgi ýaqytta pedagogtardyń atalǵan oqýlyqtarmen tanysýǵa múmkindikteri bar», - dedi ol.

Departament basshysynyń aıtýynsha, baspalar oqýlyqtardy latyn álipbıinde basyp shyǵarýdy 2025 jylǵa deıin kezeń-kezeńimen júrgizedi.

«2020 jylǵa deıin ýaqyt bar, baspalar jumys isteıdi. Qajetti pedagogıkalyq saraptama júrgiziledi. Latyn álipbıine kóshý 2025 jylǵa deıin josparlanǵan jáne oqýlyqtardy satyp alýǵa, sonymen qatar pedagogtardyń biliktiligin arttyrýǵa ǵana jyl saıyn qarjy shyǵystary qarastyrylatyn bolady. Jalpy, BǴM latyn álipbıine kóshý jónindegi jumys tobynyń quramyna kiredi. Termınologıa, metodologıa jónindegi komısıalardyń birneshe otyrysy ótti. Latynǵa kóshýdiń úlken jospary ázirlenýde. Atalǵan josparda oqýshylardy oqýlyqtarmen qamtamasyz etý, pedagogterdi daıyndaý máseleleri kózdelgen», - dedi Sholpan Karınova.

QazAqparat

---