InfoHub Logo

Oralda jylý júıesi jańǵyrtylady: Úkimet 2,5 mlrd teńge bóldi,-dep habarlaıdy Infohab.kz.

Oral qalasynyń №2 jylý magıstralin qaıta jańǵyrtý jobasyna Úkimet 2,5 mlrd teńge qarjy bóldi. Qurylys-montajdaý jumystary 2024 jyly bastalyp, Jylý elektr ortalyǵynan (JEO) bastap, «Sıtı Sentr» saýda úıi mańaıyna deıingi ýchaskeni qamtıdy.

Bul jylý magıstrali 1987 jyldan beri paıdalanylyp keledi. Osy aralyqta temirbeton konstrýksıalary men armatýralary eskirip, qazir eleýli tozýǵa ushyraǵan.

Oblys ákimdiginiń habarlaýynsha, rekonstrýksıalaý jumystary 2025-2026 jyldardaǵy jylytý maýsymy bastalǵanǵa deıin tolyq aıaqtalady dep josparlanýda. Jobanyń basty maqsaty – jylý jelileriniń tozýyn azaıtý, ystyq sýdyń ótkizý qabiletin arttyrý jáne qyzmet kórsetý shyǵyndaryn qysqartý.

Qazirgi tańda Oral qalasyndaǵy magıstraldy jylý jelileriniń jalpy uzyndyǵy 249 shaqyrymdy quraıdy. Bul ınfraqurylymnyń basym bóligi ótken ǵasyrdyń 70-80 jyldary salynǵan jáne búginde olardyń tozý deńgeıi 50%-dan asyp otyr.

Bılik jylý júıesin jańǵyrtýǵa erekshe kóńil bólip, birneshe baǵyt boıynsha júıeli jóndeý jumystaryn júrgizýde. Bul – qala turǵyndaryn senimdi ári sapaly jylýmen qamtamasyz etý jolyndaǵy mańyzdy qadam.