InfoHub Logo

Alystan jolaýshy kele jatqan Ómirbaıdy bir aýyldyń mańynda úsh-tórt ury kıim-keshek, at, er-toqymymen tonap ketipti. Tonalǵan Ómekeń jaıaý-jalań aýylǵa kelipti. Aýyl adamdary Ómekeńnen:

— Jaıaý-jalań ne bolǵan adamsyń? Qaıdan kelesiń? — dep surasady. Ómekeń:

— Osy aýyldyń mańynda, qazir ǵana úsh-tórt ury kezige qalyp, kıim-keshegimdi, atymdy, er-toqymymdy tonap ketti. Ózim bolsam alystan kele jatqan jolaýshy edim, — deıdi. Aýyl mańyndaǵy adamdar taǵy da qýarlap:

— Urylardyń túr-tusy, kıimi, at-kólikteri qandaı eken, kórseń, tanı alasyń ba? — dep surapty. Sonda Ómekeń:

— Urylar maǵan aıqasa ketken jerde mal kerek pe, jan kerek pe? Tús attan, shesh kıimińdi dep dedektetip, qaraýǵa mursamdy keltirmedi, ózderi asyǵyp júrgen ury eken, — dep aýyldaǵylardy dý kúldiripti. Ómirkeńniń sózine kúlip, qyzyǵa tyńdap turǵandardyń ishinen bireýi:

— Eı, ury sóıtip tonamaǵanda qaıtip tonaýshy edi, bul beısharanyń ábden esi shyqqan eken, — deıdi.

Ómekeń aýyldaǵylardy ádeıi osylaısha bir kúldirip tastap, onan soń baryp istiń naǵyz ahýalyn, urylardyń jaǵdaıyn tolyq aıtyp beredi. Aýyl jigitteri de dereý urylardyń izine túse qýyp baryp, Ómekeńniń kıim-keshek, at-kóligin qolǵa túsirip qaıtaryp ákelip beredi.

Ómekeńniń osy sózinen keıin el aýzynda «Ómirbaı aıtqandaı, ózderi asyǵyp júrgen ury eken» degen támsil bolyp qalypty.

---